Foru Aldundiak eta ASLEk partaidetzan oinarritutako enpresa modeloa indartzen jarraitzeko asmoa dute krisiaren aurrean

Gipuzkoako Foru Aldundiak bilera bat izan du ASLE enpresa-elkartearekin, zeinak Euskadiko lan-sozietateak eta enpresa partaidetuak biltzen baititu. Bertan, egoera ekonomikoaren eta Covid-19ak enpresetan duen eraginaren diagnostiko partekatua egin dute, eta, egungo krisiaren aurrean, lankidetzan jarraitzeko borondatea berretsi dute, Gipuzkoan partaidetzan oinarritutako eta pertsonak erdigunean jarriko dituen enpresa-eredu bat finkatzeko. Bilera hori foru erakundea lurraldeko eragile ekonomiko eta sozial garrantzitsuekin zabaltzen ari den lan agenda sistematikoaren barruan kokatzen da, hartara pandemiak mahai gainean jarri dituen erronkei batera heltzeko.

          Markel Olano diputatu nagusiak, Imanol Lasa Sustapen Ekonomiko, Turismo eta Landa Inguruneko diputatuak eta Iker Estensoro Sustapen Ekonomikoko zuzendariak hartu dute parte gaurko bileran. Kepa Olivares erakundeko presidenteak, FMD Carbide Salen ordezkaritzan, Gorka Sudupe presidenteordeak (Ormola SAL), Jone Nolte zuzendari kudeatzaileak (duela gutxi Josetxo Hernandezen lekukoa hartu du) eta Ana Isabel Yoldi ASLEren Gipuzkoako ordezkariak hartu dituzte ASLEren egoitzan.  Olanok aukera aprobetxatu du Nolteri "zorterik onena" opa  izateko elkartearen buru izan den bitartean, eta Hernandezen ibilbideari ere balioa eman dio; izan ere, "bizitza osoan lan egin du enpresaren inguruan duen ikuspegia islatzeko: proiektu partekatu bat, bertako kideen inplikazio aktiboan oinarritzen dena, eta gizartearekin, kalitatezko enpleguarekin eta balio ekonomiko eta soziala sortzearekin konpromisoa duena".

          Foru arduradunek bileran iragarri dutenez, Diputatuen Kontseiluak datorren astean onartuko ditu Gipuzkoako enpresetan pertsonen parte-hartzea sustatzeko programako laguntzak, eta 1.025.000 euro bideratuko dira horretara: 628.512 euro, kudeaketan, erabaki estrategikoetan, emaitzetan edo kapitalean pertsonen parte-hartzean oinarritutako enpresa-ereduak bultzatzen dituzten proiektuak finantzatzeko; eta 396.488 euro, modelo horiek garatzen lagunduko duen ekosistema bat sustatzeko.

          Olanok ASLE bezalako eragileek egiten duten lanaren balioa azpimarratu du, eta nabarmendu du “langileek enpresan parte modu desberdinetan hartzea Gipuzkoako lehiakortasunaren funtsezko elementu bat” dela, “krisi garai hauetan indartu behar dugun ezaugarri bat, zalantzarik gabe, garai berri honetako erronka ekonomiko eta sozialei arrakastaz aurre egiteko”. Gaineratu du parte-hartzean oinarritutako antolaketa eta kudeaketa eredu aurreratuen alde egiteak mesede egiten duela lan baldintzetan, enpleguaren kalitatean, enpresek gure lurraldean duten sustraitzean edo belaunaldien arteko ordezkapenaren bidez proiektuekin jarraitzean. "Baina gure sare ekonomikoa nahitaez eraldatzeko palanka bat ere bada, kontziliazio erantzukidearen, berrikuntzaren edo barne ekintzailetzaren ikuspegitik".

          Diputatu nagusiak ziurtatu duenez, pandemiak "enpresaren ekarpen ekonomiko eta soziala" nabarmendu du, "gizarte kohesionatu oparo baten oinarri den aldetik. Erakundeok babestu egin behar dugu jarduera ekonomikoa eta enplegua inoiz baino testuinguru zailagoan mantentzeko egiten ari diren ahalegina tokiko eta mundu mailako murrizketen ondorioz. Datuek erakusten dute lankidetzan oinarritutako enpresak hazten ari zirela, bai fakturazioari dagokionez, bai enpleguari dagokionez, pandemiaren aurretik, eta hobeto prestatuta daudela krisiari aurre egiteko. Ahalik eta enpresa parte-hartzaile gehien izatearen aldeko apustua egiten jarraitu behar dugu, lehian bereizteko", gaineratu du.

Bestalde, Kepa Olivaresek eskertu egin du Gipuzkoako Foru Aldundiak enpresetan langileen parte-hartzea sustatzeko egin duen etengabeko ahalegina, eta gogorarazi du ASLEren eta Aldundiaren artekoa 10 urtetik gorako lankidetza dela. "Gipuzkoak beti egin du gure ereduaren alde, lehiakortasun handiagoa, lurraldearen garapena eta pertsonen oreka eta ongizatea bultzatzen baititu", adierazi du.

Horren erakusgarri da partaidetza duten enpresek eta lan sozietateek Gipuzkoan duten ezarpen handia. Gainera, gaur egungo egoera zail honetan, enpresen berregituraketan, "lan gizartea eta enpresa partaidetua eredu ezin hobeak dira krisia gainditzeko, dituzten abantailak kontuan hartuta". Hala erakutsi du ASLE elkarteak krisi garaian, Olivaresek azaldu duenez, eta, horregatik, orain, lan gizartearen eta enpresa partaidetuaren ereduak "zentzu handiagoa" du.

"Erresilientzia eta egoeretara egokitzeko gaitasuna erakutsi duen eredu bat da; izan ere, langabeziaren aurkako borrokan beste eredu batzuek baino hobeto laguntzeaz gain, kolektibo ahulentzat inklusiboa da eta bake sozialaren eredu bat da", amaitu du.