96.000 euro lezoko espazio publikoak berritzeko eta hobetzeko

Rafaela Romero: “Legegintzaldiaren hasieratik, konpromiso sendoa dugu Pasaialdearekin, eta, zehazki, Lezorekin, herritarrek espazio publikoez gozatzea hobetzeko eta biziberritzeko. Hainbat frontetan berroneratzen eta biziberritzen laguntzeko apustua, gutxi gorabehera 600.000 euro inbertituta zuzentzen dudan departamentuak diruz lagundutako hainbat jarduketatan. Horiei Lezo-Donibane bidegorriaren amaiera gehitu behar zaie, baita espazio publikoez gozatzeko aukera hobetzeko 2023ko hitzarmenean egindako 96.000 euroko apustu garrantzitsu hori ere, hala nola Altzateko igerilekuen estalkia. Pertsonak ardatz dituzten jarduerak, Pasaialdeko herritarren premietan”.

Jesús Mari Martiarena: “Diru hori herriko kirol instalazioak hobetzeko inbertituko da. Gipuzkoako Foru Aldundiarekiko harremana bikaina da, eta etorkizunean ere haiekin lanean jarraituko dugu, Lezo hobetzen jarraitzeko eta harreman bikain horri eusteko”.

Rafaela Romerok zuzentzen duen Mugikortasuneko eta Lurralde Antolaketako Departamentuak Lezoko Udalarekin duen lankidetza-hitzarmena berrituko du, herritarrek gozatzeko espazio publikoak hobetzeko eta biziberritzeko. Horri esker, 2023an Lezoko udalerriaren hiri-berrikuntza bultzatzen jarraitu ahal izango da, eta ingurune lagungarriago, irisgarriago eta inklusiboago baterantz aurrera egin.

Mugikortasuneko eta Lurralde Antolaketako foru diputatu Rafaela Romerok azaldu duenez, aurten sinatutako hitzarmenak 96.000 euroko dirulaguntza jasotzen du Lezoko udalerrirako, 2022an baino % 20 gehiago, eremuaren garapen sozioekonomikoa sustatzeko bultzada gisa. “Gaur aurkezten ari garen hitzarmenak – azaldu du Romerok – handitu egin du dirulaguntzaren zuzkidura ekonomikoa; hala, 2020an dirulaguntza 50.000 eurokoa izan zen eta, berritutako hitzarmenari esker, 2023an 96.000 eurokoa izango da. Aurtengo esku hartzeak kirol instalazioak hobetzea izango du xede”.

Romerok gogorarazi du, halaber, Aldundiak konpromisoa hartu duela Pasaialdean programa integral bat garatzeko, hondatutako hiri espazio eta ekipamenduak epe labur eta ertainean berreskuratu ahal izateko. “Bizi kalitatea hobetzeko aplikatzen ari garen lurralde eraldaketako politikek Pasaia berri bat eraikitzera garamatzate, non herritarrak baitira hiria biziberritzeko edozein jarduketaren azken helburua. Hirigintza inklusiboaren eta berdinzalearen printzipioetan oinarritutako biziberritzea”, adierazi du.

Hitzarmenaren baldintzen arabera, Gipuzkoako Foru Aldundiak guztizko 96.000 euroko ekarpena egingo du Altzateko igerilekuetako hegala berritzeko. Jarduketaren ondorioz,  egun jarrita dauden polikarbonatozko plakak eta azpiegitura kendu egingo dira, eta estalki berri bat jarriko da. Obrak 130.000 euroko aurrekontua du; haietatik 34.000 euro Lezoko Udalak ordainduko ditu.

Bestetik, Jesus Martiarena Lezoko alkateak adierazi duenez, “asko eskertzen diogu Gipuzkoako Foru Aldundiari Lezori emandako 96.000 euroko laguntza. Diru hori herriko kirol instalazioak hobetzeko inbertituko da. Gipuzkoako Foru Aldundiarekiko harremana bikaina da, eta etorkizunean ere haiekin lanean jarraituko dugu, Lezo hobetzen jarraitzeko eta harreman bikain horri eusteko”.

Romerok gogorarazi du, halaber, Mugikortasuneko eta Lurralde Antolaketako Departamentuak ahalegin eta diru kopuru handiak inbertitu dituela hirigintza plangintzan genero ikuspegia jasoko duten herriak eta hiriak garatzeko asmoz. Diputatuak honela esan du: “gure departamentuak gero eta apustu handiagoa egiten du inklusioa eta zaintza ardatz dituen hirigintzaren alde, gure adinekoen eta mugikortasun arazoak dituzten pertsonen bizitza erraztera bideratutako jarduketen bidez”. Amaitzeko, azpimarratu duenez, “berritu den hitzarmen honekin berretsi egiten da Pasaiako badiaren ehun ekonomikoa, urbanistikoa eta soziala biziberritzeko dugun konpromisoa”.