Gipuzkoa Open Future_ etorkizuneko sektoreetan talentua eta ekintzailetasuna bultzatzeko

Gipuzkoako Foru Aldundiak eta Telefonicak gaur sinatutako hitzarmenaren bidez, start up eta enpresa-egitasmoek Open Future_ programaren –teleko digital honek sortutako berrikuntza irekiko ekosistema– testuinguruan garatutako aukerak baliatu ahalko dituzte. Bi erakundeek indarrak batu dituzte egitasmo honetan, lurralderako “estrategikoak diren etorkizuneko sektoreetan”, zibersegurtasuna, gastronomiaren digitalizazioa, mugikortasun jasangarria eta biozientzietan, alegia, talentua eta ekintzailetasuna bultzatu asmoz.

Ekonomia Sustapena, Landa Ingurunea eta Lurralde Orekako diputatuak, Ainhoa Aizpuruk, eta Telefonicaren Iparraldeko Zonaldeko zuzendari nagusiak, Javier Zorrillak, gaur firmatu dute bi erakundeen arteko hitzarmena. Akordioa datozen asteetan garatzeko konpromisoa hartu dute eta horretarako berrikuntza irekiko prozesuak abiaraziko dituzte. Ekimen horietako bakoitzean gipuzkoar enpresek negozio-desafioak proposatuko dituzte, ekintzaile, start up eta ETEen parte-hartzea bultzatuz, beti ere Open Future_ plataforma eta metodologia euskarri gisa hartuta. Aurreikusita dagoenez, lehendabiziko negozio-desafioek gastronomia eta biozientzien alorrak –medical devices direlakoak, zehatzago esanda– jorratuko dituzte eta alor horietako enpresa egitasmoak azeleratzeko balioko dute.

Lurraldeko etorkizuneko politikak diseinatu eta martxan jartzea helburu duen Etorkizuna Eraikiz egitasmoaren testuinguruan, Ekonomia Sustapena, Landa Ingurunea eta Lurralde Orekako departamentuaren egitekoa da lehenago aipatutako sektore estrategikoetan aurrerapausoak ematea, epe ertain eta luzera begira Gipuzkoako ekonomia indartzea helburu. RIS-3 espezializazio adimentsuan lerrokatzen diren apustuak dira, zibersegurtasuna, gastronomiaren digitalizazioa, mugikortasuna jasangarria eta biozientziak, alegia.

Foru erakundearen sektore estrategiko horien aldeko apustua, Ainhoa Aizpuruk jakinarazi duenez, ez da mugatzen deialdietara, eta horregatik “alor estrategiko horiekin lerrokatutako proiektuak lehenesten” ari da Ekonomia Sustapeneko departamentua. “Gaur Telefonicarekin sinatzen dugun hitzarmen honek aukera berri bat zabaltzen du norabide horretan, Open Future_ potentzial handiko programa baita, talentua sustatzeko eta etorkizuneko sektore horietan guztietan enpresa proiektu berrien dinamizazioa bultzatzeko”, adierazi du.

Telefonicaren Iparraldeko Zonaldeko zuzendari nagusiak azaldu duenez, Gipuzkoa Open Future_ egitasmoak uztartzen ditu, batetik, Gipuzkoako Foru Aldundiak teknologia berriekin zerikusia duen talentua erakarri eta kalitatezko enplegua sortzeko duen interesa, eta, bestetik, enpresek beren prozesuak digitalizatzeko duten beharra. Javier Zorrillaren esanetan, “administrazioekin dagoeneko sinatu ditugun akordioek erakusten duten moduan, Open Future_ programak ere helburu horiek bultzatzen ditu”.

Telefonica Open Future_ egitasmoari buruz

Berrikuntza eta negozio aukerak bultzatzea xede, mundu osoko ekintzaile, start up, inbertsore eta bazkide pribatu eta publikoak konektatzen dituen plataforma globala da Telefónica Open Future_. Bere helburua da talentuaren garapena babestea bere hazkunde etapa guztietan, erakunde, inbertsore eta enpresak batzen dituen azelerazio eta konexioen bitartez.

Programa honetan integratzen dira Telefonica taldeak martxan dituen berrikuntza irekiko, ekintzailetasuneko eta inbertsiorako programak (Think Big, Talentum Startups, Crowdworking, Wayra, Fondos de inversión Amérigo, Fondos corporativos Telefónica Ventures), nazioarteko sare baten bitartez. Sare hau kanpoko bazkideentzako zabalik dago, beren ekintzailetasun eta inbertsio estrategia garatu ditzaten eta enpresa handiekin konektatzeko modua egin dezaten. Orain arte 54.000 proposamenetik gora aztertu dira, 765 start up-ek jaso dute finantziazioa eta 1.700 proiektu azeleratu dira. Telefonica Open Future_ 17 herrialdetan dago eta 455 milioiko inbertsioa egiteko konpromisoa du bere kolaboratzaileekin batera. Informazio gehiago hemen: https://www.openfuture.org