Azahara Domínguez diputatua Andoni Zuriarrain Berastegiko alkatearekin bildu da, udalekin egiten ari den bilera-sortarekin jarraituz

Mugikortasuneko, Turismoko eta Lurralde Antolaketako diputatua, Azahara Domínguez, Andoni Zuriarrain Berastegiko alkatearekin bildu da, udalekin egiten ari den bilera-sortarekin jarraituz, bere departamentuari eragiten dioten gaiak jorratzeko.

Topaketan, herri horretako garraio publikoaren zerbitzuaren egoerari buruz hitz egin dute. Izan ere, kokapenagatik, Tolosarako mugikortasun-fluxuak ditu, baina baita Nafarroarakoak ere, eta Udalak konexioak hobetu nahi baititu, batez ere Leitzarakoak eta Donostia eta Iruñea artekoak.
Ildo horretan, diputatuak gaia Nafarroako Gobernuarekin landu duela jakinarazi du, Udalaren eskaerak datorren urtean egingo den zerbitzuaren lizitazioan sar ditzaten, eta alkateak lan hori eskertu egin dio.
Gainera, bi erakundeek Lurraldebusen bidez Berastegiko konexioa Tolosaldeko udalerriekin nola hobetu aztertu dute. Zehazki, Azahara Domínguez buru duen sailak Tolosarekin lotzen duen 7: 15eko zerbitzuaren erabiltzaileei buruzko datuak aztertuko ditu, gazte askok erabiltzen baitute Tolosako institutura joateko, linea indartzea beharrezkoa den ikusteko.
Gainera, aurten lanentzen hasiko den Tolosaldeko emakida berriari begira, lineen ordutegiak zabaltzea aurreikusten da, ikasleek eta langileek beren betebeharretara  garraio publikoan irits daitezen ibilgailu pribatuaren mende egon gabe.
"Oso kontziente gara garraio publikoak duen garrantziaz, udalerri txikietako bizilagunek beren bizitzako alderdi desberdinak garatu ahal izan ditzaten, hiriekin edo eskualdeburuekin alderatuta aukera-berdintasunean. Horregatik, funtsezkoa da udalerri horien errealitatea ezagutzera hurbiltzea eta bertako alkateekin batera lan egitea, guztion artean herritarren benetako beharretara egokitzen den zerbitzua eskaintzeko. Horrela, pertsona guztien mugikortasun jasangarrirako eskubidea bermatzeaz gain, ibilgailu pribatu bat erostera behartuta ez egotea bermatzen dugu, eta familia askok ez baitute horretarako sarbiderik; horrez gain, landa-guneetako biztanleriari eusten laguntzen dugu, hori funtsezkoa da eta garraio publikoak protagonismo handia du horretan", adierazi du Azahara Domínguez diputatuak.
Bestalde, Andoni Zuriarrain Berastegiko alkateak honako hau adierazi du: “Berastegin eta tolosaldean garraio publikoa indartzeko beharrak antzemanak ditugu eta garraio publikoan aldeko apustua egiteko zerbitzua zabaldu eta egokitu beharra dago. Gure kokapena dela eta beste maila bateko arazoak ere baditugu garraio aldetik, Nafarroarekin muga egiten du gure herriak, zehazki Leitzarekin eta ez dugu garraio publikoko komunikaziorik. Bi herrien arteko lotura indartzeko ezinbestekoa litzateke garraio publiko egoki baten aldeko apustua egitea eta horretarako erkidego ezberdinen arteko lankidetza eskatzen dugu, eskualdean behar berdina Araitz bailara Gipuzkoarekin lotzeko daukagu. Iruñea eta Donostia lotzen duen garraio zerbitzuaren eskaintza ere hobetzeko lanean ari gara dagoeneko”.

Lankidetza turismoaren arloan
Berastegiko Udalak urteak daramatza naturari eta lehen sektoreari lotutako gaiak lantzen, Berastegi Herri Kuttuna markaren babespean. Hain zuzen ere,besteak beste Be Asteburua ekimenaren bitartez, artzain-kulturari balioa ematen diote, baita arkumea edo gazta bezalako produktuei. “Gazta eta artzain kultura oinarri hartuta Berastegin parte-hartze prozesu bitartez landu duten Turismo proposamena berritzailea bezain egokia dela ikusten dugu”, adierazi du alkateak.
Zentzu horretan, Azahara Domínguez diputatuak gogorarazi du Mugikortasuneko, Turismoko eta Lurralde Antolaketako Departamentuaren apustu estrategikoak turismo-eredu berri bat ezartzea eskatzen duela, jasangarria izateaz gain birsortzailea ere izango dena, eta horrek esan nahi duela "turismo-jarduerak eragin positiboa izatea gure lurraldean eta gure herritarrengan". Be Asteburua proposamena, "ezin hobeto egokitzen da turismo eredura eta Gipuzkoara erakarri nahi dugun bisitari motara", berretsi du Azahara Domínguezek, eta prest agertu da ekimen honetan zein modutan lagundu dezakeen ikusteko.