Donostia martxan kalte zerebralaren alde

Igande honetan, hilak 16, hartutako kalte zerebrala duten pertsonen aldeko martxa solidarioaren bigarren edizioa egingo da Donostian. Gipuzkoako Hartutako Kalte Zerebralaren Elkarteak (ATECE GIPUZKOA) antolatu du ekimena, Gipuzkoako Foru Aldundiko Zainketa eta Gizarte Politiketako Departamentuaren eta Donostiako Udalaren laguntzarekin

Martxa 11:00etan abiatuko da, Alderdi Ederreko lorategietatik (Donostiako udaletxearen aurrean) Perlaraino, eta hasierako tokira itzuliko da. Bertan, sariak banatuko dira parte-hartzaileen artean. Ibilaldian batukada bat egongo da ibilbidea animatzeko.

Ekitaldia prentsaurrekoan aurkeztu dute Maite Peña Gipuzkoako Foru Aldundiko Zainketa eta Gizarte Politiketako diputatuak eta José Manuel Amador ATECE Gipuzkoako presidenteak.

Biek azaldu dute inskripzioak irekita daudela eta herritar guztiei zuzenduta daudela, adin-mugarik gabe. Herrikrosa.eus orriaren bidez egin daitezke dagoeneko. Inskripzioa egiten duenak kamiseta bat jasoko du, hornidura egongo da, eta babesleen eta laguntzaileen opariak zozketatuko dira. Lortzen diren funtsak elkarteak antolatutako jarduerak hobetzeko erabiliko dira.

Aurkezpenean, Maite Peñak adierazi du ATECEk, duela 30 urte baino gehiago familia talde baten ekimenez sortu zenetik, «atsedenik gabe» lan egiten duela ehunka pertsona eta familiaren bizitza hobetzeko, "diziplinarteko arretaren bidez, ematen duten laguntza eta arreta pertsona bakoitzak behar duena delako, oso talde heterogeneoa delako eta premia oso desberdinak dituelako". Gainera, ATECEk egindako deiarekin bat egin du, eta pertsona guztiak animatu ditu gaur goiz solidario honetan parte hartzera, helburua baita "hartutako kalte zerebrala duten pertsonen errealitatea ikusaraztea eta ezagutaraztea".

Bestalde, José Manuel Amadorrek adierazi duenez, "iazko arrakastaren ondoren, asko pozten gaitu aurten berriz martxa egiteak. Helburua da Gipuzkoan hartutako kalte zerebrala duten ehunka pertsonek eta beren familiek bizi duten errealitatea ikusaraztea, horren inguruan kontzientziatzea eta sentsibilizatzea».

"Donostiako, Gipuzkoako eta beste edozein lekutako herritar guztiak parte hartzera animatzen ditugu. Bide batez, eskerrak eman nahi dizkiegu Gipuzkoako Foru Aldundiari eta Donostiako Udalari, kalte zerebrala duten pertsonak ikusarazteko eta haiei laguntzeko ekimenetan laguntzeagatik. Babesleei eta laguntzaileei ere eskerrak eman nahi dizkiegu ".

KALTE ZEREBRALARI BURUZ

Hartutako kalte zerebrala (HKZ) da pertsona baten garunaren funtzionamenduak bat-bateko afektazioa izatea, inolako aurreko kalte zerebralik gabe, kanpoko lesio bat jasanda, adibidez traumatismo kraneoenzefaliko bat, edo barneko lesio bat, adibidez, iktus bat, meningitisa, garuneko tumore bat edo garuneko anoxia bat (garunean oxigenorik gabe geratzea).

Kalte zerebralaren ondorioek pertsonaren osotasunari eragiten diote, eta mugimenduaren defizitak izan ohi diren arren deigarrienak, arazo kognitibo, emozional, konduktual, sentsitibo eta sentsorialak ere eragin ditzake.