Gipuzkoak ia zero kontsumoaren eta eraikin publikoak birgaitzearen aldeko apustua egiten du

Mónica Pedreira: «Beharrezkoa da energiaren gizarte ikuspegi bat, non lehentasunak diren, batetik, klima, eta, bestetik, pobreziaren nahiz zaurgarritasun energetikoa murriztea».

Gipuzkoako Foru Aldundiko Ingurumeneko Departamentuak eta Usurbilgo Lanbide Eskolak jardunaldi tekniko bat egin dute Usurbilgo Lanbide Eskolako instalazioetan: «Ia zero kontsumorantz eta eraikin publikoak birgaitzerantz». Jardunaldi hau Aldundiak eta Usurbilgo Lanbide Eskolak urtero sinatzen duten hitzarmenean aurreikusitako ekintzetako bat da, aurrezteko, energia-eraginkortasuneko eta energia berriztagarrietako neurrietan prestakuntza, zabalkunde eta sentsibilizazioko lankidetza-sistema bat antolatzeko.

Isidro Zaldua Usurbilgo Lanbide Eskolako zuzendariak jardunaldiaren aurkezpena egin du. Jarraian, Ingurumeneko zuzendari Mónica Pedreirak eman dio hasiera topaketari, aurten egindako hirugarren jardunaldi teknikoari. Bere hizketaldian, zuzendariak azpimarratu du beharrezkoa dela energiaren ikuspegi sozial bat izatea, lehentasunak honako hauek izango dituena: klima eta pobreziaren eta ahultasun energetikoaren murrizketa. Pedreirak gaineratu duenez, «ezinbestekoa da eraginkortasun energetikorantz jotzea eta energia berriztagarrien iturriak eta tokiko sorkuntza-sareak gehiago garatzen eta hedatzen saiatzea».

Ondoren, Nagore Azuabarrenak, COAATGko presidenteak, 4/2019 Legearen testuingurua eta osasuna eta eraikinak azaldu ditu. Bestalde, EHUko ikertzaile-doktore den Alexander Martín-Garín andreak eraikin publikoen azterketa energetikoan oinarritu du bere hitzaldia. Peter Albrecht-ek (A-O Arquitectos) birgaitze energetikoan duen esperientzia zabaldu du. Eta, azkenik, EAGIko zuzendari Lidia Alcerrecak azaldu du zer eskaini dezakeen Euskadiko Lanbide Heziketak eraldaketa horretan.

Une honetan, Gipuzkoako Foru Aldundiko Gobernu Kontseiluak aintzat hartu ditu partaidetzazko deliberazio-prozesuan –zeina Gipuzkoako 2050erako Jasangarritasun Energetikoaren Estrategia lantzeko prozesuan jarraitu baita–  lortutako emaitzak, eta energia aurreztea eta efizientzia energetikoa, zalantzarik gabe, eredu eraginkor baten oinarrian daude, hau da, energia eredu eraginkor baten oinarrian.

Eraikin berriek eta birgaitzen direnek, energia efizientzia handikoak izateaz gain, eraikinean bertan sortutako energia berriztagarria, ibilgailu elektrikoak kargatzeko guneak eta elkarri lotutako aplikazio adimendunak izan beharko dituzte. Eraikuntzaren kontzeptu berri bat da, eta, gainera, erabateko aldaketa dakar eraikinetan energia erabiltzeko moduan. Helburua da eraikin guztiak ia batere energiarik kontsumitzen ez duten eraikin bihurtzea, betiere bideragarria eta ekonomikoa bada.

Era berean, egoitza-sektorearen birgaitze energetikoa Aldundiaren klima- eta energia-estrategien palanka handienetako bat da. Estrategia horietan, azken 5 urteetan lan handia egiten ari gara, eraikin publikoen deskarbonizaziorantz aurrera egiteko, hain zuzen ere. Gipuzkoako Foru Aldundiak 35 eraikin publiko inguru kudeatzen ditu. 2015-2019 urteen artean egindako esku-hartzeei esker, horien kontsumoa % 9 murriztea lortu da, 32.000 MWh-tik 29.000 Mwh-ra.

Murrizketan eta efizientzian lan egiteaz gain, Ingurumeneko Departamentuak energia hori iturri berriztagarrietara bideratzeko ere lan egiten du. Izan ere, 35 eraikinetatik 13k eguzki-energia fotovoltaikoan oinarritutako energia berriztagarriko sistemak dituzte jada, eta 6 eraikinek eguzki-energia termikoko sistemak eta sistema geotermikoetan oinarritutako 4 eguzki-instalazio dituzte.

Eraikinei dagokienez, nabarmentzekoa da Gipuzkoako Klima Aldaketaren Fundazioaren eraikina, gaur egun eraikitzen ari dena. ZERO kontsumoko eraikina izango da, eta Passivhaus-en estandarren arabera eraikiko da.