Hondarribiko aireportuak marka guztiak hautsi ditu aurten, konexio guztiak mantenduko ditu 2024an eta Edinburgokoa gehituko zaio

Hondarribiko aireportuak urte historiko gisa itxiko du 2023a, ia milioi erdi erabiltzailerekin eta datorren maiatzetik aurrera abian jarriko den Edinburgorako lotura berri batekin. Gainera, Gipuzkoako azpiegituraren lotura guztiak 2024an mantenduko dira.

Hala jakinarazi dute ostegun honetan, Donostian egindako prentsaurreko batean, Azahara Domínguez Mugikortasuneko, Turismoko eta Lurralde Antolaketako diputatuak, Javier Zubia Gipuzkoako Bazkundeko zuzendari nagusiak eta Diego Acuña British Airwayseko ordezkariak.

Azahara Dominguez Mugikortasuneko, Turismoko eta Lurralde Antolaketako diputatuak oso balorazio positiboa egin du.  "Hondarribia gero eta erabiltzaile gehiagori zerbitzu handiagoa ematen dien aireportua da, baina, era berean, gero eta erakargarriagoa da Gipuzkoaren aldeko apustua egiten duten airelineentzat. "Erakundeok lanean jarraitu behar dugu Hondarribia erreferentziazko aireportua izan dadin, ez bakarrik gipuzkoarrentzat, baita bisitatzen gaituztenentzat ere. Ezin dugu ahaztu azpiegitura indartsu bat izateak aukera ematen digula helmuga turistiko gisa hobeto kokatzeko, eta, gainera, aberastasun-iturri ukaezina dela, zuzeneko lanpostuak sortzeaz gain, zeharka ere sortzen baititu".

Era berean, gogorarazi du berak gidatzen duen departamentua aireportura doan garraio publikoa hobetzeko lanean ari dela. "Lurraldebusek Oarsoaldean eta Bidasoan duen zerbitzuaren lizitazio berri bat jarri dugu martxan, eta, beste berrikuntza batzuen artean, Donostiaren eta aireportuaren arteko zuzeneko lotura aurreikusten du, Hondarribiaren aldeko apustuak, nahitaez, eskatzen baitu garraio publikoaren bidez konexioak hobetzea". "Benetan uste dut garraio publikoaren zerbitzua bultzatzea dela Gipuzkoa bidezkoago bat eraikitzeko modurik onena", azpimarratu du.

Marka guztiak hautsi dituen urtea

Zubiak azaldu ditu Gipuzkoako aireportuak 2023an izan dituen zifrak; ia milioi erdi erabiltzaile izatera iritsi da.

"2023. urtean aireportuak marka guztiak hautsiko ditu: bidaiarien errekorra, ia 500.000, konpainien errekorra Iberia, Volotea, Vueling, Binter eta Britis Airways-City Flyer konpainiekin, eta helmugen errekorra Madril, Bartzelona, Sevilla, Valentzia, Malaga, Kanaria Handia eta gainerako uharteekin, Palma, Menorca, Londres eta orain Edinburgorekin", nabarmendu du Zubiak.

"Gipuzkoak, turismo helmuga gisa duen interesa da arrakasta horren gakoetako bat, eta horri gehitu behar zaizkio industriaren garrantzia, konektibitatearen beharra eta Gipuzkoako gizartearen eskaria bera, interes handiz erantzun baitie aire-konpainiek eskaintzen dituzten hegaldi-aukerei", nabarmendu du Zubiak.

"Gipuzkoak duen interesa da arrakasta horren gakoetako bat, eta horri gehitu behar zaizkio industriaren garrantzia, konektibitatearen beharra eta Gipuzkoako gizartearen eskaria bera, interes handiz erantzun baitie aire-konpainiek eskaintzen dituzten hegaldi-aukerei", bukatu du Gipuzkoako Bazkundeko zuzendari nagusiak.

Gipuzkoa, indartu beharreko helmuga

Azkenik, Diego Acuñak Gipuzkoa nabarmendu du British Airways airelinearen helmuga gisa.  ““London Cityko hegaldiaren bi urteko esperientzia oso ona izan da, eta Gipuzkoarekiko konektibitatea handitzeko oinarria ezarri dute. 2019an lehen elkarrizketak hasi genituenean, Gipuzkoa helmuga turistiko potentzial on gisa ikusten genuen, eta orain indartu beharreko errealitate gisa hartzen dugu”, esan du Acuñak. Gipuzkoako Foru Aldundiak, Eusko Jaurlaritzak eta Ortzibiak erakutsitako hurbiltasuna eta interesa eskertu du bukatzeko.