Azahara Domínguez diputatuak Gipuzkoako Turismo Mahaia deitu du New Yorkera egindako bidaiaren emaitzak azaltzeko eta Turismoko Plan Estrategiko berriaren definizioan aurrera egiteko

Mugikortasuneko, Turismoko eta Lurralde Antolaketako diputatu Azahara Domínguezek New Yorkera egin berri duen bidaiaren emaitzak azaldu dizkie Gipuzkoako Turismo Mahaiko kideei. Mahaia ostegun honetan bildu da Debako Hiru Uhinak hotelean. Lau izarreko ostatua da, joan den abenduan ireki zena, bederatzi apartamentu eta 20 gela dituena eta eskualdearentzat lehen mailako ostatua dena.
Turismo Mahaiak egin duen bigarren bilera da, joan den azaroan diputatuak foro hori berpiztu ondoren. Foro hori erakundeetako, eskualdeetako, ostatu-sektoreko, ekitaldietako, biltzar-zentroetako eta gure lurraldeko beste aktibo turistikoetako ordezkariek osatzen dute, ia sei urtez deitu gabe egon ondoren.
Alazne Txurruka alkatea izan da bertan, Mahaia osatzen duten pertsonei ongietorria emateko arduraduna. Diputatuak AEBn egon zen egunetan egin dituen ekintzen errepasoa egin du, eta sektorearekin partekatu ditu merkatu horretan sortutako zuzeneko harremanak. Ekainetik aurrera, Gipuzkoatik inoiz baino gertuago egongo da, New York eta Loiuko aireportuaren arteko hegaldi zuzena izango baitu. Gainera, Turismoko Plan Estrategiko berriaren ardatzak zehazten jarraitu da.

Aro turistiko berria
Azahara Domínguezek azaldu duenez, "aro berri" baten aurrean gaude turismoaren panoraman eta egiten diren sustapen-politika publikoen diseinuan. "Gure turismo-enpresen negozio-aukerak hobetzea da gure helburua, haien lehiakortasuna handitzeko. Pauso bat eman behar dugu azken bezeroarenganako sustapenetik harago, eta plataforma bat eskaintzen hasi behar dugu gure agentziek jatorrizko merkatuetan sortutako zuzeneko kontaktuak eskura izan ditzaten, merkataritza-harremanen kudeaketa erraztuz eta, horrela, gure enpresen eraginkortasun operatiboa hobetuz ", adierazi du diputatuak. "Gure helburua kalitatezko turistak eta negoziokoak erakartzea da, eta horiek sartzen dira nagusiki agentzietan", gaineratu du.
Testuinguru horretan, bere departamentua merkatu berriak sustatzera bideratuta dagoela azaldu du, eta egindako bidaiari esker, Gipuzkoako eta AEBetako "operadore turistikoen artean harreman zuzenak itxi dira".

Interes handiko merkatua
Diputatuak Gipuzkoako joera turistikoen azterketa egiteko aprobetxatu du jardunaldia, eta 2024a industria honentzat "oso urte positiboa" izan zela gogorarazi du. Hotel-establezimenduetako sarrerak % 5,1 gehitu ziren, eta emaitza ekonomikoak, enplegua eta soldatak hobetu egin ziren sektorearen barruan.
Hazkunde horrek turismoa Gipuzkoako ekonomiaren eragile nagusietako bat bezala finkatu zuen, lurraldeko BPGaren % 8,4 suposatuz. Gainera, 2024a turismo-industriari lotutako 5.600 enpresa-establezimendurekin itxi zen, eta urteko hirugarren hiruhilekoan 39.434 pertsona afiliatu ziren Gizarte Segurantzan.
Gipuzkoako turismorako testuinguru historiko horretan, nazioarteko bisitariak % 53 izan ziren gure hotel-ostatuetan. Frantzia izan zen merkatu nagusia, eta ondoren AEB, goraldian dagoen merkatua eta, gainera, gure lurralderako "interes handikoa", hainbat arrazoirengatik. Adierazi duenez, turista amerikarraren batez besteko egonaldia 7,7 gauekoa da, eta horrek "Gipuzkoako batez besteko egonaldia nabarmen igotzen lagun dezake". Gainera, bidaiari horien eguneroko batez besteko gastua 300 euro ingurukoa da (Japoniako turistek bakarrik gainditzen dute), eta ostatuan, gastronomian, erosketetan eta kultura-jardueretan banatzen dute; horrek esan nahi du "hainbat sektoretarako diru-sarrerak sortzen direla". Era berean, "ingurumena eta tokiko biztanleak errespetatzen dituzten praktika turistikoak" sustatzen dituen publikoa da, eta horrek gure lurraldeko "baliabide naturalak eta kulturalak babesten" laguntzen du. Zentzu horretan, "benetako eta kalitate handiko esperientziak bilatzen dituzte", eta horrek "gama altuko zerbitzuak eta produktuak bultzatzea eragiten du, turismoaren kalitate orokorra hobetuz”. Azkenik, "merkatua dibertsifikatzen duen turista da, sektorearen erresilientzia handituz gorabehera ekonomikoen aurrean".

Prestakuntza-jardunaldiak
Estatu Batuetan sortutako zuzeneko harremanez gain, New Yorken hasitako lanak jarraipena izango du Gipuzkoan. Bertan, sektorea osatzen duten enpresek online prestakuntza-jardunaldi batzuk jasoko dituzte, merkatu amerikarrari buruz duten ezagutza eta New Yorkeko merkatuan jarduteko gako batzuk sakontzea ahalbidetuko dietenak. Saiook, sektore guztiarentzat irekiak, New Yorkeko Tourespañako zuzendari Magi Castelltorten eta New York City & Convention Bureauko ordezkari baten eskutik eskainiko dira.
"Postako lurraldea baino askoz gehiago gara, eta, horregatik, funtsezkoa da Gipuzkoako turismo-industria osatzen duten agenteen eskutik lan egitea, merkatu berriekin harremanak ezartzeko behar dituzten tresnak eman diezazkieten, eta, horri esker, helmuga gisa definitzen gaituzten jasangarritasun- eta bikaintasun-estandarrak mantenduz hazi ahal izango gara", amaitu du Azahara Domínguezek.
Bestalde, Debako alkate Alazne Txurrukak adierazi du "ohorea" dela bere udalerrian Gipuzkoako Turismo Mahaiaren bigarren bilera hartzea, "Mahai hau gure lurraldeko turismo sektoreko eragileen arteko lankidetza sendotzeko funtsezko espazioa baita”. “Debatik kalitatezko turismo iraunkorraren aldeko apustu irmoa egiten dugu, gure enpresei aukera berriak eskuratzen laguntzeko eta Gipuzkoa erreferentziazko turismo helmuga gisa bultzatzen laguntzeko", gehitu du.