Ingurune seguruak eta babesleak

 

Ingurune esatean, haur eta nerabeak interakzioan aritzen diren, eguneroko bizitzan bizipen esanguratsuak izaten dituzten, ikasi eta partekatu egiten duten espazio edota testuinguru sozial, natural eta birtualez ari gara.

Ingurune segurua eta babeslea da, batez ere, indarkeria-mota orotatik libre dagoena; giza eskubideekiko errespetuan oinarritzen dena, afektua eta goxotasun emozionala dituena, eta haur eta nerabeak subjektu aktibo eta protagonistatzat dituena.

 

Ingurune horrek tratu ona eta berdintasuna bermatu behar ditu, parte-hartzea eta autonomía sustatu, eta, horien bidez, haur eta nerabeen garapen osoa ahalbidetu. Oinarri horien gainean taxutzen den ingurunean ez dago erasoentzako aukerarik.

 

Zer ezaugarri izango ditu ingurune seguru batek? 

  • Espazio inklusiboa, lagunkoia eta atsegina izango da.
  • Behar fisikoak eta emozionalak aseko ditu.
  • Askatasunean eta berdintasunean hezteko aukera bultzatuko du.
  • Kide eta partaide izatearen zentzua bultzatuko du, haur/nerabeari talde eta komunitate bateko partaide sentiaraziz.
  • Afektibitate kontzientea presente izango da: haurrek eta nerabeek aintzat hartuak eta maitatuak direla sentituko dute.
  • Parte-hartzea eta autonomia sustatuko ditu.
  • Indarkeriarik gabeko gunea izango da.

Aisia hezigarriko zerbitzu eta jarduerek arestian deskribatutako ezaugarriak bete behar dituzte, funtsezko rola baitute haurren eta nerabeen sozializazioan eta, ondorioz, haien garapenean eta hazkuntzan. Hona hemen Ingurune seguruak eta babesleak taxutzeko zenbait adierazle (bideo hau Gaztematika sareko profesionalek ikusi dezakete sarearen intranetean. Bideo gehiago baliabideak  atalean).

Adierazleak

Ingurune bat ebaluatzean, taldeak kontzientziazio-prozesu bat burutzen du. Espazio hezigarri hori babes integralaren ikuspegitik ebaluatzea estrategia paregabea da kontzientzia sortzeko. Jada existitzen den espazio bat ebaluatzean nahiz berri bat planifikatzean, ingurune seguru eta babeslea ezinbesteko baldintza da proiektu inklusibo, errespetuzko eta afektibo baterako.