Abian, egoitzetan ongizatea indartzeko eta komunitate-laguntza areagotzeko programa

Markel Olano Gipuzkoako diputatu nagusiak eta Maite Peña Gizarte Politiketako foru diputatuak Goxatu programa aurkeztu dute gaur goizean; 13 neurri eta ekimenen bidez, programak Gipuzkoako egoitzetan bizi diren adinekoen bizi kalitatea eta ongizate psiko-emozionala ahalik eta gehien babestea du xede.  Markel Olano diputatu nagusiak adierazi duenez, kultura jarduerak indartuz, bisitak eta irteerak eginez eta fisioterapian, laguntza psikosozialean eta terapia okupazionalean ratioak handituz, "adinekoen ongizatea hobetzen jarraitu nahi dugu, gertutasuna oinarri hartuta eta eragile sozial eta komunitarioekin elkarlanean".

          Gabonen atarian, Gipuzkoako Foru Aldundiak Goxatu programa jarri du abian, joan den martxoan, pandemiari modu estrategikoan eta koordinatuan heltzeko bultzatutako Txoke Planaren barruan, "egoiliarren arreta indartzeko eta bizi kalitatea hobetzeko", azaldu du Olanok. Gogorarazi duenez, gure artean dagoeneko bederatzi hilabete daraman pandemiaren esparruan, "egoitzetan gero eta bizitza normalizatuago baterantz aurrera egiteko, funtsezkoa" da kultura, musika eta harreman jarduerak bultzatzea, bai eta boluntarioen eta ingurune komunitarioaren inplikazioa ere.

          Markel Olanok ez du ahaztu nahi "Gabonak berotasun, maitasun eta hurbiltasun garaia izan arren, birusak gure artean" jarraitzen duela, eta ohartarazi du "ezin diogula erne egoteari utzi".  Horregatik, segurtasunaren eta ongizate emozionalaren arteko balantza orekatzen jarraitzearen alde egin du: "Ezinbestekoa da prebentzioa areagotzen jarraitzea eta arduraz eta zuhurtziaz lan egitea".  Hartutako neurri berriek "Gabonei begiratzeaz gain, orain ematen ari garen bultzadak denboran irauteko asmoa" duela gaineratu du.

Bere aldetik, Maite Peña diputatuak azpimarratu du Gizarte Politiketako Departamentuak proposatzen eta hartzen dituen neurriak, planak, eta ekintzak hainbat kontraste-talderen bidez partekatzen eta eztabaidatzen direla familiekin, langileen ordezkariekin eta zentroetako talde arduradunekin, "gobernantza-eredu parte-hartzaileago eta kolaboratiboago baterantz aurrera egiteko helburuarekin".

Goxatu programa osatzen duten neurrien artean, fisioterapian, laguntza psikosozialean eta terapia okupazionalean ratioak handitzeak "nabarmen lagunduko du pandemiaren ondorioak arintzen eta ongizate fisikoa eta emozionala sustatzen", horretarako, Maite Peña diputatuak adierazi duenez, "erabiltzaile bakoitzeko ratioak bikoiztu egin ditugu". Gogorarazi du "beste neurri garrantzitsuenetako bat, eta inpaktu handieneko bat duena, egoitzetan arreta ratioak handitzea da, % 9,2ko batez besteko hazkundearekin", joan den astean Batzar Nagusietan iragarri zuen bezala. Hau da, fisioterapia, laguntza psikosozialean eta terapia okupazionaleko zerbitzuak areagotzeaz gain, erabiltzaile bakoitzak 18 minutu gehiago izango ditu egunean zuzeneko arretan.

Foru Aldundiak egiten duen beste apustu "indartsu" bat harremanen eremuari buruzkoa da; horretarako, egoiliarrek familiekin duten harremana indartu da, bisitak eta irteerak areagotuz. Bisitei dagokienez, eta Eusko Jaurlaritzaren eta hiru aldundien artean adostutakoa oinarri hartuta, bi pertsonak parte hartu ahal izango dute aldi berean, "eta egoitzen esku jarri ditugu eskura ditugun baliabideak, pertsona bakoitzak jaso dezakeen bisita kopurua handitzeko", zehaztu du Peñak.  Horrez gain, gogorarazi duenez, "lanean jarraitzen dugu teknologia berriek eskaintzen dizkiguten aukerak aprobetxatzeko eta, horregatik, 65 pantaila handi eta ukimenezko erosi ditugu, zentro bakoitzerako bana, bideodeiak egiteko eta bestelako kultura jardueretarako edo egoitzetako eguneroko jardueretarako erabiltzeko”.

Kanporako irteerei dagokienez, Maite Peñak azaldu duenez, "Gipuzkoako udalekin batera egoitzetatik gertu dauden parke, pasealeku eta plazetan sortzen ari garen espazio seguruei esker irteerak egiten jarraituko dute adinekoek. Gaur arte bederatzi gune gaitu dira, eta datozen egun eta asteetan 21 prest izatea aurreikusten dugu”. Bestalde, Gabonei begira, eta orain arte bezala, egoiliarrak beren etxeetara joan ahal izango dira, baina itzultzean, PCR proba bat egin beharko dute, eta ondoren, berrogeialdia, indarrean dauden protokoloek zehazten duten bezala.  Bestalde, etxean 30 egun baino gehiago igarotzen badute, familiek laguntza ekonomikoak eta teknikoak jasoko dituzte "etxeko egonaldia eta arreta errazteko", eta ez zaie plaza erreserba kobratuko.

Era berean, Foru Aldundia egoitzetan kontaktu eta laguntza komunitarioa areagotzeko lanean ari da, baita kultura eta musika jarduerak egoitzetara zabaltzeko ere, "egoitzetan bizimodu gero eta normalizatuagoa lortzeko eta, horrela, pandemiaren ondorioak arintzeko", adierazi du Peñak.  Horretarako, hainbat lankidetza hasi eta indartu ditu Gipuzkoako hirugarren sektore sozialeko eragileekin.

Alde batetik, Nagusilan elkarteko boluntarioekin lankidetzan, bideoen, postalen, gutunen, argazkien, testigantzen eta senideen eta bizilagunen mezuen bidez bilduko dira, eta egoiliarrekin partekatuko dira. Gainera, Lankurekin batera egindako lanari esker, ‘Adin-adin’ bertso saioak berraktibatuko dira, musikaren eta sorkuntzaren bidez, egoiliarren gaitasunak suspertzeko asmoz. Era berean, Sebastian Lizaso bertsolariarekin elkarlanean, bertso bat landuko dute lurraldeko hainbat egoitzatan, EITBren maratoi solidarioari ekarpena egiteko.  Halaber, Gizalderekin eta lurraldeko hainbat musika talderekin elkarlanean, egoitzetan emanaldi txikiak antolatuko dira, 'Zaharrak Berri’ ekimenaren baitan, musikaren bidez aisialdi aktiboa sustatzeko helburuarekin.

Bestetik, Mundukide eta Harreman elkarteen eskutik, Gipuzkoako egoitzei zuzendutako Gabonetako kontzertu solidarioa prestatu da.  Pasa den hiletik, abenduaren 24an Gipuzkoako 65 egoitzetan aldi berean emango den den musika programa bat lantzen ari dira.  Fernando Velazquez musikari, konpositore eta zuzendariak zuzenduko du kontzertua, eta Goikoburu abesbatzak, Eñaut Elorrietak eta Idoia Azurmendik hartu dute parte, besteak beste.

Diputatu nagusiak eskerrak eta zorionak eman dizkie Goxatu programan parte hartu duten pertsona guztiei, beren "lankidetzagatik eta inplikazioagatik", eta adierazi du programa familiekin, gizarte erakundeekin, egoitzen kudeatzaileekin, nahiz talde politikoekin eta sindikatuekin egindako lankidetza eta kontraste prozesu baten emaitza izan dela.