Aldundiak Toki Alai ikastxeeko jolastokiaren eraldatze ekologikoa bultzatu du, berdintasuna eta jasangarritasuna sustatzeko

Jolastokia berritzean, lorategi-eremuak, atsedenlekuak eta jolas kooperatiboak gehitu dira, eta ingurune berdeagoa eta orekatuagoa sustatu da. Gainera, irisgarritasuna hobetzeko oztopo arkitektonikoak ezabatu dira eta espazioa berdintasun-irizpideekin birdiseinatu da, jolasguneetan generoaren araberako bereizketa saihestuz.

José Ignacio Asensio: “Eskola-eremuak berroneratzea funtsezkoa da ikaskuntza-ingurune jasangarriagoak eta berdinzaleagoak sustatzeko, ikasle guztiek bete-betean gozatu eta garatu ahal izan dezaten. Horrelako proiektuek hezkuntza-komunitateari mesede egiten diote, eta txikitatik ingurumen-kontzientziazioa indartzen dute”.

José Ignacio Asensio Jasangarritasuneko diputatuak, Cristina Laborda Irungo alkaterekin eta Miriam Oca Gipuzkoako Foru Aldundiko Ingurumen Administrazioko zuzendariarekin batera, Irungo Toki Alai ikastetxea bisitatu du, jolastokia eraldatzeko proiektua zuzenean ezagutzeko. Proiektu hori, neurri batean, Gipuzkoako Foru Aldundiko Jasangarritasun Departamentuak emandako 11.000 euroko dirulaguntzari esker finantzatu da.

Iritsi direnean, Otsanda Tolosa ikastetxeko zuzendariak eta Amaia García eta Ane Jurado pedagogia-berrikuntzako arduradunek hartu dituzte, eta ekimen honek hezkuntza-komunitatearentzat duen garrantzia azaldu dute. Gainera, DBHko ikasleak arduratu dira jasotako laguntzarekin gauzatutako proiektuak aurkezteaz, eta beren eskola-ingurunean izan duten eragin positiboa nabarmendu dute.

Toki Alai ikastetxeak ikuspegi inklusiboa eta berrikuntza pedagogikoarekiko konpromisoa ditu ezaugarri. Emandako dirulaguntzarekin, eskolako jolastokia hobetzeko proiektu bat garatu dute, espazio irisgarriagoa, berdeagoa eta inklusiboagoa sortzeko, ikasleen berdintasuna eta ongizatea sustatzeko. Orain arte, jolastokiak berdegune gutxi zituen, eta genero-estereotipoak betikotzen zituen diseinua, futbola bezalako jolas-espazioak lehenesten baitzituen, beste jarduera batzuen kaltetan.

Jolastokiaren diseinu berriak lehentasuna eman dio ikasle guztien bizikidetza eta jolas librea ahalbidetuko duten berdeguneak eta funtzio anitzeko espazioak sortzeari, haien generoa edo interesak edozein direla ere. Elementu naturalak txertatu ditu, hala nola lorategi-eremuak, atsedenguneak eta jolas kooperatiboak, ingurune orekatuagoa eta jasangarriagoa sustatzeko. Gainera, espazioaren irisgarritasunean lan egin da, eta ziurtatu da haur guztiek, mugikortasun murriztua dutenek barne, baldintza berdinetan gozatu ahal izango dutela instalazioez.

Patioan instalatutako ekipamendu berrien artean, nabarmentzekoak dira plastiko birziklatuz egindako piknik-mahaiak; parkour-moduluak, barnean plastiko birziklatuzko kuboak dituztenak eta zurezko oholtza ziurtatuz estaliak; harmailak, plastikoa eta zura konbinatzen dituen polimeroz eraikiak; eta eskalada-presak, erretxinaz eginak. Aldaketa hori egiteaz Kimubat enpresa arduratu da, bere proiektuetan material ekologiko eta birziklagarrien erabileran espezializatua.

José Ignacio Asensiok azpimarratu duenez, “hau bezalako eskola-eramuak berroneratzea funtsezkoa da ikaskuntza-ingurune jasangarriagoak eta berdinzaleagoak sustatzeko, non ikasle guztiek gozatu eta erabat garatu ahal izango duten. Horrelako proiektuek hezkuntza-komunitateari mesede egiten diote, eta txikitatik ingurumen-kontzientziazioa indartzen dute”. Foru-arduradunak gaineratu duenez, “Aldundiak jasangarritasuna eta ekitatea sustatzen dituzten proiektuak babesten jarraituko du gure ikastetxeetan, funtsezkoak baitira hezkuntza-eredu bidezkoago eta ingurunearekiko errespetutsuago baterantz aurrera egiteko”.

Guztira, Jasangarritasun Departamentuak 200.000 euro bideratu ditu 2025ean Gipuzkoako hainbat ikastetxetarako dirulaguntzetara, eskola-espazioen jasangarritasunarekin eta ingurumen-hobekuntzarekin bat datozen hezkuntza-proiektuak bultzatzeko. Laguntza horien helburua da eskola-komunitatean eragin zuzena sortzea eta hezkuntzan jasangarritasunaren eta ekitatearen arloko sentsibilizazioa sustatzea.

Ekimen horrekin, Toki Alai BHIk inklusioaren, ekitatearen eta ingurumenarekiko errespetuaren aldeko apustua egiten duen hezkuntza-ereduarekiko konpromisoa indartzen du, hezkuntza berritzaileagoa eta egungo erronketara egokituagoa lortzen lagunduz. Eskolako jolastokiaren eraldaketak erakusten du ekintza txikiek aldaketa handiak eragin ditzaketela ikasleen bizi-kalitatean eta gizarte bidezkoago eta jasangarriago baten eraikuntzan.