Gipuzkoako Foru Aldundiak Mendaroko sarbideko zubia erabat berrituko du

Aintzane Oiarbide Bide Azpiegituretako diputatuak Mendaron aurkeztu du GI-3821 errepidean Deba ibaiaren gaineko zubia guztiz berritzeko aurreproiektua; azpiegitura horrek, egituran kalterik ez badu ere, konpondu beharreko patologia batzuk ditu. Azken proiektuaren idazketaren faltan, obraren aurreproiektuak 1.368.499,42 euroko kostua aurreikusten du, eta gauzatzeko epea 6 hilabetekoa.

          Diputatuak, Iñaki Arregi herriko alkatearekin batera azpiegiturara egin duen bisitan, zubi hori birmoldatzearen garrantzia azpimarratu du, gaur egun Garagartza auzorako sarbide bakarra baita, Mendaroko eskualdeko Ospitalea dagoen tokia. “Mendarok sarrera bakarra du herrigunera. Zubi horretatik baino ezin da iritsi, horrek dakartzan arriskuekin”, eta iazko abenduan Deba ibaiak gainezka egin ondoren herria erabat isolatuta geratu zenean gertatutakoa gogorarazi du. “Horregatik, Gipuzkoako Foru Aldundiak N-634 errepidetik herrira sartzeko beste sarbide bat eraikiko du, baina, bitartean, eraikuntza hori baldintza onenetan mantendu behar dugu”, diputatuak adierazi duenez.

          Iñaki Arregi alkateak nabarmendu du Mendarorentzako “apustu estrategikoa” dela Gipuzkoako Foru Aldundiak bultzatuko duen zubiaren eraberritzea: “Egun herrira sartzeko dugun bide bakarra da eta ezinbestekoa da egoera onean mantentzea herritar guztien segurtasuna eta Mendaroren ohiko jardun ekonomiko eta soziala bermatzeko. Are gehiago kontuan izanda Debabarrena eskualdeko ospitalea herri erdigunean dugula kokatuta. Zubi zaharraren eraberritzea eta etorkizun hurbilean garatuko den zubi berriaren eraikuntzak bultzada garrantzitsua emango dio Mendarori. Orain arte bezala, Gipuzkoako Foru Aldundiarekin elkarlan estuan jarraituko dugu herri hobe bat eraikitzen jarraitzeko”.

          Zubibidea da Deba ibaiaren bi aldeak lotzen dituen azpiegitura bakarra, eta hortik igarotzen dira ur-hornidura, Euskaltel, Telefónica edo Iberdrola bezalako zerbitzu asko. Aintzane Oiarbidek zehaztu duenez, obra konplexua izango da, eta, beraz, aurreproiektu bat idatzi behar izan da. Obraren konplexutasuna dator trenbidearen ondorioz mantendu beharreko galiboetatik, Deba ibaiari eragiten diolako, eta, batez ere, obrak trafiko irekiarekin egitea zaila delako. Aurreproiektuak beharrezko baimenen tramitazioan aurrera egiteko aukera ematen digu.

          Aurreproiektuan jasotako jarduketa zubia zabaltzean datza, ertz bakoitzean metalezko habe bana erantsiz, espaloiak egungo 1,3 metrotik 2 metrora handitu ahal izateko, bai eta eusteko sistema egoki bat ere. Metalezko egitura hori ebaketa-altzairuzkoa izango da, eta zubiaren bi muturretan bermatuko da, tarteko euskarri batekin, 40 eta 20 metro inguruko 2 bao sortuko dituena.

          Oiarbidek aurreratu duenez, egungo zubiaren birmoldaketak eta bigarren azpiegitura bat eraikitzeko proiektuak nabarmen hobetuko dute Mendaro udalerria, eta, gainera, Debabarreneko eskualde osoari mesede egingo dio, ospitalera bide-segurtasun handiagoarekin eta sarbide hobeekin hurbildu ahal izango baita. Ibilgailuen trafikorako bideaz gain, oinezkoentzako ibilbide bat ere aurreikusten da, ibaiaren bi ertzak lotuko dituena, eta jarduera hori oso garrantzitsua da mugikortasun iraunkorrerako.