“Gipuzkoa %100ean inklusiboa nahi dugu, pertsona orok garatu dezan berdintasunez bere bizitza proiektua”

Gaur goizean, Eider Mendoza Gipuzkoako diputatu nagusiak eta Maite Peña Zainketetako eta Gizarte Politiketako diputatuak Hegalak kirol-zentroaren instalazioak bisitatu dituzte. Hegalak Zabalik Fundazioaren egoitza da, dibertsitate funtzioanala duten pertsonen bizi-kalitatea hobetzen laguntzeko helburu duena, jarduera fisikoa eta kirola egitea erraztuz.

Hegalak Zabalik fundazioak aniztasuna bere osotasunean balio bat dela defendatzen du eta inklusioa errealitate bat izan dadin egiten du lan. Gipuzkoako Foru Aldundiarekin "%100ean" partekatzen du premisa hori, diputatu nagusiak azpimarratu duenez. "Hegalak Zabalik fundazioaren lana eredugarria da, pertsona guztien bizi-kalitatea eta ongizatea hobetzea baitu helburu, irismen handiko tresna sozial baten bidez, hala nola ariketa fisikoa eta kirola. Benetan inklusiboa den gizarte baterako bidea erakusten digu ", gaineratu du.

Diputatu nagusiak zentroko eta fundazioko profesionalen lana aitortu du, baita programen erabiltzaileen "indarra eta eredua" ere, eta gero eta inklusiboagoa izango den lurralde bat eraikitzeko konpromisoa agertu du, pertsonak "politika publikoen ardatz" izango direlarik. “Gipuzkoa %100eko inklusiboa nahi dugu, pertsona orok garatu dezan berdintasunez bere bizitza proiektua, orekatua eta osasuntsua”, berretsi du.

Mendozak azaldu duenez, "determinazio" horrek esanahi berezia du Gizarte Politiketan, eremu horretan gure lurraldea "aitzindaria" dena, zalantzarik gabe. Hori dela eta, legegintzaldi honek babes sozialeko politikei "bultzada berri bat" emateko balioko duela aurreratu du, pertsona bakoitzaren beharrizan espezifikoetara "gero eta gehiago" egokituko diren zerbitzuen bidez, baita "berrikuntzaren eta komunitatearen parte-hartzearen" bidez ere.

Gipuzkoako Foru Aldundia legealdi honetarako Plan Estrategiko berria prestatzen ari den honetan, diputatu nagusia hainbat bilera egiten ari da eragile sozial eta ekonomikoekin, baita hainbat kolektiborekin ere. Prozesu horretan kokatu du gaurko bisita ere, eta Hegalak kirol-zentroan egiten diren Hegalak Zabalik Fundazioaren programen erabiltzaileekin elkartu da, baita fundazioko lehendakari Blanca Arangurenekin eta Isabel Landa zuzendariarekin ere.

Hegalak Zabalik Fundazioa 2010ean sortu zen, Gipuzkoako Kirol Egokituaren Federazioaren bultzadari eta Gipuzkoako Foru Aldundiaren eta Donostiako Udalaren lankidetzari esker. Bi urte geroago, 2012an, lehen proiektua sortu zen, Hegalak kirol-zentroa, Kontxan kokatua, guztiz irisgarria eta inklusiboa dena.

“Integraziorako eta aniztasunerako” lankidetza

Gipuzkoako Foru Aldundiaren eta Hegalak Zabalik Fundazioaren arteko lankidetza 2010ean hasi bazen ere, urte hauetan guztietan erakundeak dituen programak bultzatu dira, kirolaren ikuspegitik ez ezik, gizartearen ikuspegitik ere. Elkarlan hori lankidetza-hitzarmen batekin estutzen da orain, eta sei programa espezifiko bultzatzen ditu dibertsitate funtzionala duten eta kalteberatasun-egoeran dauden pertsonentzat.

Hegalak Zabalik fundazioak hainbat programa ditu martxan, hala nola Hobesegi, Denur, Segiezan, Teknifikazioa eta Ikusnahi Sensi, desgaitasunen bat duten pertsonen bizi-kalitatea hobetzeko. Horrez gain, Hegalak Kirol Zentroak, Kirola & Gaitasuna erakundeak kudeatutakoak, jarduera espezifikoko 13 talde txiki ditu, desgaitasun fisiko edo intelektuala, fibromialgia, mendekotasuna, garapen psikomotrizean zailtasunak, etab. dituzten pertsonentzat.

Zehazki, Denur programak du eragin eta erabiltzaile kopuru handiena. Helburua hondartzan, edo igerilekuan eguraldi txarra bada, hesirik gabeko bainuak eskaintzea da. Doako zerbitzua da, eta desgaitasunen bat edo mugikortasun murriztua duten Gipuzkoako pertsonei edo lurraldetik kanpokoei zuzenduta dago. Denurri esker 1.216 bainu egin dira guztira, eta aurten 407 pertsonak hartu dute parte.

Irismen handia duen beste jarduera bat Hobesegi programa da. Dagoeneko 126 pertsona igaro dira programa honetatik, eta aurten 35 lagun ari dira parte hartzen, kasu honetan ere goranzko joera berretsiz. Hobesegin, gaixotasun edo lesio baten ondorioz hartutako desgaitasunen bat duten pertsonen premiei erantzuten zaie, aktibazioaren bidez haien bizi-kalitatea hobetzeko helburuarekin, eta osasunari eta ariketa fisikoari buruzko ibilbide bat eskaintzen zaie autonomia handiagoa lortzeko.

Talde espezifiko bat ere badute, indarkeria matxistatik bizirik atera diren emakumeei laguntza eta babesa ematen diena, beren autoestimua eta konfiantza sendotuz, Hegalak ingurune inklusiboan. Hegalak Zabalik-ek kirol egokituan lehiatzen diren kirolariei ere irekitzen dizkie ateak, haien prestakuntza integralerako behar dituzten laguntza tekniko eta ekonomikoak eskainiz.

Hegalak Zabalik fundaziotik defendatzen dutenez, "ezagutzea ulertzea da", horregatik uste dute sentsibilizazioa funtsezko oinarria dela fundazioaren jardueraren barruan. Jolas- eta prestakuntza-tailerrak eta jardunaldiak egiten dituzte, kirol egokitua ezagutarazteko, baita hitzaldiak ere, beste gaitasun batzuk dituzten pertsonen bizi-esperientzia ezberdinak ezagutzeko. 2022an, adibidez, Gipuzkoako bederatzi udalerritako ikastetxeetan izan dira, eta 500 ikaslek baino gehiagok parte hartu dute.