Ekitaldia

Ordiziak Latxa Ardi Gaztaren Lehiaketa hartuko du aurtengoan ere. Goizean Ordiziako, Tolosako eta Zumarragako txistulariek, trikitilariek eta dultzaineroek herriko kaleak zeharkatuko dituzte.

Azoka ospetsu honek bertoko gazta, ganadu, fruta eta barazki, oilo lumagorri eta perretxikoen erakusketa eta lehiaketak bilduko ditu egunean zehar. Fruta, barazki eta perretxiko lehiaketen sari banaketa eguerdiko 12etan izango da Joxe Migel Barandiaran plazan, eta ordu erdi beranduago Garagartza plazan, ganadu eta lumagorri lehiaketaren txanda izango da.

Urtero legez, latxa ardiaren esnez, eskuz eginiko Gazta lehiaketa izango da eguneko ikuskizun nagusia. Beti-Alai pilotalekuan izango da hitzordua eguerdiko ordu batean. Bertan, teknikari, sukaldari, gastronomi aditu eta kazetariek osatzen duten epaimahaiak erabakiko dute aurtengo gazta txapelduna.

Ondoren irabazlea izan den gazta erdiaren enkantea burutuko da, benetan prezio ikaragarria lortzen duen enkantea.