Hiru erakundeek aukera desberdinen bideragarritasun teknikoa aztertzea erabaki dute, herri horietako bizilagunak artatzen dituzten autobusen edukiera handitzeko
Mugikortasuneko, Turismoko eta Lurralde Antolaketako diputatuak, Azahara Dominguezek, Xabier Lertxundi eta Xabier Urdangarin Hernaniko eta Astigarragako alkateak deitu ditu Lurraldebusek bi herri horietan ematen duen zerbitzuari heltzeko eta, elkarrekin eta elkarlanean, egungo zerbitzuek herritar gehiagori arreta eman ahal izateko irtenbide bat aurkitzeko.
Bilera adeitsu batean, hiru erakundeek mahai gainean dauden aukerak teknikoki aztertzea erabaki dute, Astigarragako eta Hernaniko bizilagunek beren benetako beharrei hobeto erantzungo dien hiriarteko garraio-zerbitzuaz goza dezaten. Mugikortasuneko, Turismoko eta Lurralde Antolaketako Departamentuak duela aste batzuk erabiltzaile asko dituzten zerbitzuak autobus artikulatuekin betetzea proposatu zuen, baina ibilgailu horiek egungo ibilbidea aldatu gabe erabili ahal izateko, beharrezkoa da Hernaniko Udalak hainbat lan egitea, autobusek bira egiteko behar duten lekua izan dezaten.
“Mugikortasuneko, Turismoko eta Lurralde Antolaketako Departamentuan garraio publikoaren zerbitzua hobetzeko eta herritarren benetako behar aldakorretara egokitzeko lan egiten dugu egunero. Eta horretarako ezinbestekoa da udalekin batera lan egitea eta, guztien artean, herritarrei eskaintzen diegun zerbitzua hobetzen duten irtenbideak aurkitzeko. Garraio publikoa gure lurraldea egituratzeko eta kohesionatzeko dugun tresna Nagusia da, eta, beraz, gipuzkoar guztiek mugikortasun iraunkorrerako duten eskubidea bermatuta ikus dezaten lanean jarraituko dugu. Ezin dugu ahaztu garraio publikoa beste eskubide batzuetarako sarbidea bermatzen duen eskubidea dela, hala nola hezkuntza, osasuna, lana edo aisialdia; beraz, hori sustatzea funtsezkoa da Gipuzkoa justuago baterantz aurrera egiteko”, adierazi du Azahara Domínguez diputatuak.