Piztu META! 2022k 15 kultura-proiektu berri sustatuko ditu Gipuzkoan

Gipuzkoako Foru Aldundiko Kultura Departamentuak eta Goteo Fundazioak Piztu META! programaren VII. edizioko 15 kultur proiektuak aukeratu dituzte, crowdfunding kanpaina egiteko laguntza eta euskarria izango dutenak. Kultura Departamentuak 70.000 euro jarriko ditu ekimen horietarako. Film laburrak, txotxongilo-antzerkia, hiri-dantza, liburuak eta ipuin ilustratuak... horiexek izango dira, besteak beste, mikromezenasgo edo crowdfunding bidez egingo den finantziazio-kanpaina honetan parte hartuko duten proposamenetako batzuk. Uztailaren 13tik irailaren 28ra, 15 proiektu horien sustatzaileek finantzaketa kolektiboari buruzko prestakuntza eta aholkularitza jasoko dute, eta irailaren 29an hasiko dira kanpainak.

Beste urtebetez, Kultura Departamentuak formula hau erabiliko du: herritarrek crowdfunding kanpainan emandako euro bakoitzeko euro bat emango du, eta 70.000 euroko muga izango du programa osorako. Lehenengo ediziotik, 2016. urtean, METAk! 92 herritar-proiektu garatu ditu, eta horrek 886.871 euroko ekarpena ekarri dio lurraldeko kultura-sareari.

Piztu METAk! gainera, aukera ematen du herritarrek eta gizarte-eragileek kultura-proiektuetan eta -politiketan parte har dezaten sustatzeko; kultura-proiektu eta -ekimenen gizarte-laguntza testatzeko, Interneteko plataformetan aurkeztuz; diru-laguntza publikoak osatzeko, proiektu bakoitzaren jarraitzaileen ekarpenen bidez; eta finantziazio publikoa gizarte-babes handiena duten proiektu eta ekimenetara bideratzeko.

Hauek dira VII. edizio honetan aukeratutako proiektuak:

Azken aukera - Ekoizpen-etxe independentea NERVIO SL

Ingurumen-krisi globala azaltzeko serie dokumentala. Lehen istorioa Pasaiako portuan aurkitzen dugu, Gipuzkoan. Ekosistema naturalen kolapsoaren aurrean, MATER, zurezko azken euskal bonitera handia, Itsasontzi Museo Ekoaktibo bihurtu da, gizartea gure ingurumenaren kontserbazioan inplikatzeko eraldatze- eta sentsibilizazio-tresna bakarra. Horrez gain, aditu eta zientzialari batzuen iritzia ere izango da, itsasoan mikroplastikoak egoteak duen errealitate gogorra eta guztiontzat dituen ondorioak azaltzeko.

PUDENTE, Euskarazko lehen opera - Operaren Lagunen Donostiako Elkartea

Lehenengo opera erabat euskaraz berreskuratu, berreraiki, irudikatu eta zabaltzeko proiektua. Donostia Operaren helburu nagusia operarekiko eta, oro har, lirikarekiko zaletasuna sustatzea da, eta Donostiako eta Gipuzkoa osoko biztanleen artean operaren ezagutza bultzatzea.

BAT- TᴉRÅꓭᴉЯÅ (reggae taldea)

BAT proiektua REGGAE musikaren inguruko lan diskografikoa da, formatu fisiko berean bi disko izango dituena, jatorrizko musikarekin eta euskaraz. Lan honetan islatu nahi dira, reggae erritmoan, gizabanakoaren eta kolektiboaren arteko borrokatik sortzen diren asmakizunak eta igurikimenak, hausnarketa gizarte osoarentzat baliagarria izango delakoan.

HERRIAN XALTOKA - Xalto ta Brinko Animazio Elkartea

Gure herriaren kultura, euskara eta ondarea transmititzeko proiektu fresko, dinamiko eta dibertigarria. Zabalkunde digitala eta presentziala uztartzen ditu: Xalto pailazoak astero bideo labur bat grabatu eta Youtube-ra igoko du, Lezoren erreferentziekin, 40 programa osatu arte (ikasturte bat), eta hori eskoletan, antzerkian, kalean eta abarretan zuzenean parte hartzearekin tartekatuko da, elkarreragina sustatzeko.

Saharako herriaren askatasunerako abestiak - Juan Soroeta / 44 kluba Kultur elkartea

Estatu espainiarreko musikarien abestiak, hizkuntza ofizial guztietan, saharar herriaren autodeterminazioari laguntzeko. Egoera horren berri ematea da helburua, horretarako Espainiako estatu osoko musikariek hizkuntza ofizial guztietan (gaztelaniaz, euskaraz, katalanez eta galegoz) idatzitako abestien bidez.

GuÑun - Maider Gaztelumendi

Guñun integraziorako eta elkar ikasteko gunea izango da, komunitate euskaldun eta senegaldarra ezagutzeko aukera izateaz gain, begiradak, ikusteko moduak, egiteko moduak eta sentitzeko moduak partekatzeko aukera ere izango da. Esperientzia erakargarria euskaldunen eta senegaldarren artean loturak eta espazioak sortzeko.

RENOUS proiektua - Clara Virgili Flor

Renous proiektuak modaren industrian eta kontsumitzeko moduan hain beharrezkoa den aldaketa sustatzen du. Egunero milaka eta milaka jantzi botatzen dira, kopuru handitan eta egoera txarrean ekoitziak, inolako gizarte- eta ingurumen-etikarik gabe. Jantzi horiei beste bizitza bat emateko sortu da proiektu hau.

AMAPATXA. Amets bat, bide bat - Ion Brakamonte

"Amapatxa" liburua gomendioen gida gisa erabiliko da Amerikara bidaia bat egiteko asmoa dutenentzat, eta helburua euskaraz irakurtzea da.

Aiama - Lara López Ansorena

Proiektuak ipuin ilustratu bat sortzea du helburu, baina ez hori bakarrik: batetik, ama berrien haserrea agerian uzten duen materiala, anbibalentzia normalizatu eta ez estigmatizatzea, eta, bestetik, egoera horiek igarotzea eta haurrekin partekatzea erraztuko dien baliabide bat ematea, dramatizatu gabe, behar duten espazioa emanez.

Nor - Xabi Salaberria Gonzalez

Identitate sexualari eta transexualitateari buruzko liburua, Bigarren Hezkuntzako gazteei zuzendua. Helburu nagusia gogoetari leiho bat irekitzea da, elkarrizketa filosofikoetarako abiapuntu gisa.

Kaixo Gilda! - Gilda Kultur Elkartea

Kultur programa aktibo bat hartuko duen saioa, arte plastikoei eta ikusizko arteei lotutako erakusketa eta tailerretan oinarritua. Horrela, Gros auzoan kultura eta sormena sustatuko dira.

U(da)KOAK - izpiak azala zuritzeraino - Ane Cuesta

U(da)KOAK fikziozko bost film laburren multzoa da. Kritikatik eta udako beroarekin, bakoitzak ezezkoa ematen du. Azala altxatu arte. Euskaraz, uda hitzak udara esan nahi du, eta uko hitzak ezezkoa esan nahi du. Biak elkartzen badira, udako ukapenen antzeko zerbait gertatzen da. U(da)koak bi hitz horien batura da, eta bi kontzeptuak elkartuko dituzten bost istorio kontatzea du helburu.

MITXOLETAK - Zuri guztiak ez dira irina - Mitxoletak

Mitxoletak film laburra: ipuin baten kontrakoa da. Distopikoa, ukaezina, desatsegina… betiko ipuinaren narratiba eta estetikaren giroan. Nazkatuta gaude egia ezkutatu eta gezurrak esaten dituzten kontakizunekin. Gauzak ez direlako ez zuria ez beltza, horregatik, batetik ipuin baten edertasuna eta xalotasuna eta, bestetik, errealitatearen gordintasuna aprobetxatuz, Mitxoletak gure gris-eskala sortu du. Xarmak ezkutatutako ipuin gordina.

EL ELEFANTITO - Miles Along

Elefantitoa 2 eta 7 urte bitarteko haurrentzako txotxongilo-antzerkia da, familia osoarentzat egokia. Pertsonaien kalitateak, erabilitako materialek eta eszenaratzeak gogorarazten digute oso gutxirekin asko lor dezakegula eta horrekin hezten gaituela gaur egungo kontzeptuetan, hala nola zirkulartasunean eta jasangarritasunean, haur eta helduak erakarriko dituen istorio bat erabiliz.

NANAS para grandes. Handientzako ABESTI TTIKI - Julia~Cristina

Etxeko mantren, eguneroko nanen eta haiku song-en disko-bilduma. Proiektu hau bereizten duena da errazaren eta hurbilaren alde egiten duela, letra eta musiketan, entzuketan, alde inkontziente eta emozionalean askatasun handiagoz ibiltzeko.