Koldo Mitxelena Kulturuneko Ataria guneak gaurtik aurrera Egile(ak) zikloko bi erakusketetako lehena hartuko du

Gaur arratsaldean, Egile(ak) zikloko «Bidegurutzeak / Itinerarios comunes» erakusketa inauguratuko da Santa Teresa komentuko Ataria espazioan, Koldo Mitxelena Kulturunaren egungo egoitzan. Erakusketak Gipuzkoan bizi eta lan egiten duten Ainhoa Goenaga, Maddi Zumalabe, Nagore Amenabarro, Sara Ayesa eta Viviane Straub artisten lana erakusten du.

Ainara Martinek komisariatutako erakusketa honek arte plastikoen kategorian Egile 2023 saria irabazi zuten bost artista horien prozesua du ardatz. Sari hori 2021ean sortu zen, Gipuzkoako Foru Aldundiko Kultura Departamentuaren ekimenez, arteak eta kultura sustatzeko, Gipuzkoan gizarte eraldaketarako motor gisa, sormen prozesuak bultzatzeko eta talentu artistikoa sustatzeko.

Goizane Álvarez Kulturako diputatuak adierazi duenez, «Egile(ak) erakusketak berriro martxan jarrita, Kultura Departamentuak eta Koldo Mitxelena Kulturuneak helburu bikoitza lortu nahi dute. Alde batetik, ikusgarritasuna ematea sari hau lortu duten sortzaileei, eta, bestetik, Santa Teresa komentuan espazio bat eskaintzea artearen eta sormenaren alorrari».

«Bidegurutzeak / Itinerarios comunes» erakusketak ibilbideari buruzko ideia bat artikulatzen du. Erakusketa osatzen duten artista guztien obran agertzen bada ere, kasu bakoitzean berezitasun batetik ematen da, eta interesak eta kontzeptu desberdinak (argia, natura, hondakin itsusia, pintura bitarteko gisa eta kasualitatea) igarotzen diren moduari egiten die erreferentzia. Bost sortzaileek, beren arte hizkera partikularretik, bizitza garaikidearen erdigunean dauden gaiei buruz hausnartzen dute: zaintzak, natura eta jasangarritasuna, indibidualtasuna eta bizikidetza, nortasunaren eraikuntza eta bizitzeko modua.

Bestalde, erakusketako lanek sormen prozesuen garrantzia aldarrikatzen dute, emaitzen gainetik baitaude. Artistak paisaian barrena ibiltzen dira, eta materialak biltzen dituzte. Material horiek, ondoren, pieza berri bihurtzen dituzte, eta espaziora itzultzen. Aldi berean, eta formatu, material eta proposamen oso desberdinetatik abiatuta, sortzaile guztiek beren proiektu sarituak eta beren prozesuen zati bat aurkezten dituzte. Gainera, kasu batzuetan site specific obrak egin dira.

Erakusketaren inaugurazio ekitaldia gaur arratsaldean izango da, 19:00etan, KMKko Ataria espazioan, Santa Teresa komentuan. Bertan, erakusketa osatzen duten Gipuzkoako bost artistak izango dira, eta, gainera, koktel bat emango da. Sarrera librea eta doakoa izango da, baina edukiera 80 lagunera mugatuta dago.

Erakusketa abuztuaren 4ra arte bisitatu ahal izango da, asteartetik larunbatera 17:00etatik 20:00etara eta larunbatetan eta igandeetan 11:00etatik 14:00etara. Astelehenetan itxita egongo da.

Bigarren erakusketa bat abuztuan

Arestian aipatutakoaz gain, abuztuaren 9an Egile(ak) zikloaren bigarren erakusketa inauguratuko da, «Gutxi esan, asko jolastu / Decir menos, jugar más». Ilustrazioaren eremuan lan egiten duten bost emakumeren obrek osatuko dute: Ane Arzelus, Arrate Rodriguez, Irene Irureta, Maite Caballero eta Sandra Garayoa. Oraingo honetan, jolasa da erakusketa lotzen duen kontzeptua, eta aukera emango du obrak editatuta daudenean soilik ikusi ordez jatorrizko formatuetan ikusteko eta, beraz, liburu formatuan aurkezten dira.

Erakusketa irailaren 8ra arte egongo da zabalik, eta aurrekoaren ordutegi berean bisitatu ahal izango da.

KMK-k, beraz, bi erakusketa horien bidez Egile(ak) zikloa berreskuratu du. Ziklo horren lehen edizioa Ganbara aretoan egin zen 2022an, KMK-ko Urdaneta kaleko egoitza oraindik irekita zegoenean. Espazio horretan Irati Cano Alkain, Gari Arambarri eta Ainize Sarasola artisten hiru erakusketa indibidual izan ziren, hain zuzen ere, hurrenez hurren ikus-entzunezko, eskulturako eta marrazkigintzako kategorietan Egile sariak jaso zituztenenak.