Gizarte politika eta ekonomia sustapena indartuko ditu Aldundiak 2017ko aurrekontuaren ardatz gisa

Gipuzkoako diputatu nagusiak, Markel Olanok, Foru Aldundiaren 2017ko aurrekontuak aurkeztu ditu, ekonomia sustapena eta gizarte politika ardatz dituztenak. Zehazki, 19,3 milioi gehiago bideratuko dira Gizarte Politika departamentura, mendekotasun laguntzak eta egoitzetako plazak indartu eta Kabia eta Elkar-Ekin programen garapenerako. Diputatu nagusiak azaldu duenez, esparru honetara doa aurrekontu hazkundearen %75 baino gehiago. “Europa mailan gizarte ezberdintasun gutxieneko lurraldeen artean egon nahi dugula esan ohi dugu, eta ekintzekin ari gara horretarako lanean”, esan du.

Diputatu nagusia hedabideen aurrean agertu da gaur 2017ko aurrekontuak aurkezteko, eta berarekin izan dira Jabier Larrañaga Ogasun eta Finantza foru diputatua eta Jose Corchon Finantza eta Aurrekontuetako zuzendari nagusia. Aurretik, Gobernu Kontseiluaren onespena jaso du proiektuak eta ondoren Batzar Nagusietan izan da Olano, ekimena Eider Mendoza presidenteari eman eta batzarkide taldeekin partekatzeko. Guztira, Imanol Lasa foru bozeramaileak pasa den astean aurreratu bezala, 838 milioiko aurrekontu propioa izango du Aldundiak datorren urtean, aurten baino %3,16 eta ia 26 milioi euro gehiago. “Egonkortasunezko aurrekontua” dela adierazi dute foru arduradunek, Gipuzkoak egun dituen erronka nagusiei erantzun ematera bideratuta.

Gizarte politika da aurrekontuaren bi zutabe nagusietako bat, kudeaketa baliabideen ia %50 bertara bideratzen baitira. Pasa den urtean baino 19,3 milioi gehiago izango ditu aurten departamentuak, mendekotasun laguntzak eta egoitzetako plazak indartu eta hedatu eta Kabia eta Elkar-Ekin programen garapenera. “Gizarte zerbitzuetan inbertitzen jarraitzen dugu eta jarraituko dugu, hemen inbertitzea Gipuzkoa osoaren aldeko inbertsioa baita”, esan du Olanok, datu bat azpimarratuz: aurten biztanleko 480 euro gastatu ditu Aldundiak gizarte zerbitzutan, eta datorren urtean 508. Honen harira, finantzaketarako hain beharrezkoak diren baliabideak ekonomia sustapenaren eskutik iristen direla gogoratu du. “Egiten dugun planteamenduan, bi esparruak estuki lotuta daude”, defendatu du.            

Olanok, zentzu honetan, ekonomia agertokiaren irakurketa baikorra egin du. “Adierazle askoren bilakaera oso positiboa izaten ari da azken hilabeteetan, Barne Produktu Gordina edota langabezia tasa kasu, baina oraindik ziurgabetasunek jarraitzen dute eta ezin dugu erlaxatu”, esan du. Testuinguru honetan, diputatu nagusiak nabarmendu du inoiz baino garrantzitsuago dela ekonomia sustapenaren bidetik jarraitzea. Hori dela eta, zehaztu du Ekonomia Sustapeneko departamentuak pasa den urtean izan zuen %50eko aurrekontu hazkundeari jarraipena eman zaiola, eta Ekonomia Suspertzeko Planak datorren urtean beste 50 milioi bideratuko dituela lurraldeko enpresa ehuna indartzera.

Bi zutabe nagusi hauekin batera, bide azpiegiturak eta zerga iruzurraren aurkako jarduketa dira aurrekontua egiterakoan Foru Aldundiak kontuan izan dituen beste bi lehentasun nagusiak. Errepideen kasuan, Antzuola-Bergara bideko lanekin jarraituko du foru erakundeak, Gipuzkoako Biribilgunea proiektuari amaiera emango dion proiektua, eta horretarako 12 milioiko hazkundea du aurrekontuan Bide Azpiegituren departamentuak. Zerga iruzurraren kasuan, giza baliabideen atalean iragarritako 45 langile gehigarriren hazkundearen lehen fasea exekutatuko da, eta informatika arloan Big Data teknologien garapenerako baliabideak handituko dira. Pasaialdearen biziberritzeak, bere aldetik, berriro ere zortzi milioi euro izango ditu.

Horrela, 2017an departamentuak eskura izango duten kudeaketa aurrekontu propioak, hau da, finantza-zama kontuan hartu gabe, honako banaketa du:

DEPARTAMENTUA	AURR. 2016	-IZFE 2016	DOITUTA 2016	AURR. 2017	ALDEA	% ALDEA
Diputatu Nagusia	17.155.288	-166.270	16.989.018	18.033.557	1.044.539	6,15%
Kultura, Turismo, Gazteria eta Kirola	54.952.256	-1.174.060	53.778.196	53.823.610	45.414	0,08%
Gobernantza eta Gizartearekiko Komunikazioa	39.240.738	7.450.530	46.691.268	48.848.947	2.157.679	4,62%
Ekonomia Sustapena, Landa Garapena eta Lurralde Oreka	70.102.181	-379.280	69.722.901	70.000.666	277.765	0,40%
Mugikortasuna eta Lurralde Antolaketa	58.690.523	-316.070	58.374.453	59.835.579	1.461.126	2,50%
Ogasuna eta Finantzak	46.054.728	-3.817.130	42.237.598	44.379.605	2.142.007	5,07%
Bide Azpiegiturak	77.744.655	-255.800	77.488.855	89.412.404	11.923.549	15,39%
Gizarte Politika	345.378.480	-1.033.940	344.344.540	363.629.151	19.284.611	5,60%
Ingurumena eta Obra Hidraulikoak	21.495.831	-307.980	21.187.851	23.758.423	2.570.572	12,13%
Batzar Nagusiak	6.994.000	0	6.994.000	7.063.994	69.994	1,00%
Beste gastuak	508.303	0	508.303	237.198	-271.105	0,00%
GUZTIRA	738.316.983	0	738.316.983	779.023.134	40.706.151	5,51%

Zenbakietara jaitsita, Larrañagak azaldu du IZFE (Informatika Zerbitzuen Foru Elkartea) dela eta aurrekontua berrantolaketa burutuko dela 2017ra begira. “Zazpi milioi baino gehiago zeuden hainbat departamentutan sakabanatuta, eta banaketa irizpidea guztiz zaharkituta zegoen. Orduan, hau berrantolatu eta Gobernantza departamentuan zentralizatu dugu”, azaldu du diputatuak. Mugimendu honek ez du inongo eraginik Aldundiaren kudeaketan, eta hori dela eta, aurreko ekitaldiarekin alderaketak egiterako orduan ez da kontuan hartu.

Banaketari dagokionez, gizarte politikak kudeaketa aurrekontuaren ia erdia hartzen du bere gain, aurten izan duen pisua zertxobait handituz. Orokorrean banaketa aurtengoaren lerrokatuta dago, Bide Azpiegituretan nabarmentzen delarik, puntu bat irabazi eta %10,5 izatetik %11,5 izatera pasa baita.