Gipuzkoako egoitzetan ez da inor hil asteburuan, ezta positibo berririk eman ere

Gipuzkoako egoitzetan ez da COVID-19agatik hildakorik izan asteburuan, ezta kasu positibo berririk eman ere. Bestalde, adinekoen egoitza zentroetan sendatu diren lagunak 45 dira dagoeneko, Donostiako Alai-Etxe egoitzan dauden bi pertsonak alta epidemiologikoa jaso ostean.

Gipuzkoako egoitza-sarea 65 zentrok eta 5.425 plazak osatzen dute eta, egun, COVID-19an positibo eman duten egoiliarrak bost zentrotan daude: Hernaniko Santa Maria Magdalena (9), Errenteriako Jesusen Bihotza (4), Donostiako Alai-Etxe (25), Bergarako Mizpirualde (23) eta Donostiako La Paz (1). Beraz, 62 COVID-19 kasu positibo daude Gipuzkoako egoitzetako erabiltzaileen artean.

10 dira ospitale-arreta behar duten eta ospitaleratuta dauden pertsonak, eta beste 30 Eibarko Ospitaleko gizarte-solairuan artatuak ari dira izaten, Gipuzkoako egoitzetatik eratorritako COVID-19 kasuen arretarako erreferentzia-zentroan. Abuztuaren 11n lehen positiboa atzeman zenetik, 45 adinekok gainditu dute gaixotasuna eta 25 pertsona hil dira.