Gipuzkoako Foru Aldundia Gizarte Segurantzarekin bilduko da erretiratutako baserritarren isunen aurrean irtenbidea bilatzeko

Xabier Arruti, Lurralde Oreka Berdeako diputatuak bilera bat eskatu die Gizarte Segurantzako agenteei, beren produktuak azoketan saltzen dituzten baserritar erretiratuei ezarritako isunen aurrean. Topaketa honen helburua da zehapen horien testuingurua baloratzea eta aztertzea, eta jarduera hori bermatzeko irtenbide bat bilatzen saiatzea. Xabier Arrutik adierazi duenez, “gaur egun badaude alternatibak erretiratuen kolektiboak jarduera ekonomikoak modu osagarrian egiten jarraitu ahal izateko ‘erretiro aktibo gisa’”. “Zoritxarrez”, gaineratu du, “gaur egun diseinatuta dagoen moduan ‘erretiro aktibo’ honek ez du egoera konpontzen, gutxieneko pentsio bat jasotzen duen kolektiboa baita”. Ildo horretan, “gure baserritarren errealitatera hobekien egokitzen den formula bilatzen saiatuko gara, Gipuzkoan astero egiten diren nekazaritza-merkatuetan gure lurraldeko produktuen salmenta bideragarria izaten jarraitu dadin” esan du Arrutik. “Gure aldetik, Gizarte Segurantzari eskua luzatuko diogu, arlo horretako eskumena berak baitu, gure errealitatearekin bateragarria den akordio batera iritsi ahal izateko”.

“Azalera handietako supermerkatuetako prezioen gerrak, klima-aldaketak eta landa-inguruneko biztanleriaren jaitsierak kalte egiten diote sektore horren biziraupenari”, Arrutik dioenez. Gainera azpimarratzen du “gure baserritarrei eguneroko bizitzan laguntzeko eta sustatzeko lan egin behar dela, jardueraren belaunaldi-erreleboan lan egiten den aldi berean”. Hala, “ezarritako zehapenak beste traba bat direla eta bideragarritasuna arriskuan jartzen dutela uste du”, eta “belaunaldien arteko erreleboa bultzatzen duten eta nekazaritza-jarduerari eusten dioten arauetan berriro pentsatzeko eta lan egiteko” deia egiten du,” gure azoketan hutsuneak sortzea saihesteko, izan ere, beste era batera horiek desagertzeko arriskua egongo litzateke, eta horrek, gainera, gure lurraldean garrantzi handiko gizarte-tradizioa galtzera eramango luke”.