Atzealdea Zabalik "Euskadiko Gazteak Lankidetzan" programaren 30. edizioan izena emateko epea

1994 eta 2002 urteen artean jaiotako gazteek otsailaren 14ra arte eman dezakete izena.

2024/01/12

Euskadiko Gazteak Lankidetzan, 22 eta 30 urte bitarteko gazteentzako programa bat da. Eusko Jaurlaritzako Gazteria Zuzendaritzak eta Garapenerako Lankidetzaren Euskal Agentziak antolatzen dute, eta Euskadiko gazteak hegoaldeko herrialdeetako lankidetza-ekintzetan sentsibilizatzea eta herrien eta kulturen arteko elkartasun-kultura sustatzea du helburu.


 

Hiru hilabetez, EAEko gazteek, besteak beste, hezkuntzarekin, berdintasunaren sustapenarekin edo nekazaritzarekin zerikusia duten lankidetza-proiektuetan parte hartu ahal izango dute Amerikako, Afrikako edo Asiako hainbat herrialdetan.

Programan parte hartzeko behar diren profilak askotarikoak dira: begirale-titulua duten pertsonak, mekanikako ikasketak, elektrizitatea, ingeniaritza, berdintasuna, irakasle-ikasketak, psikologia eta erizaintza, besteak beste; edo musika-tresna bat jotzen edo janaria prestatzen dakitenak, adibidez.

Programan parte hartu ahal izateko, beharrezkoa da 1994 eta 2002 artean jaio izatea, Euskal Autonomia Erkidegoko udalerriren batean erroldatuta egotea 2023ko abenduaren 19a baino lehen, eta proiektua garatzen den herrialdeko hizkuntza ezagutzea.

Eskabideak aurkezteko epea 2024ko otsailaren 14an amaituko da. Eskaera www.gazteaukera.euskadi.eus webgunean eskuragarri dagoen izena emateko inprimakiaren bidez egin beharko da, identifikazio elektronikoa erabiliz. Datu hauek eskatuko dira:

  • Identifikazio-datuak
  • Pasaportearen zenbakia eta iraungitze-data
  • Prestakuntza akademikoa
  • Lan-arloko eta boluntariotzako esperientziak.

Lehen fase honetan ez da beharrezkoa dokumenturik igotzea, aurrez hautatutako pertsonek bakarrik egin beharko dute.

Jarraian, 2024rako faseak eta egutegia ikus daitezke:

  • Izena emateko epea: otsailaren 14ra arte
  • Aurrez hautatutako gazteen eta ordezkoen zerrenda argitaratzea: otsailaren 22an
  • Aurrez hautatuen topaketa Barriako aterpetxean: martxoaren 15, 16 eta 17an
  • Hautatutako gazteen eta ordezkoen zerrendak argitaratzea: martxoaren 19an
  • Informazio eta orientazioko asteburuan hautatuak Barriako aterpetxean bilduko dira: apirilak 13-14.
  • Esperientziak: 2024ko uda
  • Ebaluazio-topaketa Barriako aterpetxean: urriak 26-27.

 

INFORMAZIO GUZTIA

 

 

 

Jarraitu gure sareak