Geoparkea zaindu eta ikerkuntza zientifikoa bultzatzeko konpromisoa berretsi dute
Geoparkea zaindu eta ikerkuntza zientifikoa bultzatzeko konpromisoa berretsi dute
Markel Olanok harrera egin dio IUGSko idazkari nagusia eta Euskal Kostaldeko Geoparkeko komite zientifikoaren presidentea den Stanley Finney-ri
![](/documents/20933/923598/Finney.jpg/7cd2cecd-caa1-be8b-88f2-8c473e44510e?t=1495104905000)
Markel Olano diputatu nagusiak eta Ainhoa Aizpuru Ekonomia Sustapena, Landa Ingurunea eta Lurralde Orekako diputatuak harrera egin diote gaur goizean Donostian, IUGSeko (International Union of Geological Sciences) idazkari nagusia den Stanley Finney geologo kaliforniar ospetsuari. Ondoren izandako bileran, Euskal Kostaldeko UNESCO Geoparkearen balio geologiko, natural eta kultural nagusiak ikerkuntza bultzatuz zaintzea eta zientziaren arloan mundu mailako erreferentea izaten jarraitzeko konpromisoa berretsi dute Olanok eta Finneyk.
2013an Aldundiak eta IUGSk hitzarmena sinatu zuten Zumaiako estratotipoak zaindu eta kudeatzeko. Aldundiaren jauregian Finneyri egindako ekitaldian, diputatu nagusiak hitzeman du Aldundiak Gipuzkoako altxor geologiko hau “ondo zaindu eta kudeatuko” duela; eta IUGSk, aldiz, “mundu osoan zehar Geoparkearen modeloa erreferente bezala zabaltzeko” konpromisoa hartu du. Horri esker, hamaika publikazio eta konferentziatan gure Flyscha, biotopoa eta Geoparke paregabeak erakutsi ohi ditu munduan zehar. “Ikerketa zientifikoa bultzatzea geologian mundu mailako erreferentea izaten jarraitzeko aukera bakarra izateaz gain proiektuaren sinisgarritasuna areagotzen du ere” gaineratu du Olanok. Finneyk, bere aldetik, azpimarratu du “Zumaia, Deba eta Mutriku bitarteko Geoparkearen kudeaketa oso ona dela”, eta gune natural bakar honen kontserbazio eta balio zientifikoa ezagutzera emateko Aldundiak egindako lana azpimarratu du. Olano, Aizpuru eta Finneyrekin batera, Pedro Bengoetxea Debako alkatea, Oier Korta Zumaiako alkatea, Jose Angel Lizardi Mutrikuko alkatea, Geoparkeko gerente Leire Barriuso, eta Geoparkeko zuzendari zientifikoa den Asier Hilario geologoa ere izan dira.
Flynnek 2009. urtean egin zuen bere lehen bisita gure labarretara Aldundiak babestu zuen “Flysch, Haitzen hitza” dokumentala grabatzeko. Geroztik, gure flysch-aren eta Geoparkearen lagun eta kolaboratzaile estu bihurtu da. Esaterako, 2010ean, Zumaiako Itzurungo hondartzan urrezko iltzeak jartzera etorri zen. 2012. urtean, IUGSko zuzendaritza batzordea Aldundiko jauregian egin zen, berak proposatuta. 2012az geroztik, Geoparkeko komite zientifikoaren presidentea dugu Fynney. 2013an, Aldundiak eta IUGS-k hitzarmen bat sinatu zuten Zumaiako estratotipoak zaindu eta kudeatzeko. Horrez gain, 2015ean, “Anthropocene” dokumental internazionala Geoparkera ekarri zuen Jennifer Baichwall zinegile kanadiar ospetsuaren eskutik. Eta 2016an, Geoparkeko estratotipoak Victoria and Albert Museum of London-eko bilduma ibiltari batean sartu zuen. Ahal izan duen bakoitzean, bere lanpostuak ematen dion aukera guztiak baliatuz, zientzia mailan gure Geoparkearen, flysch-aren eta hortaz, Gipuzkoako bozeramailea izan da Finney jauna.
Bihar, ostirala, Geoparkearen Batzorde Zientifikoak lehen bilera izango du Deban, zientzilariei Geoparkearen plan estrategikoaren berri eman eta beraien partaidetzaren garrantzia azpimarratzeko. Eta arratsaldean, Donostiako Olatu Talkaren programazioaren barruan, 18:00etan hasita, Stanley bera eta Geoparkeko Batzorde Zientifikoko beste 5 lagun Geo-Talks ekitaldiaren baitan geologia, ekologia eta prehistoriari buruz 6 monologo motx eskeiniko dituzte Donostiako Katalunia plazan jarriko den karpa berezi batean. Guztia musika, bertsoa eta arteaz osaturiko antzerki batean txertatuta.
1632