Atzealdea Ingurumen Departamentuak Europako 1,8 milioi euro mobilizatu ditu, Gipuzkoara iritsi diren Next Generation funts guztien % 25

2022·12·28

Berrerabilera Prestatzeko Zentroak eta Zumarragako plastikoaren industriaren ekonomia zirkularreko guneak 1,8 milioi eta milioi bat euro jasoko dituzte, hurrenez hurren.

Gipuzkoako Foru Aldundiko Ingurumen Departamentuak sustatutako bi proiektuek lortu dute funts gehien Gipuzkoan mobilizatzea.

José Ignacio Asensio: “Gipuzkoan beti argi izan dugu ekintzara igaro behar dugula, gure tamaina kontuan hartu gabe, baina kudeaketa klimatikoaren plangintza baten bidez egin behar dugula, trantsizio energetikoaren aukerak ikusi eta aprobetxatzeko eta gizarteari transmititzeko. Gipuzkoak 7,2 milioi euro jasoko ditu Next Generation funtsetatik, aurkeztutako proiektuen sendotasunari esker”.

Berrerabilera Prestatzeko Zentroak (BPZ), ehun-hondakinak, bolumen handikoak eta RAEEak konpontzeko eta berrerabiltzeko, 1.789.042,27 euro jasoko ditu Espainiako Gobernuaren Next Generation funtsetatik, ekonomia zirkularra ezartzen laguntzeko planaren barruan. Aldundiko Ingurumen Departamentuaren proiektu honi esker, Gipuzkoako berrerabilpen-tasa % 30 handituko da. Halaber, azpiegitura berri honek energia- eta industria-sektoreetako CO2 emisioak % 10 murriztuko ditu, eta 190 lanpostu sortuko ditu. Horietatik % 57 gizartetik baztertzeko arriskuan dauden pertsonentzat izango da.

Instalazio berri honek Gipuzkoan, Ingurumen Gunearen bidez, egiten ari diren hiri-hondakinak birziklatzeko eta balorizatzeko gaur egungo tratamenduak osatuko ditu, berrerabilpenarekin. Bikaintasun-mailan aurrera egingo du, prebentzioa aurretiazko urrats gisa hartzen baititu, hondakinen hierarkia komunitarioak adierazten duen moduan.

Bestalde, Zumarragako plastiko-industriaren ekonomia zirkularreko guneak 1.000.000 euro jasoko ditu. Gipuzkoako Foru Aldundiko Ingurumen Departamentuak sustatutako bi proiektu hauek dira Gipuzkoan Next Generation funtsetatik diru gehien mobilizatzea lortu duten bi proiektuak.

Plastic Energy enpresarekin lankidetzan egiten da plastiko-industriaren ekonomia zirkularreko gunearen proiektua. Ohiko teknologien bidez birziklatu ezin diren 30.000 tona plastiko tratatuko dituen instalazioa sortzea du oinarri. Aplikatuko diren teknologia berriei esker, plastiko berriak modu iraunkorrean sortzeko erabiltzen den TACOIL olio bihurtuko da plastikoa. Proiektuak Gipuzkoako Foru Aldundiko Ingurumen Departamentuaren 5 milioi euroko ekarpena du. Era berean, azken inbertsioak 80 milioi euro aurreikusten ditu eta zuzeneko 40 enplegu sortuko ditu.

Gipuzkoa Euskadiko Next Generation funtsen buru

Gipuzkoako probintziak 7,2 milioi euro jasoko ditu Espainiako Gobernuaren Next Generation funtsetatik. Gipuzkoako proiektuek funts horiek Euskal Autonomia Erkidegoari emandako diru-laguntza guztien % 39,77 lortu dutela kontuan hartuta, Gipuzkoa da Euskaditik funts gehien jasotzen dituen probintzia.

José Ignacio Asensio Ingurumeneko diputatuak nabarmendu nahi izan du udalek, sektoreko enpresek eta administrazioek ekonomia zirkularra bultzatzeko egiten duten “lan handia”: “Gipuzkoan beti argi izan dugu ekintzara igaro behar dugula, gure tamaina kontuan hartu gabe, baina kudeaketa klimatikoaren plangintza baten bidez egin behar dugula, trantsizio energetikoaren aukerak ikusi eta aprobetxatzeko eta gizarteari transmititzeko. Gipuzkoak 7,2 milioi euro jasoko ditu Next Generation funtsetatik, aurkeztutako proiektuen sendotasunari esker”.

Donostia, 2022ko abenduaren 27a