Goizane Álvarez eta Azahara Domínguez diputatuek Azpeitiko Mendietxe museoa bisitatu dute Alex Txikonekin batera

Goizane Álvarez eta Azahara Domínguez diputatuek Azpeitiko Mendietxe museoa ezagutzeko aukera izan dute Alex Txikon alpinistaren eskutik.
Bisita instituzionalean, diputatuek, Eusko Jaurlaritzako Turismoko sailburuorde Jakes Arrizabalagarekin eta Eusko Jaurlaritzako Turismoko zuzendari Clara Navasekin batera, Euskadin parekorik ez duen museo "bakar" batekiko interesa erakutsi dute.
Mendietxe Azpeitiako esklaboen komentuan dago eta bisitariak Euskal Herriko eta nazioarteko alpinismoaren ibilbide zoragarrian murgiltzen ditu, kirolariek espedizioetan erabilitako argazki eta objektu pertsonalen bilduma handi baten bidez. Erakusketa honek planetako tontor desafiatzaileenetara egindako espedizioetako batzuk definitu dituzten taldeak, esperientziak eta une garrantzitsuenak ezagutzeko aukera ematen du, protagonisten ikuspegitik.
Goizane Álvarezek, Kultura eta Kirol diputatuak, Alex Txikonek proiektu honekin egin duen "lan handia" eskertu du. "Mendietxe gure herriak mendiarekiko eta alpinismoarekiko duen pasioaren isla bizia da. Aldundiko Kultura eta Kirol Sailetik gune hau indartu nahi dugu, gure memoria alpinistikoa babesteko. Gipuzkoa alpinista handien sorlekua da, eta museo honek haien lorpenak eta bizipenak zuzenean ezagutzeko aukera ematen du", adierazi du.
Bestalde, Mugikortasuneko, Turismoko eta Lurralde Antolaketako diputatu Azahara Domínguezek nabarmendu duenez, "Mendietxe bezalako museoek gure lurraldeko eskaintza turistikoa aberasten dute argi eta garbi, eta, gainera, fluxu turistikoak desestazionalizatzen eta deslokalizatzen laguntzen dute, kasu honetan, Azpeitia eta Urola Erdia eskualdea bere osotasunean mendia maite dutenen mapan jarriz". Azahara Domínguezek gogorarazi du naturari lotutako turismoa oso segmentu garrantzitsua dela Gipuzkoako industria turistikoaren barruan, eta horregatik ospatu du Alex Txikonek bere museorako Gipuzkoa aukeratu izana. "Erakusketa hau ezin hobeto egokitzen zaio Mugikortasuneko, Turismoko eta Lurralde Antolaketako Departamentutik bultzatzen dugun turismo-estrategiari, eta guretzat hain garrantzitsuak diren balioak sustatzen laguntzen digu, hala nola ingurunearen eta ingurumenaren zaintza eta turismo-jardueraren eta bizilagunen arteko bizikidetza", adierazi du.
Alex Txikon alpinista eta Mendietxeko sortzaileak gogorarazi duenez, "Mendietxe ez da piezen bilduma bat edo argazki erakusketa bat bakarrik; alturekiko pasioari, naturarekiko loturari eta mendizaletasunaren historia markatu duten objektuei egindako omenaldia da". "Istorioak kontatzen dituzten piezak dira, partekatu nahi ditudan istorioak. Gainditze pertsonaleko mendizaletasun esentzia bat. Eta mendiak eman didanari omenaldia ere bada, eta espazio honetan eskertu eta itzuli egin nahi dut jendeak hogei urte baino gehiagoan transmititu didan maitasun eta babes hori guztia, lasai goza dezala mendia, artea eta kultura batu diren museo honetako xehetasun eta txoko bakoitzak ", gaineratu du.
Azkenik, Maitane Azurmendi museoko zuzendariak azpimarratu duenez, "Alexek, bere bikaintasun eta errebeldian, mendiari buruzko ikuspegi bat aurkezten digu Mendietxe Museoan, ez bakarrik alpinista bezala, baizik eta bere aurrekoen ondarea maite duen bezala".