Aldundiak eta Zumarragako Udalak Eitzaga ingurua birnaturalizatuko dute

Horretarako, Gipuzkoako Foru Aldundiko Ingurumeneko eta Obra Hidraulikoetako Departamentuak 500.000 euro inbertituko ditu, kostu osoaren % 62,5. Gainerakoa, Zumarragako Udalak hartuko du bere gain.

Gipuzkoako Foru Aldundiko Ingurumeneko eta Obra Hidraulikoetako Departamentuak eta Zumarragako Udalak Zumarragako Eitzagako ibarbidea urbanizatzeko proiektua aurkeztu dute. Proiektu horrek hustubidearen ahalmena handiagotuko du, eta ingurumen-integraziorako aukera emango du, dagoen inguruaren arabera, eta Eitzagako ibarbidea berreskuratuko du.

Gaur egun, Eitzagako ibarbidea erreka batek zeharkatzen du, eta ubide hori, gehienbat, hormigoizko hodi baten bidez bideratzen da. Hori arazo bikoitza da. Alde batetik, hodiaren sekzioak trabatzeak eragin ditzake euri-aldietan arrasteak pilatzearen ondorioz, eta horrek ingurua urez betetzea eragin dezake. Bestalde, ibilgua ez dago ingurumen-espazio gisa, lurpean baitago. Egoera hori konpontzeko, José Ignacio Asensio Ingurumen diputatuak eta Mikel Serrano Zumarragako alkateak lankidetza hitzarmena sinatu dute obra egiteko.

Eitzagako ibarbidearen urbanizazio proiektuak gaur egun intubatuta dagoen erreka-zati bat azaleratuko du, ingurunea naturalizatuz eta ibarbidea ingurumenaren aldetik berreskuratuz, eta, aldi berean, aipatutako ubidearen ingurua urbanizatuko du.

Obra bi fasetan egingo da. Lehenengoan, ubidea azaleratzeaz gain, saneamendu-hodi berri bat egitea aurreikusten da proiektuan. Bigarren fasean, urbanizazio-lanak egitea aurreikusten da, espazioari hiri-pake baten parkeko hirigintza-antolamendua emateko. Helburu hori agerikoa da ingurumenaren aldetik, orain lurpean doan erreka bat azaleratzeko. Lanek 9 hilabeteko obra-epea izango dute, lehen faserako 5 hilabetekoa eta bigarrenerako 4 hilabetekoa. Horretarako, Gipuzkoako Foru Aldundiko Ingurumeneko eta Obra Hidraulikoetako Departamentuak 500.000 euro bideratuko ditu guztira, Zumarragako Udalak bere gain hartuko dituen 300.000 euroz gain.

Horri dagokionez, Ingurumeneko eta Obra Hidraulikoetako diputatu José Ignacio Asensiok adierazi duenez, “jarduketa honi esker lortuko dugu erreka argitara ateratzea, ingurua birnaturalizatzea eta, horrekin batera, hiria berroneratzeko eta birgaitzeko jarduera bat egitea. Horrela, Zumarragako bizilagunek ingurune berri honetaz gozatu ahal izango dute”.

Bestalde, Zumarragako alkate Mikel Serranok adierazi duenez, “legealdi honetan Eitzako bizilagunekin hartutako konpromisoa egia bihurtzea lortu dugu, gutxi erabiltzen den eremu bat berreskuratuz, auzoaren ingurua duintzeko”.