Ruiz-Capillasen semeak bere aita nola eta non hil zen jakin du, azkenean, Koldo Mitxelenako gerra zibilaren erakusketari esker

Denis Itxaso Kultura diputatua pozik agertu da: "erakusketa honek, memoria argitzeaz eta hobitik ateratzeaz gain, kasu zehatz bat eskaini digu, erakusten duena memoria egitea ez dela zauri zaharrak irekitzea, kontrakoa baizik; osatu gabeko istorioak sendatzen laguntzen du".

Azurkiren eta Arroyoren lan zehatzari esker, hiru belaunaldik lehen eskutik ezagutu dute Sergio Ruiz-Capillas Cormenzanaren bizitzako azken egunak nolakoak izan ziren, bala batek harrapatu baitzuen Irungo San Martzialeko borrokaldian Izquierda Republicanako Azaña milizietako kide izan zenean.

Miliziano errepublikanoaren seme gazteenak 6 urte baino ez zituen bere aitaren heriotzaren berri eman ziotenean. Inoiz ez zuen ezer gehiago jakin. "Aitaren heriotzaren albistea apur bat osatugabea izan zen.  Bizitza osoan kezkatuta egon gara bere heriotzaren egia ezagutzeko. Informazio gutxi zegoenez, zaila zen pentsatzea zer hari tira egin zerbait lortzeko", dio 89 urteko semeak. Telefono dei batek dena aldatu zuen arte.

Sergio Ruiz-Capillas semea, Hondarribian jaioa baina Madrilen bizi dena, Burgosera bidali zuten osaba-izebekin batera, aita hil ondoren.  Duela gutxi, Gipuzkoatik dei bat jaso zuen. Esan zioten Salamancako Artxibo Historiko Probintzialean dokumentu batzuk agertu zirela, eta bertan bere aita nola, noiz eta non hil zen azaltzen zela. Hasieran ez zion garrantzirik eman, baina Arroyo eta Azurki tematu ziren, eta horrela sentitu zuen urteak zain zeramatzana.

Azurkik eman zion dokumentu ugariren artean ezkutatzen zen argazki baten berri. Bi gizon Donostiako Santa Katalina zubian. Hori izan zen Ruiz-Capillas Union General de Trabajadores sindikatuan eta Brinkolako Izquierda Republicana alderdian afiliatua zela jakitera eraman zuen lehen arrastoa.  1936ko abuztuaren 6an, Donostiara joan zen Gipuzkoako Frente Popularraren baimen batekin, eta lurraldeko Milizia Antifaxistetan sartu zen gerran parte hartzeko.  Eta haren amaiera nolakoa izan zen jakiteko ere, materialak agerian uzten du Irungo hilerrian lurperatu zutela, "13. koadroan, 21. ilaran, 3. hilobian".

Familiak esker oneko hitzak baino ez ditu Arroyorentzat, Azurkirentzat eta erakusketarentzat, haien lanari esker bere aita nor zen, zergatik borrokatu zen eta nola hil zen deskubritu ahal izan duelako.

"Gerra zibila Gipuzkoan; erresistentzia eta duintasuna" erakusketa Koldo Mitxelenan izango da urtarrilaren 18ra arte.