Lurraldebusek Avanzako lineetako txartelak telefonoz erosteko aukera emango du, eten digitala hautsiz eta erabiltzaileen eskaera handiari aurre eginez

Avanza emakidadunak, Debagoienako eskualdeko zerbitzuak eta Gipuzkoa Bizkaiarekin eta Arabarekin lotzen duten ibilbide luzeko lineak kudeatzen dituenak, txartelak erosteko telefono-zerbitzu bat jarriko du abian, Lurraldebuseko erabiltzaile kopuruaren hazkundeari aurre egiteko. Gainera, neurri horren bidez, besteak beste, adinagatik edo gizarte-egoeragatik bidaiariek izan dezaketen eten digitalari aurre egiten zaio.
Hala iragarri du Mugikortasuneko, Turismoko eta Lurralde Antolaketako diputatu Azahara Dominguezek. Ostegun honetan, Anakon (Arrasateko Nagusien Kontseilua) elkartearekin bildu da euren lana eskertu eta neurri honen berri emateko. Erakunde honek horrelako tresnak abian jartzeko eskatzen zituen, izan ere, herrian ez zuten salmenta-gune fisikorik, eta horrek zaildu egiten zuen kolektibo horren garraio publikorako sarbidea. 
Diputatuak jakinera eman duenez, telefono bidezko salmenta-zerbitzua datorren astelehenetik (hilak 14) aurrera jarriko da martxan, eta astelehenetik igandera, 7:30etik 21:30era, urtarrilaren 1ean eta abenduaren 25ean izan ezik, emango du harreta. Erabiltzaileek 843 740 286 zenbakira deitu ahal izango dute txartelak erosi ahal izateko, eta erosteko baldintzak online erosketakoen berdinak izango dira. Gainera, erabiltzaileek telefono-zerbitzuaren bidez edo Avanza webgunearen bidez erositako txartelak aldatu eta baliogabetu ahal izango dituzte, online erosketaren baldintzen arabera. Beste edozein gai, hala nola lokalizatzaileen eskaera edo beste kontsulta batzuk, Avanza Bezeroaren Arreta Zerbitzuak artatzen jarraituko du.

Hobekuntzak web orrian
Azahara Dominguez diputatuak azaldu duenez, azken asteetan, Mugikortasuneko, Turismoko eta Lurralde Antolaketako Departamentuak hainbat neurri ezarri ditu Avanzari atxikitako Lurraldebuseko lineak erregistratu dituzten erabiltzaileen hazkundeari aurre egiteko, pandemiaren aurreko urteetan baino bost aldiz bidaia gehiago egiten ari baitira. Web-orrian erregistratutako arazoak arintzeko, besteak beste, datu-basearen datu-iraulketa optimizatu da, zerbitzari birtual berri bat sortu da, egungo zerbitzarietan baliabideak handitu dira edo monitorizazio-tresnak instalatu dira, besteak beste. Neurri horiek guztiek eragina izan dute pixkanaka, eta joan den ostiraletik hona egunean 5.000 txartel baino gehiago saldu dira, webgunearen historiako salmenta-zifrarik altuenetara iritsiz.
Baina, horrez gain, Donostiako txarteldegian erabiltzaileei arreta ematen dieten langileak indartu dira, aurrez aurreko salmenta ere arinagoa izan dadin.
Horiei guztiei txartelak telefono bidez erosteko aukera gehitu behar zaie orain, eta etorkizunean, txartelak erostea errazteko beharrezkoak diren neurriak hartzen jarraituko da.
“Neurri hori beharrezkoa zela uste dugu, oraindik gipuzkoar askok ez dakitelako edo ezin dutelako unibertso digitalean sartu, eta garraio publikorako sarbidea erraztu behar diegu herritar guztiei txartelen erosketetan erraztasunak jartzen. Gainera, horrela beste tresna bat eskaintzen dugu erabiltzaileen eskaera gero eta handiagoari hobeto erantzuteko. Garraio publikoa beste eskubide batzuen sarbidea bermatzen duen eskubidea da eta gero eta gipuzkoar gehiagok garraio publikoaren aldeko apustua egitea nahi badugu, zerbitzu jasangarria, erosoa, segurua, irisgarria, lehiakorra eta kalitatezkoa bermatzeaz gain, bertara iristea erraztu behar dugu, eta horretarako, herritarrek erraztasunak izan behar dituzte txartelak eskuratzeko orduan”, adierazi du Azahara Domínguez diputatuak.