Beroak antolatutako udalekuez gozatzeko aukera izango dute familia-harreran dauden hogei bat adingabek

Beroak, Gipuzkoako Harrera Familien Elkarteak, Gipuzkoako Foru Aldundiarekin batera, familia-harreran dauden haurrentzako udalekuen edizio berri bati ekingo dio gaur, uztailak 14. Duela 15 urte baino gehiagotik egiten den programa da hau. Urtero, 10 eguneko egonaldia antolatzen da familia-harreran dauden 5 eta 18 urte bitarteko hogei bat adingaberentzat, baita harrera familietako seme-alaba biologikoentzat ere. Aurtengo edizioan, hogei bat adingabek hartuko dute parte 10 eguneko iraupena izango duten udalekuetan.

Helburua da antzeko bizitza-historiak eta egoerak dituzten adingabeen arteko harremanak sustatzea, elkarrekin erlazionatzeko eta elkarri laguntzeko espazio bat eskainiz. Era berean, familia harreragileetako seme-alaba biologikoak elkartzeko eta haiei laguntzeko aukera ematen du,  egoera horiei aurre egitea zaila gerta dakiekeelako.

Jarduera Mugitu programaren barruan kokatzen da, eguneko, asteburuko eta udako hainbat jardueretara bideratuta, eta aurten haurrek Sendaviva parke tematikora joateko aukera izango dute. Jarduera horietan guztietan, gizarte-arloan eta irakaskuntzan trebatutako 10 profesionalek osatutako hezkuntza-talde batek parte hartzen du; figura egonkorrak dira, urtean zehar egindako jarduera guztietan parte hartzen dutenak, eta parte-hartzaileentzako erreferentzia-eredu bihurtzen direnak. Kalitatezko zerbitzu pertsonalizatua eskaintzen da, pertsona bakoitzaren beharrak eta inguruabarrak kontuan hartuta. Aisialdiko eta denbora libreko programaren barruan, harrera familien eta familia-harreran dauden haurren arteko harremanak ere sustatzen dira.

Gainera, Gipuzkoako Foru Aldundiarekin lankidetzan, Beroa elkarteak Autonomia kalean dagoen bizikidetza-espazio bat eskaintzen du. Bertan, jatorrizko familiek eta harreran dauden haurrek gainbegiratutako topaketak egiten dituzte. Zentroak 9 areto ditu, dekorazio eta material egokiekin, haurren adinaren eta bisita bakoitzaren beharren arabera egokituta daudenak. Espazio komun batzuk ere baditu, hala nola sukalde bat, otorduren bat prestatu ahal izateko, festak antolatu ahal izateko, etab. Aldi berean, Beroa elkarteak orientazioa eta prestakuntza eskaintzen ditu ikastetxeetan, heziketa-zikloetan eta unibertsitateetan, haurren babeserako sistemari dagozkion baliabideei buruz, "Inplika-tu" gizarte-sentsibilizazioko proiektuaren bidez.​​​​​​​