Berdintasunean ospatuko diren jaien aldeko deia zabaldu du Aldundiak

Gure jaiak berdintasunean sentsibilizazio kanpaina jarri du abian Gipuzkoako Foru Aldundiak. Berdintasunerako Organoak sustatuta eta lurraldeko udalerrien laguntzarekin, foru erakundearen eta udalen konpromisoa bultzatu nahi da datozen hilabeteetan lurralde guztian zehar ospatuko diren jaien antolaketara begira, berdintasunean oinarritutako Gipuzkoa eraikitzen jarraitzeko eta emakumeen parte-hartzea sustatzen jarraitzeko. Kanpaina aurkezteko, udaletako ordezkari eta teknikariekin Aldundian egindako lan-bileran “jaiek gure bizimoduan eta komunitatea bera zein identitate kolektiboa eraikitzerako orduan duten garrantzia” azpimarratu du Eider Mendoza diputatu nagusiak eta deia egin du “pertsona guztien gozamena eta parte hartzea bermatuko” duten jaien alde eragiten jarraitzeko.

Bost puntuz osatutako konpromisoen dokumentua partekatu du Aldundiko Berdintasunerako Organoak, Gipuzkoako udal guztietara ere zabalduko dena eta gida gisa balioko duena, festen testuinguruan berdintasuna bultzatzeko konpromisoa duen eragile edo udal ororentzako, kontuan izanda hainbat udalerritan dagoeneko gai honen inguruko “lanketa sakona” egiten dela. “Jaiak berdintasunean komunitatea eraikitzeko aukera eskaintzen digute, emakume zein gizon izan”, esan du diputatu nagusiak. “Gipuzkoarrok gizarte bezala partekatzen dugun balio hori, berdintasunarena, elkarlanean errealitate bihurtzea nahi dugulako, baita festetan ere. Emakume nahiz gizon, pertsona orok modu askean eta berdintasunez goza ditzaten gure auzo eta herrietako festak”, gaineratu du.

Ildo beretik, gaurko saioaren lanketaz arduratu den Araitz Rodriguez adituak ere nabarmendu du jaiek “gizarte moduan elkartzen gaituzten balioen isla” behar dutela eta, horregatik, jaietan aukera berdintasuna bultzatzea eta horretarako baliabideak ezartzea ez da soilik jai batzordeen ala eragileen ardura, instituzioen ardura ere bada”.

 

Indarkeria matxistarik gabeko jaiak

Diputatu nagusiak gogorarazi duenez, “emakumeek jasaten duten egiturazko berdintasun faltaren adierazpen nagusia indarkeria matxista da eta, festen testuinguruan, tamalez sarritan gertatu ohi dira sexu indarkeria kasuak”. Gidaren puntuetako batek errealitate horri erreparatzen dio. Mendozak “indarkeria matxistarik gabeko jaiak exijitu eta aldarrikatu” ditu “indar guztiz” eta gogorarazi du festetan ematen diren urratze ludikoak ez direla, “inondik inora, aitzakia gure udalerrietako jaietan emakumeen aurkako sexu indarkeria matxista legitimatzeko edo normalizatzeko”.

Hartutako konpromisoek jai-esparruan ere emakume eta gizonen berdintasunean oinarritutako lurraldea eraikitzeko erakunde eredugarriak izateko ardura hartzen da berdintasuna sustatzen duten ekitaldien inguruan hausnartu, sustatu eta gaiaren inguruan sentsibilizatzeko konpromisoa hartzen da. Emakumeen partaidetza sustatzeko lanean, erakundeek berdintasunaren alde lan egiten duten eragileekin lankidetza sustatu, gogoeta prozesuak ahalbidetu eta emakumeen eta gizonen jaietako rolak aztertu eta horiek eraldatzeko neurriak proposatzeko konpromisoa hartzen da.

Aukera berdintasuna da konpromisoen artean ideia nagusietako bat, eta emakumeen esku-hartzeari dagokionez, kultur-, musika-, sukaldaritza edota kirol-arloko jardueretan, besteak beste, hura areagotzeko jarduera berriak proposatzeko deia egiten da.

Emakumeen aurkako indarkeriari dagokionez, erakundeak berretsi egiten dira ez jaietan ezta beste inolako espaziotan ere ez dela indarkeria ala jarrera matxistarik onartuko. Hala, emakumeen kontrako erasoen aurrean sentsibilizazio eta prebentzio ekimenak sustatzeaz gain, emakumeak ahaldunduko dituzten aukerak eskainiko zaizkien mugimendu feministari eta emakumeen elkarteei. Halaber, prebentzioa, arreta eta erantzun publikoa hobetzen jarraitzeko protokoloak lantzeko konpromisoa hartzen da.

Honako hauek dira erakundeek hartzen dituzten bost konpromisoen gidalerroak:

1. Erakundeek jaietan ere berdintasunaren aldeko ekimen eta gogoetak sustatuko dituzte.

2. Emakumeen partaidetza sustatuko duten antolakuntza bultzatuko da.

3. Aukera berdintasuna bermatuko da ekitaldi guztietan.

4. Indarkeria matxistarik gabeko jaiak sustatuko dira.

5. Irudi eta mezu berdinzaleak erabiliko dira.