Ostiralean itxiko Aldundiko Aurrekontu Irekietan proposamenak eta ideiak aurkezteko epea

Gipuzkoako Foru Aldundiaren 2022/2023 Aurrekontu Irekien lehenengo fasea amaitzear da. Eider Mendoza foru bozeramaileak gaur gogoratu duenez, ostiral honetan, maiatzak 20, itxiko da ekimenaren lehenengo fase publikoa, non herritarrek modu librean ideiak eta proposamenak aurkezten ari diren. Honen harira, parte hartzeko deia luzatu die foru arduradunak herritarrei, “azken egun hauek aprobatzeko” gonbita luzatuz. Partaidetzaren alorra utzi gabe, Mugaz Gaindiko Aurrekontuek hartuko diote erreleboa: larunbatean jarriko dira ikusgai web orrian herritarrek proposatu dituzten proiektuak, eta orduan hasiko da hauen artean aukeraketa egiteko bozketa fasea.

          Mendoza hedabideen aurrean agertu da gaur goizean, asteartero bezala, aste honetako Diputatuen Kontseiluan hartu diren erabakien berri emateko, eta bertan eman du bi epemuga garrantzitsua hauen berri. Bertan adierazi duenez, Aldundia ahalegin berezia egiten ari da herritarren partaidetzaren arloan, eta adibide bezala bi ekimen hauek martxan izatea jarri du. “Bi ekimen oso garrantzitsu dira guretzat eta Gipuzkoarentzat, arlo ezberdinetan aritzen irenak, eta herritar ezberdinengana iristea ahalbidetzen digutenak”, aldeztu du Mendozak.

Aldundiaren Aurrekontu Irekien kasuan, lehenengo fasearen azken fase betean gaudela gogoratu du, eta ostiralean amaitzen dela ekarpenak aurkezteko epea. Bitartean, herriz herri ari gara topaketak izaten eragile eta norbanakoekin, ekimena aurkezteko. Gaur eta bihar egingo ditugu azkeneko bi topaketak: gaur bertan Irunen, eta bihar hemen, Gunean”, azaldu du. Ostiraletik aurrera, lehengo fasean jaso diren ideiei forma eman eta proiektu bihurtzeko barne lana egingo da eta, gero, udazkenean egingo da bigarren fasea. Orduan, irailaren 12tik urriaren 7ra, bozketa fasea egingo da, non gipuzkoarrek diruz lagundu nahi dituzten proiektuen alde bozkatu ahal izango duten. 10 bozkatuenak finantzatzen lagunduko du Aldundiak, 2 milioi eurorekin. “Azken egun hauetan, beraz, herritarrei parte hartzeko deia luzatzen diegu berriro ere”, esan du.

Bere aldetik, Mugaz Gaindiko aurrekontuek urrats berri bat emango du Maiatzaren 21: ordutik aurrera, www.gipuzkoa64.eu helbidean egongo dira ikusgai, Gipuzkoako eta Pirinio Atlantikotako Departamenduko herritarrek ekimen honetan bozkatu ahal izango dituzten proiektuak. Proiektu honetan, urtarrilaren 27tik martxoaren 3 arte proiektuak aurkezteko epea zabalik egon zen. Hemen aurkeztu diren proiektuen bideragarritasuna aztertu ostean, guztira 42 ekimen aurkituko dituzte herritarrek larunbat honetan ezagutzera emango den zerrendan: 17 Gipuzkoan aurkeztuak, eta 25 Pirineo Atlantikoko Departamenduan.

Bozketa epea ere larunbatean bertan hasiko da, eta ekainaren 17ra arte egongo da irekita. Bozka emateko modu bakarra modu telematikoa da, eta horretarako herritarrek www.gipuzkoa64.eu helbidera sartu eta bertan dagoen “Ideiak 2022” atalera sartu beharko dute. 16 urtetik gora dituen Gipuzkoar guztiek dute parte hartzeko aukera eta bozka emateko, 3 proiektu aukeratu behar dira halabeharrez., berdin du Gipuzkoan aurkeztutakoak edo Iparraldean aurkeztutakoak izan. Gipuzkoako Foru Aldundiak 150.000 euro jarri ditu ekimen honetan, eta Pirinio Atlantikoko departamenduak beste 150.000 euro. Proiektu bakoitzari gehienekoz 20.000 euroko dirulaguntza emango zaio. 

“Mugaz gaindiko izaera duten proiektuak dira, alor oso ezberdinetakoa, eta askoren gidaritza partekatua izango da Gipuzkoako eta Pirinio Atlantikoko Departamenduko eragileen artean”, esan du Mendozak. Foru erakundeak, aipatutako 150.000 euro horiekin, datorren astean zabalduko den bozketa faseko lau aste hauetan bozka gehien jasotzen dituzten proiektuen hurrenkeran, lehen postuetan geratzen diren Gipuzkoan aurkeztutako proiektuak finantzatuko ditu.

“Gure begiek ez dituzte Gipuzkoako behar danak ikusten, eta gipuzkoar guztion begiak behar ditugu. Aurrekontu irekiak, mugaz gaindikoak, herritarrekin topaketak… horretan laguntzen diguten erremintak dira”, gaineratu du Mendozak. "Danon artean argazkia benetakoa izan dadin, zer egin hobeto asmatzeko, herritarren partaidetza behar dugu. Eta nola ez, etorkizuna eraikitzen jarraitzeko, ezinbestekoa da herritarren partaidetza bultzatzen segitzea”, borobildu du.

 

Lehen enplegua

Bestalde, gaurko Diputatuek Kontseiluan onartu da Lehen Enplegua programaren dirulaguntzak emateko oinarri arautzaileak eta 2022ko deialdia. Proiektuak 200.000 euro ditu guztira. “Beraz, proiektu pilotu bat da, eta parte-hartzaile kopurua txikia izan beharko da nahitaez, eta jardueraren arrakastak planteamendu handinahiagoa ekar lezake”, esan du Mendozak. 200.000 € horietatik 150.000 € gazteak kontratatzeko erabiliko dira, eta gainerako kopurua gazteak prestatzeko erabiliko da.

Foru arduradunak azpimarratu duenez, balio kualitatibo handiko proiektua da. “Izan ere, partaidetzaz jardun garela, pasa den urteko Aurrekontu Irekietatik eratorritako proiektu batez ari gara”, adierazi du. Zehazki, ekimen hartan proiekturik bozkatuena izan zen. 2021 urtearen azken hiruhilekoan, proiektu hori lantzen hasi ziren. Helburua zen enpresek lehen enpleguaren bila zebiltzan gazteak kontratatzeko laguntzak eta I+G+b arloetan pertsona horiei zuzendutako prestakuntza finantzatzeko laguntzak konbinatzea.

Gazteen ikuspegitik, prestakuntza espezifikoa eskaini nahi zaie, berritzeko gaitasuna susta dezaten, eta enpresarentzat erakargarria izan dadin haien kontratazioa, berrikuntzara bideratutako profil bat txertatuta. Aldi berean, gazteari esperientzia eskuratzeko aukera emango dio. Eta bestalde, berrikuntzaren ikuspegitik, lortuko dena da prestakuntza eta enplegua eskuratzen duen pertsonari mesede egitea; lehiakortasuna bermatzeko hain beharrezkoa den berrikuntza hasi edo indartu dezakeen enpresari mesede egitea; eta eskain ditzakeen eta batzuetan behar bezala ustiatzen ez diren zerbitzuak ezagutarazten dituen eskaintza teknologikoari mesede egitea. “Honekin guztiarekin, laguntza-programa honen bidez, herritarren proposamena jaso nahi da, hau da, lehen enpleguaren bila dabiltzan gazteen kontratazioa, I+G eta enpresetan berrikuntza sustatzea”, nabarmendu du.

 

Egoitzetako partea

Azkenik, adinekoen egoitzetan pandemia izaten ari den eragina ere eguneratu du bozeramaileak. Erabiltzaileen kasuan, momentu honetan 169 positibo aktibo daude (pasa den astean baino 3 gehiago), 19 egoitza ezberdinetan. Kasu hauetatik, 15 lagun daude erreferentzia zentroetan. Pasa den astetik hona, 4 egoiliar zendu dira, 99 sendatu eta 106 positibo berri atzeman dira. Guztira, azaroaren 29tik hona, 63 egoiliar hil dira, eta 2.787 lagunek gainditu dute gaixotasuna. Azkenik, adinekoen egoitzetako langileei dagokionez, 42 positibo aktibo daude (pasa den astean baino 19 gutxiago) 20 egoitza ezberdinetan.