Eraginkortasuna, iraunkortasuna eta osasuna: horra hor hiru premisa, estu-estu lotuak daudenak, eta kontuan hartu beharko genituzkeenak gure etxea, lokal komertziala, bulegoa edota eguneroko bizitza eta jarduera profesionala garatzen dugun bestelako edozein espazio birgaitzerakoan.

Gune horiek kontuan hartzen baditugu, bost alderdi daude eragina dutenak haien eraginkortasun mailan, baita konfort maila egokiak mantentzeak sortzen dituen kostu ekonomikoetan ere.

• Isolamendua.
• Kanpoko arotzeria (leihoak).
• Estankotasuna (estalkietan, batez ere).
• Aireztapena.
• Zubi termikoen gabezia.

Merkatuan era askotako materialak eta eraikuntza konponbide ugariak daude berrikuntza bat egiteko, eta gure etxebizitzaren eraginkortasuna hobetzeko, baina denek ez dituzte iraunkortasun eta osasun premisak betetzen.

Leihoen kasuan, adibidez, PVCzkoak eta aluminiozkoak dira erabilienak, baina biek dituzte ingurumen inplikazio negatiboak: PVCak kutsatzaile toxikoak ditu, kloroarekin lotuta daudenak, eta aluminioaren kasuan, berriz, bauxita meategietatik ateratzen delako. Aukera naturala egurrezko leihoetan dago, jatorrizko ziurtagiriarekin (adibidez, FSC).

Beirei dagokienez, beira hirukoitza jartzeko joera zabaltzen ari da, nahiz eta normalean bikoitza izan (lodiera desberdinekoak, 4, 5, 6, 8 milimetrokoak edo gehiagokoak), isolamendu termiko eta akustiko bikaina ematen duen bitarteko aire-ganbera batekin (edo gasezkoa). Azken urteetan, beirek “eguzki kontrola” izeneko tratamendua dute; funtsean, geletara argi naturala sartzen uzten du, baina eguzki erradiazioa islatzen du (bero-energia), eta horrela, etxeko berotasuna murrizten du. Aukera interesgarri bat da, baina gure latitudean eguzki onurak murriztu ditzake, eta egokitzat jotzen da, baldin eta hegoaldera ematen duen beirazko azalera handi bat badugu.

Isolamenduez hitz egiten badugu, eskaintza oraindik handiagoa da aroztegien kasuan baino; ezin konta ahalako hautabide daude, baina iraunkortasun eta osasun ikuspuntu batetik aukera naturalak dira gomendagarrienak, oso egonkorrak eta sendoak direlako, ez direlako ez toxikoak ez sumingarriak, eta birziklagarriak izaten direlako. Kortxoa, egur-zuntza eta zelulosa-zuntza, hegazti lumak, lasto-fardelak, kotoia, kalamua eta kokoa: horra hor material isolatzaile naturaletako batzuk; horien erabilera eraikuntza sektorean zabaltzen ari da, eta, gehienetan, EE kalitate marka eta ziurtagiriak dituzte.

Etxearen inguratzailean hobekuntza horiek guztiak egiteak etxea eraginkorrago bihurtzen du, eta ondorioz, bero ekarpen gutxiago behar da barruko konfort termikoa mantentzeko. Hori dela-eta, garrantzitsua da berritzeko orduan berokuntza sistema aktiboak (galdara, bero ponpa, berogailua, etab.) eta ekipo igorleak ere berritzea (erradiadoreak, fan-coilsak, lurzoru erradiatzaileak, metagailuak etab.) eta aukeratzea potentzia txikiagokoak (zure eskakizun berriei egokituak) eta ahalik eta elementu gutxienak dituztenak (adibidez: modulu gutxiago aluminiozko erradiadoreetan).

Jakin behar duzu ere, 2015eko Europako araudi berriaren arabera, zure galdara berria segur aski kondentsaziozkoa izango dela, eta erregaietan oraindik gehiago aurreztu ahal izango duzula eraginkortasun maila altuagatik.

Eta berrikuntza guztietan bezala, pintura geruza bat beharrezkoa denez, jakin behar duzu hura aukeratzea ere oso garrantzitsua dela osasunaren ikuspuntutik.Ahal den neurrian, saihestu osagaietan “plastikoak” dituztenak; disolbatzaile sintetiko asko kantzerigeno gisa katalogatuta daude. Landare (liho, argizaria, etab.) eta mineral (karea edo silikatoa) oinarria duten pinturak eta bernizak % 100 naturalak eta biodegradagarriak dira; ez dira toxikoak eta iraupen luzekoak dira.

Eraikuntza materialek gure osasunean duten garrantziaz eta eraginaz askoz gehiago jakin nahi baduzu, kontsulta ezazu DKVk eta ECODESek argitaratutako azterlan hau:

https://issuu.com/segurosdkv/docs/observatorio-5-hogares-saludables-e