Aldundiak eta Lazkaoko Udalak beren estrategiak partekatu dituzte

Gipuzkoako diputatu nagusia Markel Olano eta Ainhoa Aizpuru, Ekonomia Sustapena, Landa Ingurunea eta Lurralde Orekako diputatua Lazkaon izan dira gaur, Felix Urkola alkatearen eskutik udalerrian dituzten proiektuak, egitasmoak eta erronkak bertatik bertara ezagutzen eta etorkizuneko ekonomiari bultzada emateko irizpideak finkatzen. Diputatu nagusiak iragarri du ezinbestekoa dela herrietara bertaratzea “udal ordezkariekin eta agente ekonomiko eta sozialekin batera bertako beharrak, proiektuak, ideiak eta estrategiak ezagutzeko”.

Goizean zehar udal ordezkariekin bildu dira Markel Olano eta Ainhoa Aizpuru, eta bertan, bi erakundeen arteko lankidetza uztartzeko asmoarekin, ideia, proiektu eta etorkizuneko estrategiak partekatu dituzte: “Gipuzkoa lurralde industriala da eta Goierrin eta Lazkaon nabarmena da sektore honen eragina eta pisua, bai jardun-ekonomikoan, baita familien egunerokoan eta herriaren martxa orokorrean ere”, azpimarratu du Markel Olanok.

Jarraian, Goierri Valley erakundeko kideek proiektuaren nondik norakoak azaldu dizkie foru ordezkariei, zuzendaritza batzordearen bileraren ondoren. Proeiktuaren sorreratik Foru Aldundiaren babesa jaso du eta Olanok adierazi du “Goierri Valley bezalako egitasmo bat lurraldean izatea benetan baliotsua da bertako enpresentzat, baita gipuzkoar guztiontzat ere. Industria produktiboa Gipuzkoako lehiakortasunaren ardatza da eta Goierriko eskualdean eraldaketa industriala aurrera eramatea du helburu proiektu honek”. Goierriko 50 enpresa baina gehiagorentzat industria-bazkide den egitasmoak laguntza eta babesa eskaintzen die, berrikuntzan, lehiakortasunean, kooperazioan eta nazioarteko lankidetzan oinarrituta. “Ezagutza partekatuan oinarritutako lehiakortasunean aurrera egiten jarraitzea da gure helburua, eta xede hori konpartitzen dugu Goierri Valley eta eskualdeko enpresekin”, gehitu du diputatu nagusiak.

Goierri Valley-ko ordezkariekin batera Leberri enpresa bisitatu dute Markel Olanok eta Ainhoa Aizpuruk, ekimenaren parte dena eta makina elektrikoen kalkuluan, diseinuan eta fabrikazioan diharduena. “Leberri enpresa etsenplu da berrikuntzan oinarritutako enpresa eredua daramatelako aurrera, puntako teknologia erabiliz eta etorkizuneko tendentziak aurreikusiz”, adierazi du diputatu nagusiak.

 

Egunarekin amaitzeko, Lazkaoko udaleko ordezkariekin batera bisitatu dituzte herriko hainbat txoko Olanok eta Aizpuruk, eta herrian eskuartean dituzten proiektuak ikusteko aukera izan dute, baita Txindoki Gerontologikoa bisitatzeko ere. Bertan, Diputatu nagusia pozik agertu da Goierri eskualdean egitasmo eta proiektuak aurrera doazelako eta “etorkizunean ere elkarlanean jarraituko dugulako”.