Atzegirekin duen hitzarmena indartu du Foru Aldundiak

Diputatuen Kontseiluak erabaki du indartzea Atzegi Elkartearekin sinatutako programa-kontratua, desgaitasuna eta adimen urritasuna duten pertsonentzako egoitza zerbitzua eta programak eta jarduerak emateko. 115.373,84 euro gehiago bideratuko ditu horietara. "Etxebizitza laguntzekin” programan dagoen eskaerari erantzutea da helburua, egun zerbitzu horretan dauden (223) hitzartutako plazen kopurua handituz. Zerbitzu horrek desgaitasuna dutenei alojamendua, laguntza eta eguneroko bizitzako jardueretan gainbegiraketa eskaintzen die autonomia eta garapen pertsonala sustatzeko,  gizarteratzea eta bizi kalitatea hobetuz. Aldi berean, asmoa da gutxieneko zerbitzuetan 8 plaza gehitzea aste santuan, abuztuan eta eguberrietan dauden beharrei erantzuteko.

            Era berean, aurreikusten da da bizimodu independenterako laguntza programaren onuradun kopurua handitzea eta beste 10 pertsonari zabaltzea. Gaur egun 40 pertsona dira programa honen onuradunak; adimen urritasuna duten eta modu autonomoan bizi diren pertsonei orientazioa eta laguntza eskaintzen die. Gaur hartutako erabakia aintzat hartuta, guztira 6,2 milioi euroko babesa jasoko du Atzegik aurten. Imanol Lasa foru bozeramaileak nabarmendutakoaren arabera, “desgaitasuna duten pertsonentzako eta euren familientzako arreta egokia bermatzea da gobernu honen lehentasunetako bat legealdi hasieratik”. Ildo horretan, gogorarazi du Aldundiak hitzartuta dituen lau plazetatik bat, gutxi gorabehera, desgaitasuna duten pertsonei zuzenduta dagoela –2.500 inguru baino gehiago-.

Balio handia eman die Gipuzkoako hirugarren sektoreko elkarteen “eskarmentuari” eta “jakintzari”. Horien artean dago Atzegi, 1960. urtean hainbat familiak sortua. “Lehen eskutik ezagutzen dituzten dauden beharrak, eta hain justu horregatik, beraiek erantzun ditzakete inork baino hobeto. Sentsibilizazioan lan eskerga egiteaz gain, kalitatezko arretarako soluziorik berritzaileenak jarri dituzte martxan. Erakundeok babesa eman behar diegu, hirugarren sektorea delako gure gizarte ereduaren indargune handienetako bat, eta bereizgarri nagusia, desgaitasunaren arloan arretarako eskema eredugarria finkatzea ahalbidetu duena”.

Adimen urritasuna duten pertsonei garapenerako aukerak eskaintzea da Atzegiren lan ildo garrantzitsuenetako bat, haien autonomia sustatzen duten zerbitzuak sortuz, eta haien senitartekoei babesa eta aholkularitza eskainiz. “Benetako gizarte inklusioa lortu nahi baldin badugu, baliabideak jarri behar ditugu desgaitasuna duten pertsonek bizi proiektu ahalik eta independenteena garatzeko aukera izan dezaten, bai esparru pertsonalean, eta baita profesionalki ere”, azaldu du.  

Kudeabideak-Innobide

Bestalde, Kontseiluak adostu du 198.227 euro bideratzea Innobideak-Kudeabide egitasmoko diru-laguntzetara. Eusko Jaurlaritzak eta foru aldundiek jarri zuten martxan ekimena, EAEko enpresen lehiakortasuna bultzatzeko. Bereziki, haztea helburu duten eta garapen lehiakorraren eta enplegua sortzearen alde jokatzen duten enpresen txikien xedera bideratzen da. Aukera eman nahi zaie enpresaren esparru guztiak hobeto kudeatuta lehiakorragoak izateko, eta horretarako 6 elementu lantzen dira: estrategia, bezeroak, pertsonak, gizartea, berrikuntza eta emaitzak.

Laguntza deialdi honetan parte har dezakete Innobideak-kudeabide programan kudeaketa aurreratuko proiektuak sendotzeko etapan parte hartu nahi duten 5 eta 49 langile arteko Gipuzkoako enpresek.  Orain arte enpresen artean harrera “positiboa” izan duenez, Aldundiak jarraipena eman nahi dio. “Gaur egungo enpresek, edozein tamainakoak direla ere, geroz eta eszenatoki konplexuago eta globalago batera egokitzen jakin behar dute. Gai izan behar dute, dituzten baliabideei zuku guztia atereaz, denboran zehar aldatuz doazen beharrak asetzeko. Eta horretarako, ezinbestekoa da eraldaketaren, esperimentazioaren eta harreman eta antolaketa berrien diseinu eta garapenaren alde egitea. Aldundiak prozesu horretan lagundu nahi ditu enpresak, borondate irmoarekin”, eman du Lasak aditzera. Hala, ekimena martxan jarri zenetik, 205 proiektu babestu dira guztira, 870.000 eurorekin.

Aurtengo deialdian, alde batetik, pertsonei dagokienez, espresuki gehitu da genero berdintasunari eta kontziliazioari zuzendutako kudeaketaren hobekuntza eta, bestetik, 4.0 Industriaren paradigma enpresan onartzera bideratutako kudeaketa berritzeko aipamena sartu da.

Programa garatzeko oinarria Kudeaketa Aurreratuko Euskal Eredua izan da; eredu hori hainbat erakunderen arteko adostasunaren emaitza da. Foru bozeramaileak gogorarazi duen moduan, 2016ko otsailean, Aldundiak erabaki zuen erakunde publikoei zuzendutako eredu honen bertsioa ezartzea, herritarren aurrean kontu-ematea, eta kudeaketa eraginkorragoa, desburokratizatuagoa, eta gizartearen egungo eskakizun eta premietara egokituagoa bermatzeko: “Guk ere bikaintasunaren aldeko apustuan eredu izan nahi dugu, hau baita gobernu onaren zutabeetako bat”.

Artisauei babesa

Gipuzkoako eskulangintza sektorea sustatzeko 2018ko diru laguntza deialdia ere onartu du Kontseiluak. Honako lan ildoak hartuko ditu kontuan aurten 396.453 eurorekin hornitutako deialdiak: eskaintzaren egokitzapena, populazioko eta kontsumoko segmentu eta ohitura askotarikoen behar eta eskaeren arabera; banaketako eta merkatuetara iristeko formula berriak, IKTen pisu handi batekin; irudi erakargarriagoa; eskulangintza jardueraren bideragarritasunari eta jasangarritasun ekonomikoari lagunduko dioten merkataritza eta kudeaketa gaitasunak garatzea; eta sektorearen balorazioa eta aitorpen soziala eta profesionala, eskulangintzako erregistroa aktibatuz.

Sorkuntzan, ekoizpenean eta banaketan eragin nahi du deialdiak, modu proaktiboan. Harreman eredu berriak bultzatu nahi ditu, lankidetzan, antolakuntzan eta sustapenean oinarritutakoak, eskulangintzaren ikuspegi soziala, kulturala eta ekonomikoa integratuz, ahalduntzea erraztuz, ikusgarritasuna indartuz, eta profesionaltasun, prestigio eta kalitateko ingurune batean kokatuz.

Foru Aldundiak jarraipena eman nahi dio sektorea modernizatzeko apustuari, “alde batera utzi gabe bere oinarrizko izaera: hau da, giza hurbiltasuna, benetakotasuna, pertsonalizazioa edota ingurugiroarekiko errespetua eta jasangarritasuna. Gipuzkoak betidanik eman ditu artisau eta eskulangile apartak. Asko sustraitutako jarduera da, tradizio handikoa, gure kultur ondarearen eta nortasunaren parte dena, eta iraganaz gain, oraina eta etorkizuna ere badauzkana, berrikuntzaren bidez”, amaitu du Lasak.