Donostiak bat egin du Naturklimarekin klima aldaketaren aurkako borrokan

Donostiako Udala Naturklima Fundazioan sartu da, tokiko klima-politikak bultzatzeko eta garapen-eredu jasangarriagoa sustatzeko.

José Ignacio Asensio: “Hiriek eta udalerriek funtsezko zeregina dute trantsizio ekologikoan. Tokikotik, neurri zehatzak eta eraginkorrak ezar ditzakegu, emisioen murrizketan eta klima-aldaketaren ondorioetara egokitzean eragin zuzena izango dutenak”.

Naturklimak, Gipuzkoako Klima Aldaketaren Fundazioak eta Donostiako Udalak lankidetza-hitzarmen bat sinatu dute, bi erakundeek klima-aldaketaren aurkako borrokan duten konpromisoa indartzeko. Naturklimako presidente José Ignacio Asensiok eta Donostiako Udaleko Aniztasun, Inklusio eta Ingurumeneko zinegotzi Iñigo Garcíak sinatutako hitzarmenak lankidetza-esparrua ezartzen du jasangarritasunaren eta trantsizio ekologikoaren arloan baterako jarduerak garatzeko.

Donostiako Udala Naturklimaren erakunde laguntzaile gisa atxiki ondoren, lankidetza-etapa berri bat ireki da, klima-aldaketa arintzeko eta klima-aldaketara egokitzeko tokiko estrategiak bultzatzera bideratua. Hitzarmenean jasotako ekintza-ildoen artean, energia-komunitateak sustatzea, ekonomia zirkularra bultzatzea eta klima-aldaketaren ondorioen aurrean hiri-erresilientzia hobetzea nabarmentzen dira. Era berean, naturan, mugikortasun jasangarrian eta udal-eraikin eta -azpiegituretan energia-efizientzian oinarritutako irtenbideak garatzea sustatuko da.

José Ignacio Asensiok azpimarratu duenez, akordio horrek “indartu egiten du erakundeen arteko lankidetza-sarea, lurralde jasangarriago eta erresilienteago baterantz aurrera egiteko”. Asensiok, gainera, klima-aldaketaren erronka globalari aurre egiteko toki-eremutik jardutearen garrantzia azpimarratu du: “Hiriek eta udalerriek funtsezko zeregina dute trantsizio ekologikoan. Tokikotik, neurri zehatzak eta eraginkorrak ezar ditzakegu, emisioen murrizketan eta klima-aldaketaren ondorioetara egokitzean eragin zuzena izango dutenak”.

Bestalde, Iñigo Garcíak aliantza horren garrantzia azpimarratu du eta adierazi du: “Donostiako Udala Naturkliman inplikatzeak herritarrei eta ingurune naturalari mesede egingo dieten proiektu berritzaileak garatzea ahalbidetuko duela. Donostia Naturklima Fundazioan sartzeak funtsezko urratsa markatzen du Gipuzkoan ingurumen jasangarritasunarekin dugun konpromisoan. Lurraldeko hiriburu gisa, Gipuzkoako Foru Aldundiarekin batera eraldaketa ekologiko erreal eta eraginkorra bultzatuko duten ekimenak gidatzeko eta babesteko erantzukizuna hartzen dugu. Lankidetza horren bidez, gainerako erakundeekin dugun koordinazioa indartzen dugu, gure ekintzen eragina maximizatzeko, bikoiztasunak saihestuz eta sektore publikoaren, pribatuaren eta herritarren arteko sinergiak sustatuz. Donostiako Udaletik ausardiaz lan egingo dugu aliantza hori proiektu zehatz bihur dadin, gure hiria eta lurraldea jasangarritasunean eta klima aldaketaren aurkako borrokan erreferente izan dadin”.

Hitzarmenak, gainera, ingurumen-sentsibilizazioko eta -hezkuntzako baterako ekintzak abian jartzea jasotzen du, bai eta berotegi-efektuko gasen emisioak murrizten eta lurraldea etorkizuneko klima-erronketara egokitzen lagunduko duten azterlanak eta proiektuak garatzea ere. Ekintza horiek herritarrei zuzendutako informazio-kanpainak, ikastetxeetako hezkuntza-programak eta zientzia-dibulgazioko ekitaldiak barne hartuko dituzte.

Akordioaren beste helburu giltzarrietako bat gizarte-, ekonomia- eta ingurumen-eragileekin parte hartzeko eta hitz egiteko espazioak sortzea da, klima-aldaketaren eremuan estrategiak koordinatzeko eta baterako ekimenak sustatzeko. Ildo horretan, topaketa-foroak, tailerrak eta lan-jardunaldiak bultzatuko dira gizarte zibilarekin, enpresekin eta ikerketa-zentroekin, ezagutzak eta jardunbide egokiak partekatzeko.

Era berean, Naturklimak eta Donostiako Udalak energia-trantsizioaren eta klima-egokitzapenaren eremuan proiektu berritzaileak ezartzeko finantzaketa erakartzeko lan egingo dute, erakundeen arteko lankidetza eta jasangarritasunerako inbertsioa indartzea ahalbidetuko duten Europako eta nazioko programetan dauden aukerak aztertuz.

Akordio horrekin, Naturklimak eta Donostiako Udalak Gipuzkoa berdeago, erresilienteago eta XXI. mendeko klima-erronkei aurre egiteko prestatuago dagoen batekiko konpromisoa indartzen dute. Lankidetza horri esker, lurraldearen eraldaketa ekologikoa bizkortu ahal izango da, eta jasangarriagoa den eta ingurumena errespetatzen duen garapen-eredu baterantz aurrera egin.