Aralarren jardueren zaintza eta kudeaketa hobetzeko akordioa

Gipuzkoako Foru Aldundiak eta Enirio Aralar Mankomunitateak akordio bat sinatu dute gaur, bi erakundeek amankomunean duten Gipuzkoako Aralar mendiaren eta bertako jardueren zaintza eta kudeaketa hobetzeko helburuarekin. Akordio horren bidez, gainera, orain arte egin diren urratsak sendotu eta areagotu nahi dira, eta datozen hilabeteetan zer alderditan esku hartu behar den finkatu, legealdi osorako harremana sendotzeko. Xabier Arruti, Gipuzkoako Foru Aldundiko Lurralde Oreka Berdeko diputatuak, eta Adur Ezenarro, Enirio Aralar Mankomunitateko presidenteak, sinatu dute gaur Ordiziako udaletxean dokumentu hau.