Aldundiak gizarte-berrikuntza bultzatu du zainketetan, 1.225.000 eurorekin

Berreskurapen, Eraldaketa eta Erresilientzia Planaren esparruan gizarte-berrikuntzako proiektuetarako dirulaguntzak emateko oinarri arautzaileak onartu ditu gaur Diputatuen Kontseiluak. Laguntza horiek 4 jarduera-ildo eta 1.225.000 euroko inbertsioa batzen dituzte oraingo deialdian. Adinekoen arloan, egoitza-zentroetako proiektu berritzaileak lagunduko dira (250.000 euro), bai eta Zaintza HerriLab estrategiaren esparruan egungo zainketa-ekosistema lokalak eta berriak sustatzea ere (375.000 euro). Era berean, etxeko zainketak hobetzeko eta sustatzeko zerbitzu berriak ezartzea bultzatuko da (350.000 euro), baita haurtzaroaren, desgaitasunaren, gizarteratzearen eta indarkeria matxistaren biktima diren emakumeen arloko berrikuntza-proiektuak ere (250.000 euro).

Gizarte-berrikuntzarako laguntzen deialdia da gaurkoan onartutakoa, iraupen luzeko zainketen Gipuzkoako estrategia indartzea helburu duena. Azken bi deialdiak batuta, 2021ean eta 2022an, 1.475.000 euro bideratu dira dagoeneko, eta guztira 38 proiekturi eman zaie laguntza, gizarte-zerbitzuen esparruan berrikuntza bultzatzen dutenak.

Irune Berasaluze foru bozeramaileak adierazi du “berrikuntza eta aktibazio komunitarioa funtsezkoak” direla “etorkizuneko zainketen arloan, Gipuzkoan gertatzen ari den arreta-ereduaren eraldaketaren esparruan. Azaldu duenez, azken urteotan bizkortu egin da zainketa pertsonalizatuagoak, inklusiboagoak eta komunitarioagoak lortzeko trantsizio-prozesua, Gipuzkoa 2020>2030 Agendaren bidez. “Helburua da Gipuzkoa zaintzaren abangoardian jartzea eta lurralde osorako partekatutako ibilbide-orri bat garatzea”.

Era berean, Berasaluzek berrikuntza sozialak “arlo sozialean” ere duen garrantzia azpimarratu du, eta Gipuzkoak arlo horretan duen indarra azpimarratu du, etorkizunean politika sozialen kudeaketan berrikuntza sistematikoki txertatzeak eskaintzen dituen aukera izugarriak azpimarratuz. “Helburua da eskala txikian probatzea, ikaskuntzak ateratzea eta eskalatzeko aukerak aztertzea, proiektu berritzaileak ingurune eta zerbitzu gehiagotan aplikatu ahal izateko, gero eta pertsona fisiko gehiagorengana iritsiz”.