TREBA Nerabeak, Gipuzkoako nerabeentzako prestakuntza-programa berria, Debabarrenan hasiko da

Gipuzkoako Foru Aldundiko Gazteria Zuzendaritzak TREBA Nerabeak prestakuntza-programa berria jarri du abian, 12 eta 16 urte bitarteko gazteek beren garapen pertsonalerako funtsezko tresnak gara ditzaten. Programa hau 17 eta 21 urte bitarteko gazteentzako TREBA Gazteak programari gehitzen zaio, lurraldean finkatzen dena. Urtean zehar, programak lau gai-multzo handi jorratuko ditu: ongizate emozionala, begirada kritikoa, sexualitatea eta bizitzarako trebetasunak, eta arlo bakoitzean oinarrizko eta sakontzeko ikastaroak eskainiko dira.

TREBA Nerabeak Debabarrenako eskualdean hasiko da, eta bi fasetan garatuko da: lehena udaberrian, bost ikastarorekin, eta bestea udazkenean. Soraluze, Deba eta Elgoibar izango dira ekimen hau hartuko duten lehen udalerriak, apirila eta maiatza bitartean, sexualitateari, bizitzarako tresnei eta ongizate emozionalari buruzko ikastaroekin. Udazkenean, Mutriku eta Eibar batuko dira programara, begirada kritikoa eta ongizate emozionala jorratuz, hurrenez hurren.

Hala azaldu du gaur goizean Isaac Palencia Gipuzkoako Foru Aldundiko Gazteria zuzendariak prentsaurrekoan, Maite Quintanilla Soraluzeko Haur eta Gazteen zinegotziarekin eta Maialen Aranguren, Gazteria eta Hezkuntza teknikariarekin batera. Palenciak azpimarratu duenez, "oso garrantzitsua iruditzen zaigu gazteen garapen pertsonala babestea, batez ere haien bizitzako une erabakigarrietan, hala nola haurtzaroan eta nerabezaroan. Badakigu bizitzako etapa hori zalantza eta aldaketa askoko aldia izan daitekeela, eta, beraz, funtsezkoa da emozioak, autoestimua edo besteekiko harremana kudeatzeko tresnak izatea. Nabarmendu nahi dut gaur aurkezten ditugun hitzaldiak lurralde osoan garatzen dugun estrategia baten parte direla. Guztira 290 saio egiten ditugu, eta horien gaiak udal bakoitzarekin adostu dira, herri bakoitzaren beharretan oinarrituta ".

Maite Quintanillak honakoa gaineratu du: “Gure kasuan, Soraluzen, Gaztelekuko hezitzaileek gazteekin duten harremanean sentitutako beharrari eman nahi izan zaio erantzuna. Sexualitatearen ikuspegi distortsionatua deseraiki eta sexualitatea ikuspegi inklusibo nahiz kritiko batetik begiratzeko aukera eskeiniz, tratu onak mahai gaineratuz. Argi daukagu, gure herrietako gazteentzako eredugarri izan behar dugula gaztelekua bezalako zerbitzuetan eta eskaini behar diegula bizitza bizigarri baterako informazio eta tresna eredugarriak konfiantzatik eta babesgune batetik abiatuz”.

Era berean, Arangurenek adierazi duenez, "Euskadiko gazteen artean, 5etik 1ek osasun mentalaren alterazio bat du diagnostikatuta, eta azken urteetan antsiolitikoen kontsumoa 6rekin biderkatu da, batez ere nesken artean. Egoera horren aurrean, Elgoibarko Udalak TREBA Nerabeak eta TREBA Gazteak programetan parte hartuko du, herriko nerabe eta gazteei ongizate emozionalaren gaia lantzeko aukera eskaintzeko. Ekimen honen helburua egoera horiei erantzuteko tresnak ematea da. Gainera, Elgoibarko Udalak ere parte hartuko du https://zurrunbiloa.eus proiektuan. Proiektu horretan, herrian ikasten duten 12-16 urteko nerabeen ahotsa jasoko da, bai eta gazteek bizi duten egoerari eta buru-osasunari buruzko informazioa ere ".

Izen-emateak eta informazio gehiago

TREBA Nerabeak ikastaroetako izen-emateak udalen eta gaztelekuen bidez kudeatzen dira; beraz, prozedurak ez dira berdidnak herri guztietan. Agenda osoa eta saio bakoitzari buruzko xehetasun gehiago gipuzkoangazte.eus webgunean daude eskuragarri.

Sexualitatea Soraluzen

Soraluze izango da TREBA Nerabeak hartuko duen lehen herria eta sexualitatea  landuko du.

Oinarrizko ikastaroa: “Sexualitatea ezagutuz: emozioak, desira eta tratu ona "

Data: apirilaren 5ean           
Ordua: 17:00            
Lekua: Soraluzeko Gaztelekua    
Izen-ematea: udaletxean 

Lehenengo ikastaroan, sexualitatea ikuspegi zabal, inklusibo eta kritiko batetik jorratuko da, eta espazio seguru bat sortuko da nerabeek beren zalantzak eta esperientziak partekatzeko. Partaidetzazko metodologien bidez, emozioak eta desira esploratzea erraztuko da, adostasunari, tratu onari, sexting-ari eta sextortsioaren prebentzioari buruzko funtsezko kontzeptuak jorratuz.

Sakontze-ikastaroa: “Aniztasuna eta afektuak: harreman osasuntsu eta askeak eraikitzen "

Data: maiatzaren 17an       
Ordua: 17:00            
Lekua: Soraluzeko gaztelekuan   
Izen-ematea: udaletxean             

"Aniztasuna eta afektuak: harreman osasungarri eta askeak eraikitzen" sakontze-ikastaroaren helburua da sexu- eta genero-aniztasunaren ikuspegi inklusiboagoa eta errespetuzkoagoa sustatzea, eta sexualitatearen esparruan errespetuan, elkarrekiko zaintzan eta tratu onean oinarritutako harremanak bultzatzea. Tresna praktikoak eskainiko dira, nerabeek abusu-egoerak identifikatu, prebenitu eta horiei aurre egin ahal izateko, adostasunean eta enpatian oinarritutako harremanak sendotuz. Saioetan partaidetzazko tailerrak, role-playingeko ariketak eta kasuen azterketa egingo dira, parte hartzaileen artean ikaskuntza horizontala bultzatzeko.

Debako bizitzarako tresnak

Bigarren gaia Debara iritsiko da, eta bertan eguneroko bizitzarako eta etorkizunerako estrategiak landuko dira.

Oinarrizko ikastaroa: “Bizitzarako trebetasunak: oinarrizko ikastaroa "

Data: maiatzaren 8an       
Ordua: 16:00            
Lekua: Debako Gaztelekua         
Izen-ematea: Gaztelekuan galdetu       

Lehenengo ikastaroa nerabeen bizitzarako eta etorkizunerako beharrezkoak diren tresna praktikoez hornitzen saiatuko da, trebetasun horiek eskuratzeko beharrezkoak diren gaitasunak eta garapen-prozesuak sustatuz. Horretarako, hainbat eduki azalduko dira, eta nerabeen parte-hartzearekin konbinatuko dira, hainbat dinamikaren bidez.

Sakontze-ikastaroa: “Bokazioa eta etorkizunerako erabakiak-hartzea"

Data: maiatzaren 22an       
Ordua: 16:00            
Lekua: Debako Gaztelekua         
Izen-ematea: Gaztelekuan galdetu.      

“Bokazioa eta etorkizunerako erabakiak-hartzea” sakontze-ikastaroaren helburua da nerabeei beren gustuak, gaitasunak, balioak eta bokazioa identifikatzeko baliabideak ematea. Hala, beren etorkizunari buruzko erabaki informatuagoak hartzeko aukera izango dute. Nerabeen hausnarketa pertsonala eta funtsezko trebetasunen garapena indartu nahi dira, parte-hartzaileei beren ahalmenak aitortzen lagunduz. Horrela, beren erabakiak hartzeko eta epe luzera planifikatzeko duten prozesua aberastuko da. Metodologia dinamikoa eta partaidetzazkoa izango da, hausnarketa, esperimentazioa eta talde-lana uztartuz. Norberak sortutako liburuxka baten bidez, banakako eta taldeko jarduerak, ikaskuntza eta esperientzien trukea erraztuko dutenak, garatuko dira.

Ongizate emozionala Elgoibarren

Ongizate emozionala izango da Elgoibarren antolatutako ikastaroen ardatz nagusia.

Oinarrizko ikastaroa: “Emozioak: oinarrizko ikastaroa"

Data: maiatzaren 14an       
Ordua: 18:00            
Lekua: Elgoibarko Gaztelekuan 
Izen-ematea: zehazteko

Oinarrizko-ikastaroan nerabeentzako osasun mentaleko ohitura osasungarriak sustatuko dira, arrisku-faktoreen prebentzioa eta babes-faktoreen garapena bultzatuz. Lehen saio honetarako, marrazketa-teknika artistikoetan oinarritutako dinamikak egingo dira. Nerabeen sorkuntza artistikoak bizipen- eta esperientzia-tresna gisa erabiliko dira introspekzio emozionala errazteko.

Sakontze-ikastaroa: “Kontzientzia eta gorputza”        

Data: Udazkenean, urrian  
Ordua: Zehazteko   
Lekua: Elgoibarko Gaztelekuan 
Izen-ematea: zehazteko

Ongizate emozionala eta gorputzarekiko lotura sustatzeko asmoz, udazkenean "Kontzientzia eta Gorputza" sakontze-ikastaroa egingo da. Ikastaroaren helburua da nerabeek gorputza funtsezko tresna gisa erabiltzea beren behar fisikoak eta emozionalak bizipen-ikuspegitik identifikatzeko. Metodologiak erlaxatzeko eta gorputza zaintzeko hainbat teknika konbinatuko ditu, mindfulness eta gorputzaren miaketa aktiboak barne. Ariketa praktikoen bidez, tentsioak askatzen eta gorputzarekiko harreman positiboa indartzen lan egingo da.