Gipuzkoako esperientzien opari-kutxak Gipuzkoa Turismoa HUB-ean salgai

Datorren astelehenetik, abenduaren 27tik, Gipuzkoako esperientzia-kutxak Gipuzkoa Turismoaren hub bulegoan (Camino kalea 1, Donostia) erosi ahal izango dira. Hori kutxa horiek saltzeko bide berri bat da, Errege Eguna ospatzeko opari gisa indartu daitezen. Horrela, Aldundiko Turismo Sailak produktu turistiko horiek merkaturatzeko kanalak sustatu nahi ditu (orain arte online eskuragarri zeuden); izan ere, horiek sortzearen helburua pandemiaren ondorioak bereziki pairatu dituen sektore bati laguntzea da, turismo-esperientziak atzerriko turismora bideratuta egon ohi direlako, osasun-krisia hasi zenetik erabat berreskuratu gabe egon arren.

"Souvenirs from Gipuzkoa 2022" izenpean, gure hurrengo bidaiaren oroitzapenei aurrea hartu eta Gipuzkoara egindako bisita batetik ekarriko genituzkeen oroitzapenak izatea proposatzen dugu. 100, 150 eta 300 euroko bertsioan eskuragarri dagoen kutxaren barruan lurraldearekin zerikusia duten hainbat objektu daude: berehalako argazki bat, postal bat, pegatina bat, sagardo tapoi bat eta argazki bat edizio mugatuan. Jose Javier Serrano "Yosigo" argazkilari donostiarrak egin ditu packetan agertzen diren argazki guztiak. Duela gutxi Hego Korean izan da "Holiday Memories" erakusketarekin, eta uztailean inauguratu zenetik 200.000 bisitari baino gehiago izan ditu.

Kutxak Gipuzkoa Turismoaren webgunean ere daude eskuragarri (www.gipuzkoaturismoa.eus), eta hiru modelo desberdinetan erosi ahal izango dira, lurraldeko erakargarri kultural, gastronomiko, paisajistiko edo naturalei lotutako esperientzia sorta bat eskaintzen dutenak: Hernio (100 €), Txindoki (150 €) eta Aizkorri (300 €). Kasu guztietan, souvenir-ak eta planen zerrenda bat sartzen dira, eta horietako bat aukeratu ahal izango da 2022an gozatu ahal izateko.

"Kutxa horiek Gipuzkoa helmuga turistiko gisa hartzen dute: benetakotasuna", nabarmendu du Iker Goiria Turismoko zuzendariak, eta "esperientzia hauetaz gozatzera eta oparitzera animatu du, baita hemengoak garenoi ere, askotan ez baititugu ezagutzen gure inguruak eskaintzen dizkigun bizipen eta leku guztiak. Gainera, horrekin sektoreari laguntzen diogu”.

Esperientziak, beti bi lagunentzat, hauek dira:

HERNIO KUTXA

Esperientziak:

-         Leitzarango Ferrata ibilbidea, eta ibarra zeharkatzeko bizikleta elektrikoen alokairua.

-         Esperientzia Mater Ontzi Museo Ekoaktiboan, eta bisita Talai Berri txakolindegira.

-         Bisita Sagardoetxea museora, bazkaria sagardotegian, eta oparia.

-         Esperientzia enogastronomikoa Hiruzta upategian.

-         Bisita gidatua Hondarribian.

-         Pintxoak dastatzea eta ardoarekin uztartzea.

-         Kultura-paseoa mugaldetik.

 

TXINDOKI KUTXA

Esperientziak:

-         Bisita Donostiako portura, pintxo dastaketa eta bazkaria Itsas Etxea kofradian.

-         Kayakak alokatzea (2 ordu) Oria ibaian, eta bazkaria sagardotegian.

-         Bidasoa ibaiaren jaitsiera monitorearekin, bisita Sagardoetxera, bazkaria sagardotegian, eta oparia.

-         Pintxo Tour, Donostian.

-         Bela-bataioa (3 ordu), eta pintxo dastaketa.

-         Bisita Albaolara, Itsas Kultur Faktoriara, eta bazkaria sagardotegian.

-         Bisita Loiolako Santutegira, eta bertako gozokien dastaketa.

 

AIZKORRI KUTXA

Esperientziak (esperientzia guztietan gidaria sartuta dago):

-         Kostaldea, arraina parrillan eta txakolina Getarian.

-         Bisita mendiko euskal ekoizleei, eta bazkaria elkarte gastronomiko batean.

-         Bisita pribatua gaztandegi batera, baserri batera, eta bazkaria sagardotegian.

-         Bisita pribatua sagardotegi eta txakolindegietara.

-         Tour pribatua Pasai Donibanetik, geldialdia Hiruzta upategian, eta bisita Hondarribira.

-         Tour pribatua: Zarautz, Getaria eta Zumaia.

-         Bisita Loiolako Santutegira, Ekainberri haitzuloetara, eta bazkaria mendiko jatetxe batean.