Gazteentzako euskarazko ikus-entzunezkoen ekoizpena sustatzeko lehiaketa abiaraziko du Foru Aldundiak

Hi gazte! lehiaketa antolatuko du Gipuzkoako Foru Aldundiak, Etorkizuna Eraikiz-en baitan, gazteek euskarazko ikus-entzunezkoak sortzeko, euskarazko youtuber komunitatea eratzeko eta euskarazko edukiak kontsumitzeko helburuarekin. UPV/EHUk Aldundiarentzat eginiko ikerketa baten arabera, gaztelania da nagusi Gipuzkoako gazteek kontsumitzen dituzten ikus-entzunezko edukietan, eta ingelesa ondoren, egun euskaraz eduki gabezia handia dago-eta. “Ia ez da gazteentzako sare sozialetarako edukirik ekoizten euskaraz eta hutsune horri erantzuteko abiarazi nahi izan dugu esperimentazio dinamika hau. Euskara eremu berrietara eraman behar dugu, eskaintza interesgarri eta erakargarria ahalbidetuz”, azaldu du Imanol Lasa foru bozeramaileak.

Abiapuntu horrekin, azarotik martxora iraungo du lehiaketak, eta gazteek egindako ikus-entzunezkoak sarituko ditu. Youtuben hainbesteko arrakasta lortu duten ‘challenge’ horietako bat egingo dute. Parte hartzaileak lau edo bosteko taldetan antolatutako ikasleak izango dira eta euskarazko bideo fresko eta entretenigarriak igo beharko dituzte Youtubera. Modu horretan, gazteak bideogintzan trebatzeaz gain, haientzat erakargarriak diren edukiak zintzilikatuko dituzte sarean eta, asmoa ‘challenge’-a hilero errepikatzea denez, behin eta berriz elikatuko da Youtube euskarazko edukiez. 

Bideoen zabalkundea egiteko eta ikusleen aldetik ahalik eta babes handiena lortzeko, Instagram kontu bat irekiko da eta ikasleek kontu hori erabili ahal izango dute beren ekoizpenaren promozioa egiteko. Halaber, Instagram hoberen erabiltzen duen taldeak ere saria jasoko du. Martxoan izango da sari banaketa, eta horiek jaso ahal izateko, nahitaezkoa izango da bideoak Youtubera hilero igotzea.

Topaketak

Lehiaketaren harira, lurraldeko hainbat ikastetxerekin Aldundiko Etorkizuna Eraikiz Gunean topaketak egitea da asmoa, sarerako ikus-entzunezko edukiak nola sortu behar diren ikasteko aukera izan dezaten. Formakuntza teorikoa jasoko dute Kepa Errasti gidoigile eta aktorearen eta Iban Garcia youtuberraren eskutik eta, gidoigintza eta kamera aurrean nola jardun behar duten azaltzeaz gain, ekoizpenerako oinarriak ere zein diren erakutsiko diete ikasleei. Halaber, grabazioa, post-produkzioa eta zabalkundea nola egiten den ere azalduko diete. Saio praktikoa ere egingo dute, gazteen eskura utzi baitira grabatzeko bitartekoak.  Haatik, lehiaketara aurkezteko ez da beharrezkoa izango Aldundiaren topaketetan parte hartu izana, euskaraz sortu duen edonork izango baitu bideoak aurkezteko aukera.

Esperimentazio dinamika Debagoieneko Arizmendi ikastolako DBH4ko 40 bat ikaslerekin hasi da, pilotu gisa. Gaur izan dute amaiera topaketa. Joseba Usabiaga aktoreak hitzaldia eskaini die, eta bideorik onenak sarituak izan dira bertan. Eskerrak eman, eta parte hartzera animatu ditu Imanol Lasak lurraldeko gazteak: “Ekimen honek osagai eder asko uztartzen ditu, gure hizkuntza hauspotzeko eta etorkizunera bidean jartzeko: teknologia berriak, gaztetasuna, formakuntza eta sormen partekatua. Ikus-entzunezko produktuen kontsumoa gero eta handiagoa da eta testuinguru horretan euskararen presentzia handitzea ezinbestekoa bilakatzen da, erabilera areagotzeko. Era berean, euskal kultura eta identitatearen transmisioa bermatu nahi dugu”, amaitu du.