Aktualitatea

2024·03·04

39 enpresak jaso dute Naturklimaren Borondatezko Karbono Funtsaren aitorpena

2023an laukoiztu egin dira karbono-aztarna Gipuzkoako Borondatezko Karbono Funtsaren bidez kalkulatu eta konpentsatu duten Gipuzkoako enpresak.

39 enpresek 11.000 tona CO₂ baliokide konpentsatu dituzte guztira, 115.000 eurotan balioetsita.

Egindako konpentsazioari esker, Gipuzkoako leheneratze ekologikorako bi proiektu gauzatu dira: Donostiako Molinao errekaren berroneratze ekologikoa, eta Irungo Lasain-Gogortegi inguruan mikrohezeguneak sortzea.

José Ignacio Asensio: "Gure karbono-aztarnaren konpentsazioa modu eraginkorra da klima-aldaketaren aurka borrokatzeko, gure ekonomiari laguntzeko, tokiko garapenari laguntzeko eta hurrengo belaunaldientzat etorkizun jasangarria bermatzeko".

José Ignacio Asensiok, Jasangarritasun diputatuak eta Naturklimako presidenteak, aitortu egin ditu gaur Gipuzkoako Borondatezko Karbono Funtsaren bidez beren borondatez karbono-aztarna konpentsatu duten 39 enpresa.

Eraikuntza, industria, kirola, kultura edo merkataritza bezalako sektoreetatik datozen 39 enpresek, batzuk aipatzearren, CO₂ baliokidearen 11.000 tona konpentsatu dituzte, guztira 115.000 eurotan baloratuta.

José Ignacio Asensiok eskerrak eman dizkie enpresa horiei gure lurraldea deskarbonizatzeko hartu duten konpromisoagatik, eta Naturklimaren balioa azpimarratu du: "Gipuzkoako Borondatezko Karbono Funtsa duela bi urte abian jarri genuen konpromiso kolektibo baten emaitza da. Gero eta enpresa gehiago ari dira erakusten beren jardueraz arduratzeko eta ingurumenean duten inpaktua aitortzeko eta konpentsatzeko konpromisoa. Hori, planetarentzat ez ezik, lurraldearen aurrerapen sozial eta ekonomikorako ere onuragarria da ".

Euskadiko borondatezko lehen karbono-funtsa 2022an jarri zen abian, Gipuzkoako Foru Aldundiko Jasangarritasun Departamentuak Naturklimarekin lankidetzan bultzatuta. Funts hori sektore lausoetako erakundeei zuzenduta dago, baldin eta, beren emisioak aitortzera behartuta egon gabe, beren karbono-aztarna Gipuzkoako Borondatezko Karbono Funtsaren bidez konpentsatu nahi badute.

José Ignacio Asensio Jasangarritasun diputatuak azpimarratu duenez, borondatezko funtsak aukera ematen die araututako sektoreen barruan ez dauden erakunde eta eragileei beren proiektua modu jasangarriagoan bultzatzeko, klima-aldaketaren aurkako konpromisoa hartuz eta ekonomia deskarbonizatzen lagunduz:

"Karbono-aztarna kalkulatzean eta konpentsatzean, geure gain hartzen dugu gure ekintzen erantzukizuna, eta onartzen dugu gure erabakiek ondorioak dituztela. Hori ingurumenerako onuragarria ez ezik, funtsezkoa ere bada gure espeziearen ekonomiaren lehiakortasunari eta biziraupenari eusteko”. Asensio diputatuak balioa eman die karbonoaren konpentsaziotik datozen dohaintzei esker bultzatzen diren tokiko berroneratze-proiektuei: “Tokiko proiektuetan inbertitzean, enplegua sortzen, ekonomia berdea sustatzen eta gure herritarren bizi-kalitatea hobetzen laguntzen ari gara”.

39 enpresek beren karbono-aztarna konpentsatzeko emandako 115.000 euroekin, Gipuzkoa ekologikoki leheneratzeko bi proiektu gauzatu dira: Donostiako Molinao errekaren berroneratze ekologikoa, eta Irungo Lasain-Gogortegi inguruan mikrohezeguneak sortzea.

José Ignacio Asensiok azpimarratu duenez, "hori da lurralde mailan Borondatezko Karbono Funtsa izatearen abantaila nagusietako bat, egindako konpentsazioa zuzenean gure ingurunearen onurarako izan dadin, inpaktu berrien aurrean gure lurraldearen erresilientzia bultzatuz eta CO₂ ekosistema funtzionalekin neutralizatzeko dugun gaitasuna hobetuz".

“Karbono Funtsa oso mugarri garrantzitsua da 2050erako klima-neutraltasuna lortzeko gure helburuan”, ziurtatu du Naturklimako presidente José Ignacio Asensiok, 2018az geroztik Klima Aldaketaren aurka Borrokatzeko Gipuzkoako Estrategiaren buru denak. Estrategia horren helburua da 2050erako klima-neutraltasuna bermatzea eta gure ekonomiaren deskarbonizazioa sustatzea.

Honako hauek izan dira 39 enpresa aintzatetsiak:

Irisbond, Ekomodo, Gabyl, Teknimap, Apellaniz y de Sosa-Dirdira Lab, Vicomtech, Gipuzkoa Basket, Adegi, Salto, WAXDAYZ, Uvesco, Sinnple, Atotxa Rooms, Ojmar, Grupo Gisma, Tratamientos Geuria, Ondarreta, Euskabea, Giroa-Veolua, Montai Produkzioak, Cluster Habic, Bilibin Circular, Plastigaur, Asfaltia, Campezo, Ekialdebus, Hotel de Londres y de Inglaterra, Zinemaldia, KNG, Naturklima, Sinnple, Ormak, Arregi, Café Saigon, Ekogras, Sutargi, Adorelan, Rotary International, Txita Eman eta Vicomtech.

39 erakundeek 10.206,85 tona CO₂ konpentsatu dituzte guztira, kontabilizatutako 103.267,88 tona CO₂ horietatik, hau da, bidalitako isurketa guztien % 9,88. Karbono-aztarnaren konpentsazio-ehunekoari dagokionez, guztira 25 aztarna konpentsatu dira osorik (isurketen % 100). "Manufaktura-industria" (% 67,10), "eraikuntza" (% 15,13) eta "handizkako eta txikizkako merkataritza" (% 5,15) dira emandako isurketei ekarpen handiena egiten dieten sektoreak.

Donostia, 2024ko martxoaren 1ean