Gipuzkoako gazteek ekonomia zirkularra bultzatu dute Hondakinen Prebentziorako Europako Astean

"Ekonomia Zirkularra Modelatuz" erakusketak gazteen sormena saritzeaz gain, ekonomia zirkularrak lurraldean duen eraldaketa-ahalmena nabarmentzen du.

José Ignacio Asensio: «Oso garrantzitsua da ekonomia zirkularraren ikuspegia gure gazteen hezkuntzan txertatzea, lurraldearen etorkizuneko talentua jasangarritasun-politiketan prestatzeko, aurrean ditugun ingurumen-erronkekiko kontzientzia eta sentsibilizazioa sortuz».

Gipuzkoako gazteen sormena eta ingurumen-konpromisoa nabarmentzeko ahaleginean, Gipuzkoako Foru Aldundiko Jasangarritasun Departamentuak "Ekonomia Zirkularra Modelatuz" erakusketaren bosgarren edizioa ospatu du, Hondakinak Prebenitzeko Europako Astearen barruan. Ekitaldi honen bidez, hondakinen prebentziorako eta kudeaketa egokirako Gipuzkoako gazteek abian jarritako ekintzak ikusarazi nahi dira, ekonomia zirkularra sustatuz.

Ekimenaren helburu nagusia da ekonomia zirkularraren filosofia zabaltzea Gipuzkoako lanbide-heziketako ikastetxeetako ikasleen artean. Gaur goizean egindako ekitaldian, José Ignacio Asensio Jasangarritasun diputatuak diplomak eman dizkie edizio honetan parte hartu duten bederatzi ikastetxeei.

Hauek izan dira saritutako zentroak: Azkoitiko Izarraitz, Oñati BHI, Zarauzko Oteitza Lizeoa, Donostiako Ortzadar, Hondarribiko Mendibil Prestakuntza Zentroa, Hernanilan, Mutrikuko Kardala, Elgoibarko Meka eta Irungo Plaiaundi BHI. Zentro horiek nabarmendu dira jardunbide jasangarriak sustatzeko eta hondakinen kudeaketa egokiari buruz kontzientziatzeko duten konpromisoagatik.

Ikastetxe horietako gazteek, irakasleen babesarekin, modu aktiboan parte hartu dute birziklatutako materialekin egindako eskulturen hausnarketan, diseinuan eta lanketan. Birziklatutako baliabideekin bakarrik sortutako lan hauek Donostiako Okendo plazan dagoen 'GK Recycling' karpan daude ikusgai.

Ekimen honen helburua sorkuntza artistikotik haratago doa, lurraldeko gazteak hondakinetatik abiatuta, produktu berriak fabrikatzeko baliabide eta lehengai gisa duten balioaz kontzientziatzea bilatuz. Sormenezko adierazpenaren bidez, ikasleak ekonomia zirkularraren kontzeptura hurbiltzen dira, ikuspegi jasangarri eta arduratsua sustatuz.

José Ignacio Asensio Jasangarritasun diputatuak "ekonomia zirkularraren ikuspegia gure gazteen hezkuntzan txertatzearen" garrantzia azpimarratu du. Era berean, lurraldearen etorkizuneko talentua jasangarritasun-politiketan trebatzeko beharra azpimarratu du, aurrez aurre ditugun ingurumen-erronkekiko kontzientzia eta sentsibilizazioa sortuz.

Ekonomia zirkularra, Jasangarritasun Departamentuaren helburu estrategikoetako bat, hondakinak murrizteko eta hondakin horiek lehengai gisa erabiliko dituen sektore ekonomiko berri bat sustatzeko bide gisa aurkezten da. Gaur egun, sektore horrek 6.500 lanpostu sortzen ditu Gipuzkoan, 1.425 milioi euroko fakturazioarekin, BPGri ekarpen nabarmena eginez eta Gipuzkoako ekonomian 650 milioi eurotik gorako eragin zuzena izanez. Zenbaki horiek ingurumen-jasangarritasunarekiko konpromisoa ez ezik, tokiko garapen ekonomikorako funtsezko ekarpena ere islatzen dute.