Azahara Dominguez diputatuak Errenteriako Koldo Mitxelena HLHIko jolastokia estaltzeko lanetarako 200.000 euroko laguntza bideratu du

Azahara Dominguez, Mugikortasuneko, Turismoko eta Lurralde Antolaketako diputatua: "Aldundiak konpromiso irmoa du Oarsoaldearekin, badiaren ehun ekonomikoa, urbanistikoa eta soziala biziberritzeko. Gipuzkoaren lurralde kohesioaren eta orekaren aldeko apustu irmoa da”. 

Azahara Domínguez buru duen Mugikortasuneko Turismoko eta Lurralde Antolaketako Departamentuak 192.000 euroko zuzeneko dirulaguntza eman dio Errenteriako Udalari, Pasaiako badia biziberritzeko bi erakundeen artean egin diren hitzarmenen esparruan.  Akordioaren helburua da udalerriaren hiri-berrikuntza sustatzea eta ingurune "atseginago, irisgarriago eta inklusiboago" baterantz aurrera egitea.

Diputatuak azaldu duenez, hitzarmenak 192.000 euroko zuzeneko dirulaguntza ematen du, Koldo Mitxelena HLHIko jolastokia estaliko duen egitura bat eraikitzearen ondoriozko inbertsioen kostua finantzatzen laguntzeko. Obraren kostu osoa 600.000 eurotik gorakoa da, eta Udalak eta Eusko Jaurlaritzak ordainduko dute. Jarduera honen helburua da herriak herritarrentzat atseginagoak, irisgarriagoak eta inklusiboagoak diren ekipamenduak izatea.

Azahara Domínguezek azpimarratu du bere departamentuak konpromisoa hartu duela Pasaialdean programa integral bat garatzeko, hondatutako hiri-espazioak eta ekipamenduak epe labur eta ertainean berreskuratzeko. "Aldundiak konpromiso irmoa du Oarsoaldearekin, badiaren ehun ekonomikoa, urbanistikoa eta soziala biziberritzeko. Gipuzkoaren lurralde kohesioaren eta orekaren aldeko apustu irmoa", azpimarratu du. 

Ildo horretan, gogorarazi du Errenteriako Udalak 4,5 milioi euro inguru jaso dituela azken legegintzaldietan hiri-berrikuntzako, bidegorrien eraikuntzako, irisgarritasuna hobetzeko azpiegituretako eta herriko hainbat auzotako ekipamendu publikoetako jarduketetarako. 

"Oarsoaldea biziberritzeko konpromiso ekonomikoa legegintzaldi honetan zehar mantenduko da. Izan ere, aurrekontu-proiektuak 10 milioi euroko partida aurreikusten du horretarako. Ziur nago inbertsio hori inguruko udalerriak berroneratzeko motorra eta traktorea izango dela, eta, aldi berean, enplegua sortzeko aukera bat izango dela. Ezin dugu ahaztu langabezia-tasa altuak dituen eskualde bati buruz ari garela, eta ni, sozialista naizen aldetik, gehien kezkatzen nauen gaietako bat da, eta horretan aritu nahi dut", amaitu du.