A-636 Beasain-Bergara autobia birgaitzeko lanak ekainaren bigarren hamabostaldian hasiko dira

Bidegiko Administrazio Kontseiluak A-636 autobidearen,  Beasaingo lotunetik Ormaiztegiraino zoruaren egitura birgaitzeko proiektua esleitzea onartu du, ostiral honetan, maiatzaren 27an. Obra ekainaren bigarren hamabostaldian hasiko da eta 4.117.295 €ko aurrekontua dauka eta zazpi hilabeteko epea. Bidegik autobiaren erabiltzaileek sortutako funtsekin egingo dio aurre inbertsioari.

          A-636 errepidearen zorua birgaitzeko proiektuak 5,2 kilometroko zatia hartzen du,         0 kilometrotik, Beasaindik, 5,200 kilometrora, Ormaiztegin. Lanak Ormaiztegin hasiko dira eta beheranzko noranzkoan egingo dira Beasaingo N-I errepidearekiko loturaraino. Autobiaren enborra bi noranzkoetan erabat berritzea barne hartzen du, bakoitzak bere bi errei, bazterbideak eta lotuneen parean abiadura aldatzeko erreiak dituela.

          Errodadura-geruza fresatzeko eta birjartzeko lanak egingo dira 5,2 kilometroko tarte osoan. Deformatuen dauden zonetan, tarteko geruza ere berrituko da eta Salbatore eta Antzizar bidezubien dilatazio-juntura guztiak berrituko dira, eta 8 espirak berrezarriko dira trafikoen edukiera neurtzeko. Era berean, beste erdibitzaile bat eraikiko da 2,200 kilometroaren parean.
Oinarriko edo tarteko geruzak fresatzeko eta zabaltzeko, kaltetutako erreiaren tartea moztuko da, bestea irekita dagoen bitartean. Errodadura-geruza sei asteburutan zehar zabalduko da, galtzada osoan, bai jarduten den galtzadaren zati osoa eta dagozkion loturak itxita, bai erdibitzaile-pasaguneen bidez pasabidea eratuz. A-636 errepideko bi gasolina-zerbitzuguneei ere eragingo die, ostiraleko gauetik astelehen goizera asteburuko itxierarekin. Zerbitzugune hauen itxierak aldez aurretik iragarriko dira.

          Birgaitzearen une jakin batzuetan, 3,5 metrotik gorako zabalera duten garraio bereziek ezin izango dute autobiatik zirkulatu. Gorabeherarik gerta ez dadin, talde bat aktibatuko da Telegram sare sozialean. Bertan, garraio-enpresek kontsultatu egin beharko dute, eta, horrela, garaiz jakin ahal izango dute A-636 errepidetik zirkulatu ahal duten, autobian blokeatuta gera ez daitezen. Informazio hori N-I errepideko Ordiziako eta Olaberriako mezularitza aldakorreko paneletan eta A-636koetan ere egongo da ikusgai.

          Birgaitu beharreko tarte gehiena 1997an ireki zen, eta gaur egun zoruaren erregulartasuna nahiko eskasa da. Zati bat deformazioak izan dituzten harri aldagarrien betelanen eta lur-erauzketen gainetik doa. Berritu ondoren, A-636 errepideko zirkulazioa erosoagoa eta seguruagoa izango da.