Mugikortasuneko, Turismoko eta Lurralde Antolaketako Departamentuak gizarte-erakundeak diruz laguntzen jarraituko du, gizarte-bazterkeriako egoeran dauden pertsonei Mugi txartela eskuratzen errazteko

Azahara Domínguez, Mugikortasuneko, Turismoko eta Lurralde Antolaketako diputatua: "Mugikortasuneko, Turismoko eta Lurralde Antolaketako Departamentutik konpromiso handia dugu garraio publikoaren sustapenarekin, are gehiago gure lurraldean milaka pertsonak duten mugitzeko aukera bakarra hori denean. Horregatik, eta inor atzean ez uzteko, Mugi txartelen erosketa eta horien kargak finantzatzen jarraituko dugu, gizarte-erakundeen onuradunek garraio publikoa erabili ahal izan dezaten. Horrela, gizarte-babeseko sistemaren ertzetan daudenen mugikortasunari laguntzen diogula eta mugikortasunerako eskubidea demokratizatzen dugula ulertzen dugu".

Mugikortasuneko, Turismoko eta Lurralde Antolaketako Departamentuak berretsi egiten du lurraldeko gizarte-erakundeekin duen konpromisoa, gizarte-bazterkeriako egoeran dauden pertsonek garraio publikoa eskura dezaten. Horretarako, Azahara Dominguez diputatuak gidatzen duen sailak Mugi txartelak erosi eta kargatzea finantzatuko du, eta, ondoren, erakunde horiek onuradunen artean administratuko dituzte. 

Mugikortasuneko, Turismoko eta Lurralde Antolaketako diputatua, Azahara Dominguez, Zehar, SOS Arrazakeria, Gurutze Gorria eta Caritaseko ordezkariekin bildu da astearte honetan. Bilera honetan, Goizane Álvarez Kultura, Lankidetza, Gazteria eta Kiroletako diputatua egon da ere. Bertan Gipuzkoan gizarte bazterketa egoeran dauden pertsonek garraio publikorako sarbidea bermatuta izateko konpromisoa agertu dute.

“Mugikortasuneko, Turismoko eta Lurralde Antolaketako Departamentutik konpromiso handia dugu garraio publikoaren sustapenarekin, are gehiago gure lurraldean milaka pertsonak duten mugitzeko aukera bakarra hori denean. Horregatik, eta inor atzean ez uzteko, Mugi txartelen erosketa eta horien kargak finantzatzen jarraituko dugu, gizarte-erakundeen onuradunek garraio publikoa erabili ahal izan dezaten. Horrela, gizarte-babeseko sistemaren ertzetan daudenen mugikortasunari laguntzen diogula eta mugikortasunerako eskubidea demokratizatzen dugula ulertzen dugu”, adierazi du Azahara Domínguez diputatuak.

Goizane Alvarezek ekimen honen garrantzia azpimarratu: “Ahultasun-egoeran dauden pertsonei garraio publikoan sartzen laguntzea ez da soilik mugikortasun kontua, duintasunarena eta aukera-berdintasunarena ere bada. Mugi txartela funtsezko tresna da gure lurraldeko kide guztiek gizartean bete-betean parte har dezaten, funtsezko baliabideak eskura izan ditzaten eta bizitza hobea eraiki dezaten. Kultura eta Lankidetza departamentuak tinko babesten du ekimen hau, Gipuzkoa inklusibo, solidario eta justu batean sinesten dugulako”.

Erakunde onuradunak, pozik
Gizarte-erakunde onuradunak ere pozik agertu dira jasotako laguntzarekin. Caritasek, Aldundiaren "jarrera ona" eskertu du dirulaguntza honi eusteko: "Arriskuan edo egoera ahulean dauden pertsona eta familien garraio publikoa erraztuz, euren gizarteratzea ere sustatzen dugu: lana edo etxebizitza bilatzea, prestakuntza-ikastaroetara joatea edo administrazioetara joatea euren egoera administratiboa erregularizatzeko". “Gipuzkoako Caritasetik garraio publikoaren aldeko apustua egiten dugu, pertsona guztientzako sarbide unibertsala izan behar duen garraio baten alde", adierazi dute.

Ildo beretik jo du Zehar Errefuxiatuekin elkarteak ere. Nerea Maiztegik, Oñatiko Larraña Etxeko eta Tolosako Zuloaga Txikiko zentroen arduradunak, eskerrak eman ditu jasotako dirulaguntzagatik, "erabakigarria baita egoera ahulean dauden migratzaileak eta nazioarteko babesa eskatzen duten pertsonak euskal gizartean sartzeko ibilbideak errazteko". "Laguntza horiek Zehar-Errefuxiatuekin elkartetik eskaintzen dugun laguntza osatzen dute, eta MUGI funtsezko tresna da artatzen dugun pertsona bakoitzaren ibilbide sozialetan ekintza markatuak gauzatu ahal izateko, bere autonomia lortzeko, adibidez prestakuntzara joateko, aisialdiaz eta denbora libreaz gozatzeko, edo etxebizitza eta enplegua bilatzeko kudeaketak egiteko", azaldu du.

SOS Arrazakeriatik, Garazi Montuschik nabarmendu du dirulaguntza horrek "gainerako herritarren aurrean aukera berdintasun handiagoa" ematen diela gazte migratzaileei. "Horri esker, beren prestakuntza-zentroetara, beren osasun-zentroetara edo ospitaleetara sartu ahal izan dira gaixo aurkitu direnean, lana bilatu ahal izan dute, beren kontsulatuetan dokumentazioa lortzeko izapideak eta beste hainbat gestio egin ahal izan dituzte. Halaber, kirolaz eta antolatzen ditugun aisialdiko jarduerez gozatzeko aukera ematen die", zehaztu du.

Azkenik, Gurutze Gorriko Ruth Acostak nabarmendu duenez, "laguntza horrek esku-hartze integralagoa eta indartuagoa ahalbidetzen die muturreko kalteberatasunean, gizarte-bazterkerian eta, askotan, bizitegi-bazterketan dauden pertsonei".