Jasangarritasuneko diputatuak eta Mugikortasuneko, Turismoko eta Lurralde Antolaketako diputatuak harrera egin diete Mugikortasunaren Asteko irabazleei

José Ignacio Asensio diputatu nagusiorde eta Jasangarritasun diputatuak eta Azahara Domínguez Mugikortasuneko, Turismoko eta Lurralde Antolaketako diputatuak joan den irailean egindako Mugikortasunaren Asteko zozketetako irabazleen ordezkariak hartu dituzte Aldundian. Hain zuzen ere, Elena Martínez eta Jesús Mª Aldolarekin bildu dira Jarri Prest zure bizikleta MUGirekin ekintzako bi bizikleten irabazleak, bai eta Carmen Valois, kanpainari atxikitako dendetako batean 50 euroko balea irabazi duena, eta Aitor Nortiguela, MUGI txartelean 20 euroko kargarekin saritua. Europako Mugikortasunaren Astearen barruan bosgarren urtez jarraian abian jarritako ekimen honek, gainera, beste 58 pertsona saritu ditu, MUGI txartelean 20 euroko birkargak eginez, baita 50 euroko 2 bonu ere, aurtengo edizioan atxikitako denda bakoitzean bizikleten materiala erosteko.
Ekimenak, joan den irailaren 16tik 26ra bitartean, bizikletak berrikusteko eta prest jartzeko doako zerbitzu bat jarri zuen eskuragarri, MUGI txartel pertsonalizatuarekin atxikitako 10 denda espezializatuetako edozeinetara eta hamabi herri bisitatu zituen tailer ibiltari batera joan ziren pertsona guztientzat.
Prest jartzeko zerbitzua eskatu zuten eta MUGI txartel pertsonalizatuaren bidez parte-hartzaile gisa izena eman zuten pertsonen artean, bi bizikletez gain, MUGI txartelean 20 euroko kargak zituzten 60 sari eta aurtengo edizioan atxikitako 10 dendetako bakoitzean bizikleten materiala erosteko 50 euroko 2 bonu zozkatu ziren.
“'Jarri zure bizikleta prest MUGIrekin' ekintza adibide bat da ekimen txikiek eragin handia izan dezaketela gure mugitzeko moduan eta gure ingurumen-kontzientzian ikusteko. Garraiobide gisa bizikletaren aldeko apustua egiteak emisioak murriztu egiten ditu, gure bizi-kalitatea hobetzen du eta ohitura osasungarriak sustatzen ditu. Eskerrak eman nahi dizkiet parte hartu duten guztiei mugikortasun jasangarriarekin duten inplikazioagatik eta konpromisoagatik. Aldundiak jokabide horiek erraztu eta saritzeko ekintzak bultzatzen jarraituko du, Gipuzkoa garbiago eta deskarbonizatuago baterantz aurrera egitea kolektiboki onartu behar dugun konpromisoa baita", nabarmendu du José Ignacio Asensiok.
Bestalde, Mugikortasuneko, Turismoko eta Lurralde Antolaketako diputatu Azahara Dominguezek eskerrak eman dizkie Mugikortasunaren Astean parte hartu duten guztiei. "Eskerrak eman nahi dizkiet Mugikortasunaren Astearen aurreko edizioan parte hartu zuten pertsona guztiei, baita atxikitako establezimenduei ere. Gure joan-etorrietarako modu jasangarriagoetan sakontzea ahalbidetzen digun ekintza bat da, horrela gure lurraldearen orainari eta etorkizunari lagunduz. Praktika jasangarriak saritzen dituzten horrelako ekimenak bultzatzen jarraituko dugu, gipuzkoar guztien lankidetza eskatzen duen erronka handia baita esku artean daukaguna", adierazi du.