Aldundiak “buru belarri” ekingo dio euskarari bultzada berri bat emateko Euskaraldiari begira

Gipuzkoako Foru Aldundiak dei egiten die herritarrei, bai eta lurraldeko entitate, gizarte eragile, enpresa eta erakundeei ere, maiatzaren 15etik 25era ospatuko den Euskaraldiaren edizio berrian aktiboki parte hartzera. Foru Aldundiko bozeramaile Irune Berasaluzek azpimarratu du ekimen hau euskararen erabilera bultzatzeko aukera berri bat dela, eta parte hartzen dutenak animatu ditu esperientzia honetaz gozatzera eta hizkuntza ohituren eraldaketan aurrera egitera. "Euskara delako, aniztasunean, komunitate gisa kohesionatzen gaituen balio nagusietako bat", adierazi du.

Horrela, foru-erakundeak izena eman du Euskaraldian eta dagoeneko erakunde gisa parte hartzeko prestatzen hasi da, gaur Diputatuen Kontseiluan partekatu diren helburuen ildotik eta Gipuzkoako erreferentziazko erakunde gisa. Aldundiak paper aktiboa hartuko du edizio honetan, bere helburu estrategikoekin eta euskararen erabilera sustatzeko konpromisoarekin bat etorriz. Gainera, Euskararen Erabilera Planari lotutako departamentuen arteko Ekintza Plana garatzeko esparruan, Foru Gobernuak berretsi egin du erakundearen barruan hizkuntza ohituren aldaketak modu jasangarrian finkatzeko konpromisoa.

Berasaluzek gogorarazi du Aldundiaren helburu estrategikoetako bat bere jarduera “euskaraz eta euskaratik” garatzea dela, eta erakundeak hizkuntza ardatz izanda anbizioz jarduteko duen konpromisoa azpimarratu du. "Euskaraldiak ahalegin partekatu horri bultzada berri bat emateko aukera ematen digu, eta Aldundia horretan buru-belarri murgilduko da", amaitu du.

Fellows Gipuzkoa, deialdi berria

Gobernu Kontseiluak Fellows Gipuzkoa programaren aurtengo deialdia ere onartu du gaur. Programa hori Gipuzkoa Talent estrategiaren barruan funtsezko ekimena da, eta lurraldean talentu ikertzailea erakartzea, garatzea eta atxikitzea du helburu. Deialdiak 480.000 euroko zuzkidura du, bi urtetan banatuta (2025 eta 2026), eta aukera emango du ikertzaileak Gipuzkoako zentroetan sartzeko Zientzia, Teknologia eta Berrikuntzaren Euskal Sarean.

Irune Berasaluze Aldundiko bozeramaileak azpimarratu duenez, "Gipuzkoak argi dauka talentua dela gure etorkizuna eraikitzeko zutabeetako bat, ikerketaren bidez biharko ekonomiaren sektore estrategikoetan dugun posizioa bultzatzeko. Talentua erakarri eta gure ehun ekonomikoa indartuko duten jarduera ekonomiko berriak sortzeko erreferente izan nahi dugu. Ikerketaren bikaintasuna, ezagutzaren aurrerapena bultzatzeaz gain, berrikuntzaren, lehiakortasunaren eta ongizatearen motorra ere bada gizarte osoarentzat. Deialdi berri honekin, Gipuzkoan kualifikazio handiko pertsonak erakartzeko eta sendotzeko aukera ematen digun eredu bat indartzen jarraitzen dugu, eta horien ezagutza funtsezkoa izango da etorkizuneko erronkei aurre egiteko ".

Programak, 2016tik martxan dagoenak, ikerketaren arloan kualifikazio handiko profesionalak izateko beharrari erantzun nahi dio, funtsezko faktorea baita bikaintasun zientifikoa, enpresa berrikuntza, enpresa berrien garapena eta komunitatearen ongizatea hobetzeko. Fellows Gipuzkoak nazioartean prestigioa duten zentroetan esperientzia lortu duten ikertzaileen integrazioa errazten du, ikerlari horiek Gipuzkoara itzultzea edo bertan geratzea sustatuz.

Berasaluzek azaldu duenez, “ekimenaren azken helburua profesional horiek Gipuzkoan jarraituko dutela bermatzea da. Horregatik, programak hiru urtera arteko jarraipena eskaintzen du”. Gainera, akordio bat egin da Ikerbasque - Zientziarako Euskal Fundazioarekin, bigarren urtearen ondoren ikertzaileak ebaluatzeko eta Fellows Gipuzkoan hirugarren urtea amaitu ondoren erakunde horren programetan sartzea errazteko.

"Gure ekosistema zientifikoa eta teknologikoa sendotu behar ditugu, eta bermatu behar dugu talentua duten pertsonek beren gaitasunak garatzeko espazio bat izango dutela hemen. Programa honekin, aukera bat emateaz gain, ezagutzan eta ikerketan oinarritutako garapen eredu baten alde egiten dugu ", nabarmendu du Berasaluzek.

Artisautzaren alorrari bultzada

Gaur, artisautza sektorea sustatzeko dirulaguntzen programarako oinarri arautzaileak eta 2025eko deialdia onartu dira. 466.600 euroko zuzkidurarekin, ekimen honek artisautzaren jasangarritasun ekonomiko eta soziala indartu nahi du, “lurraldearen nortasun kulturalerako funtsezko jarduera”, hain zuzen.

“Artisautza gure kulturaren adierazpen bizia da, belaunaldiz belaunaldi transmititu den ondarea, sormenez eta maisutasunez eboluzionatzen jarraitzen duena. Balio artistikoa ez ezik, gure ondarea eta jarduera ekonomikoa ere bada. Laguntza horiekin, Gipuzkoa aberasten duen eta gure babes osoa merezi duen sektore batekin dugun konpromisoa berresten dugu ”, azaldu du foru bozeramaileak.

Programa hau Aldundiaren 2024-2027 Dirulaguntzen Plan Estrategikoaren barruan kokatzen da, eta sektorearen profesionalizazioa bultzatzea, ikusgarritasuna hobetzea eta epe luzerako bideragarritasuna bermatzea du helburu. Gainera, artisautza jardueraren ikuspegi sozial, kultural eta ekonomikoak integratu nahi ditu, garapen jasangarrian lagunduko duten lankidetza, antolaketa eta sustapen ereduak sustatuz.

Onartutako oinarri arautzaileek ezartzen dute laguntzak artisau-produktuak sortzeko, ekoizteko eta banatzeko izango direla, hala ikuspegi tradizionaletik, nola ikuspegi garaikidetik. Halaber, deialdiaren zenbatekoa handitzeko aukera aurreikusten da, eskabideak ebatzi aurretik erabilgarri dagoen aurrekontuaren arabera.

Diputatu nagusiaren bidaia AEBetara

Eider Mendoza Gipuzkoako diputatu nagusiak, Ane Insausti Ekonomia Sustapeneko eta Proiektu Estrategikoetako diputatuarekin batera, Lehendakaria buru duen Estatu Batuetarako bisita instituzionalean parte hartzen du. Ekonomia eta enpresa izaera nabarmeneko agenda baten barruan, “funtsezko une batean, AEBtako administrazioa aldatuta eta nazioarteko testuinguru ekonomiko berriarekin, misio honek euskal eta gipuzkoar erakunde eta enpresen presentzia indartu nahi du merkatu estrategikoetan, arreta berezia jarriz etorkizuneko sektoreetan, hala nola konputazio kuantikoan eta bioteknologietan”, Berasaluzek azaldu duenez.

New Yorkeko egonaldian, Mendozak enpresa eta teknologia arloko eragileekin egingo dituen bilerak gidatuko ditu. Agendako mugarri nabarmenen artean, martxoaren 12an, asteazkena, ordezkaritzak CURE bisitatuko du, bioteknologiaren eta osasun berrikuntzaren inkubagailua, soluzioen garapena bultzatzen duena, fase kontzeptualetik hasi eta merkaturatu arte. Topaketa horri esker, sektorean egindako aurrerapenak zuzenean ezagutu ahal izango ditu, eta Gipuzkoarako sinergiak aztertu ahal izango dira, “gure lurraldean bioteknologiaren alde egin den apustu irmoari jarraituz, etorkizuneko sektore ekonomiko gisa”.

Era berean, diputatu nagusiak New Yorkeko Euskal Etxean euskal komunitateari egingo zaion harreran parte hartuko du, Lehendakariarekin eta beste euskal agintari batzuekin batera. Ekitaldia asteazken arratsalderako aurreikusita dago, eta diasporarekin harremanak estutzeko eta Gipuzkoaren eta Euskadiren bilakaera haiekin partekatzeko aukera paregabea izango da.

Martxoaren 13an, osteguna, IBMk New Yorken duen egoitza bisitatuko du Mendozak, BasQ estrategiaren barruan Donostian instalatuko den ordenagailu kuantikoaren proiektuaren aurrerapenak aztertzeko. Ordenagailu kuantikoaren proiektu honek Gipuzkoak abangoardia teknologikoan duen posizionamendua indartzen du, Europako konputazio kuantikoko erreferentziazko nodo gisa sendotuz, foru bozeramaileak gogorarazi duenez.

Azkenik, martxoaren 14an, ostirala, Mendozak bilera bat izango du Estatu Batuetan inplantazioak dituzten Gipuzkoako punta-puntako hamar bat enpresatako ordezkariekin, nazioarteko egoeraren eragina eta administrazio estatubatuarrak iragarritako arantzel-neurriak aztertzeko. “Funtsezkoa da testuinguru globaleko aldaketei aurrea hartzea eta gure enpresekin lan egitea, lehiakortasuna indartzeko eta Estatu Batuetako merkatu estrategikoetan duten presentzia sendotzeko”, azpimarratu du Irune Berasaluze foru bozeramaileak.