Gipuzkoako zerga bilketa metatua %0,5 igo da ekainera arte, aurreko urtearekin alderatuta
Gipuzkoako zerga bilketa metatua %0,5 igo da ekainera arte, aurreko urtearekin alderatuta
Gipuzkoako Foru Ogasunak 2018an baino 7,5 milioi euro gehiago batu ditu
Zerga bilketa metatua %0,5 hazi da Gipuzkoan ekainera arte, aurreko urteko denboraldi berdinarekin alderatuta. Guztira 1.587 milioi euro bildu dira eta, ondorioz, 2018an baino 7,5 milioi euro gehiago batu dira. Pertsona Fisikoen Errentaren gaineko Zergan (PFEZ) nabarmen hazi dira lan etekinen gaineko atxikipenak, lan merkatuaren egoera onaren adierazle. Eragin negatiboa izan duten elementuen artean, ondare irabazien gaineko atxikipenetan emandako jaitsiera nabarmendu behar da, pasa den urtean ezohiko sarrera bat egon baitzen. Nabarmen igo dira baita ere Balio Erantsiaren gaineko Zergaren (BEZ) itzulketak.
Zifrak xehatuz gero, eta Errentaren gaineko zergarekin hasiz, lan atxikipenen atalean 36,3 milioi gehiago jaso ditu Ogasunak (+%4,8). Bestalde, gora egin dute kapital higikor eta higiezinen atxikipenek, 2,8 milioi (+%12,8) eta 0,2 milioi (+%1,9), eta behera egin dute ondare irabazien gaineko atxikipenek, 9 milioi euro gutxiago bildu baitira (-%54,6). Honela, PFEZ bere osotasunean hartuta emaitza positiboa da, pasa den urtean baino 7,5 milioi gehiago batu dira eta (+%1,3).
Sozietateen gaineko Zergari dagokionez, kuota diferentzial garbiak, enpresen irabaziak zergapetzen dituen kontzeptua, 9,6 milioi euro gutxiago bildu ditu: sarrera gordinak 12,9 milioi euro gutxitu dira, eta itzulketak 3,4 milioi eurotan murriztu dira. Bestalde, Aldundiak kudeatzen duen BEZari dagokionez, zerga bilketa metatua %1,1 jaitsi da aurreko urtearekin alderatuta, hau da, 6,2 milioi euro gutxiago: 11,9 milioitan hazi dira sarrerak (+%1,6), itzulketak 17,9 milioitan igo dira (+%5,8) eta lurralde arteko doikuntzak 0,2 milioi eurotan murriztu dira (-%0,2).
Zerga berezien atalean, bere aldetik, Hidrokarburoen Zergaren bilketa 11,6 milioi eurotan hazi da (+%11,2) eta tabako laboreen gainekoa 2,7 milioi eurotan. Azkenik, Estatuarekiko doikuntzen zerga-bilketaren alorrean, 18,5 milioi euro gehiago bildu dira BEZean (+%13) eta 2,4 milioi hazi da zerga bereziena.
DGN.actualidad.detalle.adjunto:
2718