Mugikortasuneko, Turismoko eta Lurralde Antolaketako Departamentuak «Muy Gipuzkoa San Sebastián» aurkeztu du, Gipuzkoa sustatzeko marka turistiko berria

Azahara Domínguez: «Muy Gipuzkoa San Sebastián» kontzeptu deigarria da, Gipuzkoak esan nahi duen guztia, ezkutatzen duena, transmititzen duena eta promesten duena transmititzeko gai den marka. Apaltasuna eta irmotasuna adierazten dituen logo bat diseinatu da, izaera gipuzkoarraren eta herrialdearen beraren ezaugarriak baitira biak».

Mugikortasuneko, Turismoko eta Lurralde Antolaketako Departamentuak Gipuzkoa sustatzeko marka turistiko berria aurkeztu du ostegun honetan, Pasaiako Albaola lantegian egindako ekitaldi batean. Bertan izan dira Mugikortasuneko, Turismoko eta Lurralde Antolaketako diputatu Azahara Domínguez, Basquetour-eko zuzendari Daniel Solana eta Denis Itxaso, Gobernuaren Euskadiko ordezkaria.

Birdiseinurako, hiru alderdi estrategiko hartu dira kontuan: batetik, Gipuzkoa terminoak, berez, ez du lurraldeak duen balio guztia adierazten, eta balizko bisitariek ez dute guztiz ezagutzen; bestetik, turismorako erakargarritasunik handiena, bai Gipuzkoakoa, bai Euskadikoa, hiriburua da, Donostia, eta bai publikoak bai bisitari izan litezkeenek aitortu eta identifikatu egiten dute; azkenik, Gipuzkoa nortasun handiko lurraldea da, erakarpen turistikoko polo zabalak dituena, eta eskaintza kultural, natural eta gastronomiko zabalekoa. 

Azahara Domínguezek azaldu duenez, hurbilago zein urrutiago daudenentzat ezaguterraza izaki, marka berriak «San Sebastián» terminoa hartzen du markaren erakargarri gisa. «Gipuzkoa» terminoaren ondoan agertzen da, lurraldearen ezagutza eta aitorpen handiagoa sortzen lagundu dezan. Gainera, sozialki bi kontzeptu horien arteko lotura sortzen laguntzen du. 

Horrela sortu da «Hain Gipuzkoa Donostia». Kontzeptu deigarri bat da, Gipuzkoak esan nahi duen guztia, ezkutatzen duena, transmititzen duena eta promesten duena transmititzeko gai den marka bat», adierazi du Azahara Domínguez diputatuak.

«Gipuzkoa sustatu nahi dugu, eta, horretarako, entzun dadila, ikus dadila, senti dadila lortu nahi dugu. Kontatu behar dugu zerk egiten duen Gipuzkoa berezi, zerk erakartzen, maitemintzen eta motibatzen duen, zerk bereizten gaituen. Gipuzkoa bizi egin behar dela, deskubritzeko moduko esanahiak biltzen dituelako. Gipuzkoa definitzea konplexua den leku bat delako. Benetako nortasun bat duen lurralde bat da, desberdina, bakarra, izaera sendokoa», azpimarratu du. «Ikusten duzuenez, logo honek apaltasuna eta irmotasuna adierazten ditu, izaera gipuzkoarrak eta Gipuzkoak berak hain berezko dituzten bi ezaugarri. Hain da Gipuzkoa Donostia», gaineratu du. 

Marka malgua
Marka turistiko berriak, gainera, malgutasuna eta freskotasuna ditu ezaugarri, eta hainbat modutan erabil daiteke, hizkuntza aniztasuna kontuan hartuta. Horrela, «Hain Gipuzkoa» euskarazko bertsioa diseinatu dugu, baita «So Gipuzkoa» ingelesezkoa eta «Très Gipuzkoa» frantsesezkoa ere. Era berean, udalerriek bereganatzeko aukera eskaintzen du eta horrela hobeto ordezkatuta sentituko dira.. «Ezin dugu ahaztu Gipuzkoa udalerri askok osatzen dutela, eta udalerri bakoitzari leku bat eman nahi diogu, herritar guztiak ordezkatuta egon daitezen», amaitu du.