Aldundiak 'Goxatu' programa indartu du Gipuzkoako egoitzetan

2020ko abenduan, COVID-19aren pandemiaren testuinguruan, Gipuzkoako Foru Aldundiak Goxatu programa sortu zuen, Gipuzkoako egoitzetan bizi diren adinekoen bizi-kalitatea eta ongizate psiko-emozionala ahalik eta gehien babesteko. 2021ean, programa indartu da egoitza-zentroetara kultura-jarduerak hurbildu eta bultzatzeko, "goxotasunetik, eragile sozial eta komunitarioekiko lankidetza oinarri hartuta, eta musikaren bidez aisialdi aktiboa bultzatzeko eta adinekoen ongizatea hobetzeko helburuarekin", adierazi du Maite Peña Gizarte Politikako diputatuak.

"Goxatu programak Gabonei begiratzeaz gain, denboran irauteko bokazioa du". Diputatuak azaldu duenez, 2020ko abenduan, txertoak iritsi aurretik, aktibatutako neurriak 2021 osoan zehar mantendu dira, hala nola, fisioterapiako, terapia okupazionaleko eta laguntza psikosozialeko ratioen igoera, bisiten eta irteeren gehikuntza eta normalizazio progresiboa, laguntza komunitarioa areagotzea, eta kultura-arloko jardueren hedapena, 90 musika-kontzertu eta bertsolaritza-saio baino gehiagorekin.

Ildo horretan, bisitak eta irteerak "normaltasunez, baina zuhurtzia osoz" egiten ari diren honetan, Aldundiak egoitzetako kultur jarduera indartu du berriro, 28 musika eta dantza emanaldirekin, "Gabonetan egoitzetan egiten diren ohiko jardueren osagarri", azaldu du diputatuak.

2020ko abenduarekin alderatuta, "egoitzetan askoz egoera normalizatuagoa bizi dugu, neurri handi batean txertaketari esker, egoiliarren %96tik gorakoa dena, baina birusak hemen jarraitzen du"; horregatik, harremanak, kultura eta musika jarduerak indartzea "ezinbestekoa" da. "Gabonak berotasun, maitasun eta hurbiltasun garaia izan arren, birusak gure artean jarraitzeko, komunitatean eragin kezkagarria du, eta isla izaten ari da egoitza-zentroetan ere". Hori dela eta, Maite Peñak azpimarratu du “ezin diogula erne egoteari utzi", eta segurtasunaren eta ongizate emozionalaren arteko oreka bilatzearen alde egin du: “Egoitzak komunitatearekin konektatutako espazioak dira, bisitekin, sarrerekin eta irteerekin; horregatik, ezinbestekoa da prebentzioan sakontzen jarraitzea eta arduraz eta zuhurtziaz lan egitea ".