Berriak

Gipuzkoako Foru Aldundiaren Kultura eta Gazteria Departamentuak gaurko prentsaurrekoan aurkeztu du Gipuzkoan Gazte Tour 2024ko udazkeneko programazioko lehen hitzordua. Izan ere, programa dagoeneko kultur erreferentzia bihurtu da Gipuzkoako gazte eta nerabeen artean. Ekitaldi hau musikaren eta arte eszenikoen ingurukoa da eta probintziako hainbat herrirekin lankidetzan gauzatuko da. Hain zuzen ere, udazkeneko edizioa Zumarragan hasiko da urriaren 12an.

Prentsaurrekoan izan dira Isaac Palencia Gazteriako foru zuzendaria eta Nerea Errasti Zumarragako Gazteria zinegotzia. Palentziak azpimarratu duenez, "gure helburua da Gipuzkoa osoko gazteei beren kezkak eta gustuak islatzen dituzten kalitatezko kontzertuak hurbiltzea, lehen mailako kultur esperientziak eskainita. Beren talentuari balioa ematen dion eta sormenez garatzeko espazio bat eskaintzen dien ekitaldi honen parte senti daitezen nahi dugu".

Bestalde, Errasti "oso pozik" agertu da aurtengo kartelarekin. «Aurreko edizioetan bezala, urriaren 12an lehen lerroko artistez eta Zumarragako talentu gazteez gozatzeko aukera izango dugu. Zumarragako Udaletik Gipuzkoako Foru Aldundia animatu nahi dugu programa honen aldeko apustua egiten jarrai dezan, bertan aukera ematen baitzaie gure udalerrietako gazteei hainbat ekitalditan parte hartzeko».

Gipuzkoan Gazte Tour gazteentzako ekimen bat da, hasiera-hasieratik haientzat sortu zena. GGT izan da 16 eta 25 urte arteko gazteentzako Gipuzkoako espazio nagusia. Gainera, aurten, tailer pedagogikoak itzuli dira berriz ere, horixe baita parte hartzen duten udalerrietako gazteria-sailek gehien eskatzen duten osagaietako bat. Edizio honetan gazteen talentua eta sormena sustatzeko diseinatutako masterclassak eta jarduerak izango ditugu, horrela gazteak ekitaldiaren partaide aktibo bihurtuz.

Urriaren 11n, ostirala, Sarai Santano koreografo eta dantzariak masterclass bat emango du Gure Txoko Kultura Zentroan, 18:00etan. Aukera paregabea izango da herriko gazteek dantza garaikidearen esparruko onenetariko batengandik ikasteko.

Urriaren 12an, larunbata, Izade estalkian Kulto Kultibo arituko da, Irungo rap-reggae taldea, eta azken lana aurkeztuko du, Level, kritika soziala estilo fresko eta kementsuarekin nahasten duen proposamena. Aimarz tokiko artista gazteak emango dio hasiera ekitaldiari. Hypperpoparen promesa bat da, eta euskara, gaztelania eta ingelesa konbinatzen ditu. Kontzertua doakoa izango da eta 20:00etan hasiko da, Ayvee abeslari eta aktorearen aurkezpenarekin.

Tokiko kultura eta gazteen talentua sustatzen dituen Gipuzkoan Gazte Tour gakoa izan da artista berriak bultzatzeko eta tokiko talenturako espazioak sortzeko. Bere balio nagusienetako bat da artista gazteei aukera ematen diela eszenatokia partekatzeko pertsonai ezagunekin, Gipuzkoako belaunaldi berriei ahotsa eta ikusgarritasuna emateko duen konpromisoaren erakusgarri. Gainera, tailer pedagogikoekin, adibidez euskarazko raparena eta Oihan Vegaren irratiari buruzkoa bezalakoekin, sustatu nahi dira genero berdintasuna, inklusioa eta euskararen erabilera bezalako balioak.

Ekitaldi honekin, Gazteria Departamentuak berresten du kultur espazio inklusiboak sortzeko konpromisoa, gazteek aukera izan dezaten beren sorkuntza gaitasunak garatu eta kulturarekin konektatzen dituzten esperientziak bizitzeko, partaidetzako ingurune hurbil batean.

ZUMARRAGA, URRIAK 12

Lekua: Izazpi estalkia

Sarrera: Doakoa

Ordua: 20:00etatik aurrera

Aurkezlea: AYVEE (Andrea Vitori )

Txikitatik Ayveek musikarekiko zuen grina hain zen handia, ezen koreografiak sortu, abestu eta eskolan emanaldiak egiten baitzituen; horrela, 2020ko irailean "Amaitu da" bere lehen abestia atera zuen. Bere inguruan harrera ona izan zuen, eta irratian, telebistan eta sare sozialetan elkarrizketak egin zizkioten. Pandemiaren ondoren gertaera ikaragarri bat izan ondoren, depresio batean murgildu zen, eta ezin izan zuen jarraitu musika sortzen; hala ere, bere onera etortzeko bide luzea egin ondoren, orain bigarren diskoa plazaratu du, gertatu den guztia salatuz eta kontatuz. Medusa diskoarekin oihartzun mediatiko handia izan zuen, eta emakume askori lagundu ahal izan die gertatu zitzaiona kontatuta.

TOKIKO ARTISTA: AimarZ

Aimar Zuriarrain Asurmendi, Aimarz izenez ezagutzen dena, Zumarragako musikari gazte bat da. Musika oso txikitatik izan da bere bizitzaren funtsezko parte. 15 urterekin, bere lehen abestia argitaratu zuen, bere musika-ibilbideari hasiera emanez. Orain, 18rekin, beren lehen EPa aurkeztuko du, «MI CORE» izenburuarekin, hyperpoparen eta beste zenbait generoren mugak aztertzeko baliatu duena. Aimarz autodidakta da eta bere musika sortzen eta produzitzen ikasi du; hainbat soinu eta estilo esploratu ditu. Aurten, Eguzki Azkarate musika-ekoizlearen laguntza izan du bere EPa sortzeko, eta horrek ukitu profesional bat eman dio bere lanari. Gaur egun, Aimarzek musikarekiko grina bateratzen du Salamancan egiten ari den Biologiako ikasketekin. Kontzertu hau mugarri berezia da beretzat, zuzeneko lehen emanaldia izango baita.

ARTISTA NAGUSIA: Kulto Kultibo

Kulto Kultibo Euskal Herrian sortu zen 2008an, zehazki Irunen, eta musika-eszenan aztarna utzi duen rap talde bat da. Honako hauek osatzen dute: Peca (Mc), Samu (Mc), Seta (Dj) eta Aimar (soinu-teknikaria). Taldearen ezaugarri nagusia da hip-hopa fusionatzen dutela reggaerekin eta erritmo urbanoekin. Bere letrak kritika sozialaz eta esperientzia pertsonalez beteta dude eta musikan benetakotasuna eta mezua bilatzen dituen belaunaldi honekin konektatu du. Kulto Kultibok diskografia sendoa du eta eszenatokian apartak dira; horregatik, Espainiako raparen erreferentea dira oraindik ere, beren generoan mugarri izan baitira. Orain bosgarren albuma estreinatu dute, "Level", beren esentziaren eta rap/reggaeren munduko ibilbidearen isla nabarmena da, baina oraingoan beste maila batera iritsi dira, emaitza askoz ere profesionalagoa da. Diskoan erritmo berri eta ausartak aurki ditzakegu, «Kulto Kultibo»ren estiloko abestiak, berezkoa duten xarma hori galdu gabe.

Gipuzkoan Gazte Tourren Webgunea

Jarraitu gure sareak